EBERUNƆ 3

Yesu de Musala

1 Abire yãi ma gbɛ̃nↄ, ákↄ̃nↄ kũ Luda á sísi a su a kĩnaanↄ, à laasun lɛ́ Yesu kũ Luda a zĩ̀ Sa'oriki kũ o zɛo ũa. 2 Náanidemɛ Luda kũ à a dìtɛnɛ lákũ Musa de nà Luda ↄnn. 3 Lákũ ↄnkatɛrii bɛ̀ɛrɛɛ dìgↄ̃ de ↄnla nà, lɛn Yesu gakuri zↄ̃kↄ̃ de Musa pↄ́la lɛ. 4 Ɔn sĩnda pínki a kàtɛri vĩ, akũsↄ̃ pↄ́ sĩnda pínki Kàtɛrin Luda ũ. 5 Luda ↄn zĩkɛri náaniden Musa ũ, yã kũ Luda ni o sèedademɛ. 6 Kirisi sↄ̃ bede pì nɛ́mɛ. Luda a ↄn nànɛ a ↄĩ. Ókↄ̃nↄmɛ ↄn pì ũ, tó ó kpɛ́ ótɛn tãmaa kũ ó vĩ lɛ́ gbɛ̃ kũ kù gbãnao.

Luda gbɛ̃nↄ kámmaboki

7 Abire yãi lákũ Luda Nini ò nà:

Tó a Luda kòtoo mà gbãra,

8 àsun sãgbãna kɛ lákũ á dizinↄ kɛ̀ nàro,

kũ ò ma lɛ ò ma gwa gↄrↄ kũ ò bò ma kpɛ gbárannan.

9 Bee kũ ò ma yãkɛnanↄ è wɛ̃̀ bupla,

ò ma lɛ ò ma gwa gwe, ò ma gbãna lɛ́ gwà.

10 Akũ ma pↄ fɛ̃̀ gbɛ̃ pìnↄi,

ma pì gbɛ̃ sãsãnanↄmɛ ń ũ,

odi ma zɛ́nↄ dↄ̃ro.

11 Akũ ma la dà ma pↄfɛ̃ gũn ma pì,

oni gɛ̃ ma kámmabokinlo fá.

12 Ma gbɛ̃nↄ, à laakari kɛ á gbɛ̃ke súngↄ̃ swɛ̃̀ vãni ludanaanikɛnasari vĩ ari à gɛ́ kɛ̃o Luda Wɛ̃̀ndidearo. 13 Gu kũ àdi dↄ kũ adì pi Gbãra pínki, àgↄ̃ lɛ́ dakↄ̃a, de durunna sún á gbɛ̃ke sãtɛ à sãgbãna kũro yãi. 14 Zaakũ Kirisi gbɛ̃nↄn ó ũ, tó ó náani kũ ó vĩ zaa káaku kũna gbãnagbãna ari a lɛ́a. 15 Lákũ ò ò nà:

Tó a a kòtoo mà gbãra,

àsun sãgbãna kɛ lákũ á dizinↄ kɛ̀ nà

gↄrↄ kũ ò bò ma kpɛro.

16 Dínↄn gbɛ̃ kũ ò Luda kòtoo màa ò bò a kpɛnↄ ũ, tó adi kɛ gbɛ̃ kũ Musa ń bↄ́tɛ Misilanↄ baasiroo? 17 Dínↄn Luda pↄ fɛ̃̀ńyĩ ari wɛ̃̀ bupla, tó adi kɛ gbɛ̃ kũ ò durunna kɛ̀, ń gɛ̀ɛ gↄ̃̀ katɛna gbáranna gũnnↄ baasiroo? 18 Dínↄn à la dàńnɛ kũ oni gɛ̃ a kámmabokinlo, tó adi kɛ gbɛ̃ kũ ò gì a yã mainↄ baasiroo? 19 O è kũ odi le ò gɛ̃̀nlo ń ludanaanikɛnasari yãi.

<- EBERUNƆ 2 EBERUNƆ 4 ->