Hibru 2

I too fye kagalwà

1 Taman, tooto fakgis magot di kaglut ta lingeto, du fye là gasyat ato. 2 Ta too gfite kaglut i tdò ta blé di dad gutambulto fagu di dad kasaligan, na nè i to là lmalò na mimen dun, gdawatan flayam gten di sasè nimòan. 3 Taman, dét kibòto miwas i kaflayam ku là dnawatto i bong fye kagalwà? I Amu muna fgadè i kagalwà ani, na i dad to lminge dun, fitela di gito i kaglutan. 4 Na lê fite Dwata i kaglutan fagu di kimòan dad ilè na dad sahal tnikeng, na dad gnagan blé i Mtiu Tulus fagu di knayèan.

Dyisas i dalan kagalwà

5 Nun falami banwe fan kel galmi santulen, bay ise ku yé duen Dwata mimò dad kasaligan ku fagotan dale. 6 Bay lêan man di satu alel di Tnalù Dwata,

“E Dwata, dét kè kabtas i to duenam famdam dun? Kan kè ku nifatam i lo btal to?

7 Ta nimòam kenen beg mdanà di dad kasaliganam, là mlo. Ta banlém kenen kdatah na afè,

8 na ta fagotam di to i kalbong kdeen.”

Yé manan ta fagot Dwata i kdee di to, na sdulê glam déé i kdee. Bay, là teento di mdu ani ku i to ta magot kdeen. 9 Bay yé teento, fdanàan Dyisas di dad kasaligan, là mlo, na mdà di kafye Dwata, mati kenen di kdee dad to. Na lêto teen, ta banlén kenen kdatah na afè du mdà di kgagun i kaflayam di kfatin.

10 Dwata mimò na mifat i kalbong kdee. Taman, kenen i gten smikof ku Dyisas fagu di kaflayam, du fye dee to geben gagin mfun i kdatahan. Du Dyisas i mebe dale di kagalwà. 11 Du i Ftiu na i dad ftiun, lo satu Màla, taman là myàan tamlo dale dad flanekan. 12 Manan di Dwata,

“Fdilègu i dagitam di dad flanekgu. Lmingag agu dmayen ge di kanfe i dad to.”

13 Na lêan man, “Smalig agu di Dwata.”

Kafnge ayé, lêan man, “Ani agu, magin do i dad ngà ta salig Dwata di do.”

14 Du i dad ngà manan ani, to tanà ale, taman fbaling To tanà Dyisas du fye salngad di dale, na fagu déé, gafalmon Satanas, i magot fati, 15 na yé kfagun falwà i dad to tagnè magfasak di klikòla i fati. 16 Du too ti mbateng, ise yé tnabengan i dad kasaligan, bay i dad bel Abraham. 17 Yé knayèan man ani, là fakay ku là salngad kenen di dad flanekan di kdee gnagula du fye mgimò kenen Mdatah Mnè di Bleng too gsalig na too kamdo, du fye magfasinsya salà i dad to. 18 Du ta gnagun dad kaflayam na dad tilew, gaganan tmabeng i dad to mnè di tilew.

<- Hibru 1 Hibru 3 ->