Hebere 3

O Yeesu bìo ɲúhṹ wi po a Mɔyiize

1 Lé bṹn nɔn á minɛ́n wàn zàwa lè wàn hĩ́nni na bìo sã̀ le Dónbeenì yi, minɛ́n na le mún hueekaa à mi níní kɛń le bìo yi, mi le mi yilera kɛń o Yeesu bìo wán. Lé orɛ́n le Dónbeenì tonkaa ó o ɓueé wó bìo wa dó wa sĩa yi wee bío wéréwéré yankarowà ɲúhṹso. 2 Le Dónbeenì léra a ò o sá ho tonló mu, ó o mún bò bìo ɓúenɓúen na le le o wé yi, làa bìo ó o *Mɔyiize yánkaa wóráa mu lè le Dónbeenì nìpomu. 3 Ɛ̀ɛ ká a Yeesu màhã́ ko lè ho cùkú á po a Mɔyiize, làa bìo á yìa son le zĩi koráa lè ho cùkú á po le zĩi mí bɛɛre bìo síi. 4 Mu bon, zĩi na wi à nùpue yí son le dén mía. Ká le Dónbeenì lé dìo ɓɛ̀n wó á mu bìo ɓúenɓúen wi làa bìo mu karáa. 5 O Mɔyiize yánkaa bò bìo le Dónbeenì le o wé yi le zĩi nìpomu ɓúenɓúen tĩ́ahṹ. Wón lé le Dónbeenì ton-sá, á bìo ó o wee wé ko mu zéení le Dónbeenì ɲi-cúa na le è fɛɛ. 6 O *Krista mún bò bìo le Dónbeenì le o wé yi ká wón ɓɛ̀n lé le Za, á le bàrá mí zĩi nìpomu ɲúhṹ wán. Bṹn nìpomu so lé warɛ́n, ká wa wíokaa henía wa sĩa wee lòoní bìo wa dó wa sĩa yi.

Bìa dó mí sĩa le Dónbeenì yi khíi kɛń le vũńnà yi

7 Lé bṹn nɔn le Dónbeenì Hácírí bía bìo kà:

«Ho zuia, ká le Dónbeenì wee bío làa mia,

8 à mi yí wé lòn nùpua na yí wi ɓa ɲí dɛ̀ɛ

làa bìo á mi wóráa mu ho pã̀ahṹ na mi kã́a á khũaana le Dónbeenì ɲii yi ho tá henì yi bìo síi.

9 Á le bía le mìn ɓùaawa yánkaa khũaana mí ɲii yi ho tá henì yi

á khɛ́raráa mí kúará

à ɓa ɲɔǹ mɔn bìo mi wó hã lúlúio ɓúará-ɲun yi.

10 Lé bṹn te bìo á le sĩi cã̀náa ɓa yi, á bía bìo kà:

Ɓa nùpua na kà wee pĩ́ ĩ bìo fɛ́ɛɛ, le dã́ní na á ĩ wi à ɓa lá á ɓa día.

11 Bìo le sĩi cã̀ ɓa yi, á le báa

le ho lahó na á le wíokaa à ɓa vũń yi á ɓa wã́a máa zo yi hùúu.»[a]

12 Wàn zàwa lè wàn hĩ́nni, mi pa miten bìo, ò o ɓúi hĩ́a yí wé sĩ-kohó ɓànso mi tĩ́ahṹ à kã́a pĩ́ le Dónbeenì día, dìo wi fɛ́ɛɛ. 13 Mi wé hení mín sĩa làa wizooní ɓúenɓúen, pã̀ahṹ na wa wi «ho zuia» na le Dónbeenì bía bìo. Ká mi wé wé mu bèra a na à mi nì-kéní woon yí día míten le mu bè-kohó khà vĩ́iní, à wé lòn nùpua na yí wi ɓa ɲí dɛ̀ɛ bìo síi. 14 Ká wa fárá dĩ̀n bìo wa dó wa sĩa yi wán mu ɲúhṹ ɓúɛɛníi fúaa wa mukãnì véró, se wa màhã́ páanía sá là a Krista. 15 Làa bìo mu bíaráa kà síi:

«Ho zuia, ká le Dónbeenì wee bío làa mia,

à mi yí wé lòn nùpua na yí wi à ɓa ɲí dɛ̀ɛ

làa bìo á mi wóráa mu ho pã̀ahṹ na mi kã́a á khũaana le Dónbeenì ɲii yi bìo síi.»[b]

16 Bìa ɲá le Dónbeenì bíonì à ɓa «kã́a á khũaana le ɲii yi» lé ɓa yɛ́n? Mu so yínɔń bìa ɓúenɓúen na ó o Mɔyiize fó lóráa ho *Ezipite kɔ̃hṹ yi le? 17 Bìa «le Dónbeenì sĩi cã̀ yi hã lúlúio ɓúará-ɲun yi» lé ɓa yɛ́n? Mu so yínɔń bìa wó mu bè-kora ho tá henì yi á húrun bĩ́n le? 18 Á bìa le «báa le ho lahó na á le wíokaa à ɓa vũń yi á ɓa wã́a máa zo hùúu» lé ɓa yɛ́n? Mu so yínɔń bìa pã́ á yí bò bìo le bía yi le? 19 Wa ɓɛ̀n mɔn le ɓa yí dàńna yí zon hã vũńnà lahó mu yi, lé bìo ɓa yí tà yí dó mí sĩa le Dónbeenì yi.

<- Hebere 2 Hebere 4 ->