Ebɨrə je 8

Jəju e nje kɨjə nḛ məsɨ kadɨ-kare kɨ bo

1 Ta kɨ bo kɨ kadɨ j-əl dɔ ta tɨ kɨn ə to kɨn: J-aw kɨ nje kɨjə nḛ məsɨ kadɨ-kare kɨ bo, kɨ ɨsɨ me dɔra̰ tɨ, dɔ ji ko̰ lo kɨsɨ ko̰ɓe tɨ lə Luwə, kɨ tɔge e dɔ tɔgɨ je tɨ pətɨ[~1~]. 2 Ɨsɨ ra kɨlə kɨjə nḛ məsɨ kadɨ-kare kɨ bo ləne me kəy kɨ ay njay tɨ, adɨ e me kəy kaw-naa tɨ kɨ rɔjetɨ kɨ e dɔra̰ tɨ nu. E kəy kɨ Luwə wa ə ra ɓɨ e dɨje ə rai kɨ jide al.

3 *NJé kɨjə nḛ məsɨ kadɨ-kare je kɨ bo, kare kare pətɨ, kɨlə ləde e mba kadɨ adi nḛ je Luwə nɨm, rəi kɨ kadɨ-kare məsɨ je nɨm tɔ. Be tɔ ə, e go rəbe tɨ kadɨ Jəju ka, aw kɨ nḛ kadɨ adɨ kadɨ-kare tɨ tɔ. 4 Təkɨ rɔjetɨ, re Jəju e dɔnangɨ tɨ ne nɨngə, a e nje kɨjə nḛ məsɨ kadɨ-kare al, tadɔ njé kɨjə nḛ məsɨ kadɨ-kare je kɨ ɨsɨ rai kɨlə kɨn kɨ go ndu-kun tɨ lə *Mojɨ, ɨsi dɔnangɨ tɨ ne ə bəlme ngata. 5 NJé kɨjə nḛ məsɨ kadɨ-kare je ka kɨn, ɨsɨ rai kɨlə me kəy kaw-naa tɨ. Nə kəy kɨn e ndɨl kəy kɨ rɔjetɨ kɨ to dɔra̰ tɨ. Təkɨ rɔjetɨ, lokɨ Mojɨ ɨlə ngɨrə kadɨ ra kəy kɨbɨ, Luwə əl-e ə nə: «Ur mbi majɨ o-n dɔ ta kɨ m-a m-əli kam: majɨ kadɨ ɨra kəy kɨbɨ kɨn təkɨ ndɔ kɨ m-ɔjii dɔ mbal tɨ[~2~].» 6 Nə ngɔsɨne, Jəju aw kɨ kɨlə kɨ ndae e ngay ɨtə kɨlə lə njé kɨjə nḛ məsɨ kadɨ-kare je. Adɨ e ə, e nje ka mbo̰ lo tɨ kɨ mbata kɨlə mɨndɨ kɨ majɨ, kɨ ngɨre e kɨ kɨndə dɔ kun mɨndɨ tɨ kɨ majɨ tɔ.

Luwə adɨ mɨndɨ ne mbata kɨlə mɨndɨ kɨ sɨgɨ

7 Təkɨ rɔjetɨ, re nḛ kɨ majal goto me kɨlə mɨndɨ tɨ kɨ kəte ə[~3~], Luwə a re kɨ e kɨ rangɨ kɨ ko̰ joo al. 8 Nə, Luwə kɔl kɨ dɨje ləne mbata majal je kɨ rai, ə nə:

«Oi ndɔ je a rəi no̰o̰,

Kɨ m-a m-ɨlə mɨndɨm kɨlə kɨ sɨgɨ,

Kɨ dɨje kɨ Isɨrayəl tɨ nɨm,

Kɨ dɨje kɨ Juda tɨ nɨm tɔ.

9 Kɨlə-mɨndɨ kɨn, a to tə kɨlə mɨndɨ,

Kɨ ndɔ kɨ m-ɨlə kɨ kade je,

NDɔ kɨ m-uwə-n jide,

MBa kadɨ m-tḛḛ-n səde dɔnangɨ Ejɨpɨ tɨ kɨn al.

Lo kadɨ ay dɔ njade tɨ səm me kɨlə mɨndɨ tɨ kɨn goto.

Be ə, mi Ɓaɓe, m-a m-təl gɨdɨm madɨde tɔ.

10 Ɓaɓe ə nə:

Kɨlə-mɨndɨ kɨ m-a m-ɨlə

Kɨ dɨje kɨ Isɨrayəl tɨ go ndɔ je tɨ kɨn ə to kɨn:

M-a m-adɨ-de nḛ gər

MBa kadɨ gəri ndu-kun je ləm,

M-a m-ndangɨ ndu-kun je ka kɨn dɔ ɓəngɨrəde tɨ.

M-a mi Luwə ləde,

Ə a əi dɨje ləm tɔ.

11 Dəw madɨ kare kɨ a aw

NDoo dəw kɨ me ɓe tɨ ləne,

Ə se ngokone kadɨ gər-m goto,

Tadɔ dɨje pətɨ,

Ɨlə ngɨre dɔ dɨje kɨ tɔgɨ tɨ bɨtɨ tḛḛ-n dɔ ngan je kɨ du tɨ,

A gəri mi.

12 M-a m-ɨyə̰ go ra go tɨ al je ləde kɔ,

Mem a oy dɔ majal je tɨ ləde ratata[~4~].»

13 Lokɨ Luwə əl ta dɔ kɨlə mɨndɨ kɨ sɨgɨ tɨ nɨngə, e kɨn ɔjɨ kadɨ təl e kɨ kəte tə nḛ kɨ kɔke tɨ. Nɨngə j-əi pətɨ jɨ gəri kadɨ re nḛ to kɔkɨ nɨngə nay ngay al kadɨ a goto.

<- Ebɨrə je 7 Ebɨrə je 9 ->