Wahyu 4

Yohanesi deti fi kariri Allai ne mananufo

1 Mayeai iwati fieai aha, amani iwati rahutu bei na rorafaisi tifai. Ainanaya tarahuo mano anta medu we yau na rawafui fiebai toyario songgerifoi, medu we yau nariai aha deyo “Bautai toninai meai, we yeinawi kariri fianai aino ambori kawariai aha fo we wau.” 2 Na tatofang nanai kontaio, Allai Nuaninufoi sensoni yau. Ainanaya iwati kadera mananu bei na Waidani tuti manei minohi nai. 3 Wenani keiwewa toyari kamieio keiwewa ne harga dedai, amani kamieio memarampoti esahui we intan, tuti kamieio berika esahui we sardisi fenanai. Tuti aewi bei doa woruwi na katai minohi nai foi. Aewi nani ne tarai kariri kamieio ne harga dedai bei, amani kamieio keiwewa, esahui we zamrud. 4 Na katai nani kontai iwati kadera mananu fo piareia boa tuang wariri, tuti mano eminohi naya fosa mani, mano ewewafoniai ewepiareia mana fosa. Ansung etatara fo bua karofari tuti etata sapewi mananu fo na enumifo, sapewi nanai enari na emasi kiai. 5 Tuti na kadera mananu foi nani iwati kaiwewa kewariai nai tuti kadidu dotu tuti nubuayai nai. Mae na arongfo, oborio itu doa danggararu nayai. Obori nanai deinawi karirio Allai Nuaninu itu fo. 6 Tuti iwati rawanang bei mani, ne tarai toyario kasinai wiatai na arongreafo, memarampoti paria.

Mae iwati fidarang mana etoari na katai kadera mananu foi warabuka boa fo. Euremifo bitoya paria, amani bitoya na earomifo tuti bitoya na ehurumifo. 7 Fidarang mano reantenang foi ne tarai toyario singa, mano mandu foi ne tarai toyario sapi mang manei, mano mantoru foi mani ureng toyario inontarai, tuti mano mana foi ne tarai toyario koroweio yera warapemafoi we sifo. 8 Tuti ewaramipemafo aiwonang, na ene taraifoi sentenang weureng, tuti na ewaramipema arowawahi fo kontai weureng. Diru rahida erohi pampang efiai Allai. Erohi eteyo,

“Seng Allai wau, murarebanai, murarebanai, murarebanai,

Mano Wemananu Dedai Mantaung di wau,

Mano nayai kawuru na reantenang pari foa foi di wau,

Mano nayai pariao sobu rahida bonini,

tuti Mano nayai pampang we fitawafa di wau.”

9 Mano fidarang mana nanisa erohi rarungfoi we efiai Allai mano minohi na ne kadera mananu foi nani, amani mano minohi wenumainufo. Etaparandini, esomi wei, tuti etohong mahikai wei. Erohi efiai tonanafo, 10 mano ewewafoniai fosa, amani mano ewepiareia mana fosa, etawai aweu etisangkapa eawemibukafo na Mano Darang Wefitawafa foi arongreafo, esomi wei tuti efating ene sapewi mananu fo etohonai watai na arongreafo tuti emadu eteyo,

11 “Dai Allai amene Sengne wau,

Meiri wauno mosi we amefiai waune.

Meiri wauno weMananunei.

Wauno ametaparanding wau,

Amesomi we wau tuti ametohong mahikai we waune.

Weo wauno nari fi fuba nini kiai ne.

Tuti nariri kariri nemu bawia wa ne.”

<- Wahyu 3 Wahyu 5 ->