Yowan 21

Yesu Ipaposi Pang Di Galiunu Limi Be Ru

1 Tiyepe a ke kapala iman a ila, motong la Yesu pombe mulu pang di galiunu tina, ngan potai pang ye ran koonoo Taibirias.[a] Ngan dada yo pombe pang ye di i, in nen. 2 Ye kene tani in Simon Pita iye Tomas, yo ene san Didimus i; inbe Nataniel ke malala Kana yo iken ye tana mai Galili i; inbe Sebedi di natunu tamoto ru nga, inbe Yesu di galiunu ru mulu la tigaua a tiyepe nga. 3 Tiyepe, motong la Simon Pita iwete pang di nen, “Ai, au i nga ole du ayoosoo a akap i sa.”

Ngan di diene tina tiyei ne, “Am lapau, ole amyong tadu.” Le nga du tiyiri ye ookoo atu, a tidu. Bong ye bong tani in nga, ngan le tikap touo i siap yege. 4 Le nga muntu bongmai koot, ngan Yesu di galiunu tina ngan tikamata yo ikododo tana nga, bong lodi galanga ben ya in Yesu, nga tiap.

5 Motong la Yesu koonoo pang di nen, “Di tooltool kiau nga, kaua i sa lapau?”

Ngan tiraua betanga ki nen, “Tiap sa!” 6 Le nga Yesu iwete pang di nen, “Be nen ngan kakatte pu kiang mulu isila ookoo madini ke aromim oonoo in, ngan ole kakap i.” Motong la tikatte pu tani in idu, ngan le i alunu welewele la lo titingi nga, le ke be tiyaua pu tani in a ise ookoo lono tiap.

7 Motong la Yesu galiunu tani yo lono panga mai san i, in iwete pang Pita nen, “Ai, ni Tool Mai tani nani.” Ngan Simon Pita tani in idudu sousoungu ki, inbe iyei urata. Bong yeisa be ilongo yo ene san in iwete panga nen, “Ni Tool Mai tani nani,” motong le ikap taraia sousoungu ki tani a isousou ye mulu, inbe ipas du ran lono a iwe pang ye a idi. 8 Inbe Yesu di galiunu kapala ngan tipie ye ookoo a titoo, inbe tiyolo pu tani in ipa ye i tina ngan a tidi pang tana. Yesoo, tidau manga mooloo ye tana tiap. 9 Tidi tisolo tana, ngan tikamata ei garengana yo ikanen nga, inbe i atu ikenen ei tani in pono nga. Inbe ikamata porong pattu ikenen lapau.

10 Motong la Yesu iwete pang di nen, “Kakap i yo nookoot kakap nga, ngan sa man.”

11 Yesu iwete nen, le nga Simon Pita du irookoo a ilo ookoo lono lo iyolo pu tani in a idi tana. Ngan pu tani in ipon ye i maimai leu, inbe i tina ngan alunu le alunu le kinkatingi ki ben 153, bong tikupraia pu tiap. 12 Motong la Yesu iwete pang di nen, “Kaman a man kakan so.” Yesu iwete nen ngan le di galiunu tina ngan sa mala be itoru nen, “Ong i sei?” nga tiap, yesoo lodi galanga ye be ya in Tool Mai tani. 13 Le nga Yesu ila la ikap porong tina ngan a ikap pang di, motong la ikaua i tani a ikauu pang di lapau. 14 Ngan kene yo Yesu imata, motong imadit mulu ye in nga, ngan le pombe pang ye di galiunu paru oo, e patol nanga la nookoot ngan pombe pang ye di nga.

Yesu Iwete Pang Pita

15 Ye kene tani in tikan so a imot, motong la Yesu iwete pang Simon Pita nen, “Simon, Yowan natunu, ong i lom pau mai san moolmool le kullos di diem nga, too?”

Ngan se Pita iyei ne, “E, Tool Mai. Ong i, lom galanga yau nen, au i lok pong mai san.”

Motong la Yesu iwete panga nen, “Kupakan di sipsip kiau.”

16 Motong la Yesu iwete panga mulu nen, “Simon, Yowan natunu, ong i nga lom pau mai san moolmool, too?”

Ngan se Pita iyei ne, “E, Tool Mai. Ong i, lom galanga yau nen, au i lok pong mai san.”

Motong la Yesu iwete panga nen, “Matam kala di sipsip kiau.”

17 Motong la Yesu iwete panga mulu nen le patol ki. Iyei ne, “Simon, Yowan natunu, ong i lom pau mai san, too?”

Yesu itoru nen le patol, le nga Pita lon moo ye betanga yo iyei ne, “Ong i lom pau mai san, too?” Motong la iwete pang Yesu nen, “Tool Mai, ong in lom galanga ye so nga le imot. Le lom galanga nen, au i lok pong mai san.”

Motong la Yesu iwete panga nen, “Kupakan di sipsip kiau. 18 Awete pong moolmool nen, ye kene yo tinim paunu go nga, ngan ole ong taum kulonlon ye lonloningi kiong, inbe kupa pang ye ni yo lom be kula pang ye i. Bong ye kene yo be kuyei kolman ye in nga, ngan ole kuyitmaka baem pang ete, inbe tool san ilonlonong, lo ngan be irarong pang ye ni yo lom be kula pang ye tiap nga.” 19 Ngan Yesu iwete pang Pita nen nga ikatte betanga ye soo dada yo be Pita imata ye i, a nen ngan iyeie Maro ene le ilo ete ke be di tooltool tipayiti ye i. Yesu iwete panga nen a imot, motong la iyei ne, “Kuman a man kutoo au.”

Betanga Ke Yesu Galiunu Yo Lono Panga Mai San I

20 Yesu iwete pang Pita nen a yaru tila, motong la Pita be ilalele, ngan ikamata Yesu galiunu tani yo lono panga mai san i, in itoo di yaru. Ya in tool tani yo tigaua a tikan so nga, ngan irusu le la itadana Yesu, inbe itoru mos leu nen, “Tool Mai, nga ole sei tool be itarong la di koi kiong baedi i?” 21 Ye kene in Pita ikamata le nga itoro Yesu nen, “Tool Mai, nga ole yelei ye tool i?”

22 Motong la Yesu iwete panga nen, “Kumata le lok be iyepe matana rerene nen le ilo ye lal yo be amulu a asi ye in nga, ngan ole yelei yong? Ong in kuman a kutoo au!” 23 Yesu iwete nen le betanga tani in imasak kataunu ye di diene kapala yo titara lodi medana panga nga, ngan be galiunu tani in o ke be imata tiap. Bong ngan Yesu iwete touo betanga sa be tool tani in ole imata tiap, ngan tiap. Bong ngan iwete leu nen, “Kumata le lok be iyepe matana rerene nen le ilo ye lal yo be amulu a asi ye in nga, ngan ole yelei yong?”

24 Le in Yesu galiunu tani yo iwetewete ye so tina yo ikamata nga, inbe iwodo betanga ki lo ye rau i. Le lod galanga nen, so yo iwetewete ye nga, ngan moolmool.

25 Ngan so alunu san la Yesu iyei lapau nga. Bong kumata be tiwodo betanga ke so tina ngan atu atu le imot ilo ye rau nga, ngan ole tana mai kiidi le imot i taukan manga yo be tatar rau tina ngan ye i.

<- Yowan 20