Yeremi 13

Kpɑkɑ ye bɑ kuɑ

kɑ wɛ̃ɛ dɑmgii

1 Yinni Gusunɔ u nɛɛ, nɛ, Yeremi, n doo n kpɑkɑ dwe kpɑ n ye sɛ̃kɑ pɔrɑɔ, ɑdɑmɑ n ku ye doke nim sɔɔ. 2 Mɑ nɑ kpɑkɑ ye dwɑ nɑ sɛ̃kɑ pɔrɑɔ nge mɛ u mɑn sɔ̃ɔwɑ. 3 Mɑ Yinni Gusunɔ u kpɑm nɛɛ, 4 n kpɑkɑ ye suo kpɑ n se n dɑ dɑɑ te bɑ mɔ̀ Efɑrɑtiɔ kpɑ n ye bere mi, kpee wɔru gɑgu sɔɔ. 5 Mɑ nɑ seewɑ nɑ dɑ nɑ ye beruɑ mi, nge mɛ u geruɑ. 6 Ye n tɛ, u mɑɑ nɛɛ, n wuro Efɑrɑti mi, kpɑ n kpɑkɑ ye suɑmɑ ye u rɑɑ nɛɛ, n bere mi. 7 Mɑ nɑ seewɑ nɑ dɑ nɑ kpɑkɑ ye suɑ mi yɑ rɑɑ beruɑn di. Adɑmɑ nɑ deemɑ wee, yɑ sɑnkirɑ yɑ ǹ mɑɑ gɑru koorɔ.

8 Yerɑ Yinni Gusunɔ u mɑn sɔ̃ɔwɑ u nɛɛ, 9 nge mɛyɑ u koo Yudɑbɑ kɑ Yerusɑlɛmugibun tii suɑbu kpeerɑsiɑ. 10 U nɛɛ, bɑ sɑ̃ɑwɑ tɔn kɔ̃sobu, bɑ ku rɑ wure bu win gɑri nɔ. Ben gɔ̃ru kĩrun gɑriyɑ bɑ rɑ n yɔ̃rɑri, kpɑ bɑ n bũnu yiirɑmmɛ bɑ n sɑ̃ɑmɔ. Bɑ koo kowɑ nge kpɑkɑ ye, ye yɑ ǹ mɑɑ gɑru koorɔ mi. 11 Nge mɛ bɑ rɑ kpɑkɑ sɛ̃ke pɔrɑɔ, nge mɛyɑ u rɑɑ Isirelibɑ kɑ Yudɑbɑ kpuro suɑ u tii sɛ̃ke bɑ n kɑ sɑ̃ɑ win tɔmbu, bɑ n win yĩsiru sɔɔwɑ, bɑ n sɑ̃ɑ win burɑru, kpɑ tɔmbɑ n nùn siɑrɑmɔ ben sɔ̃. Adɑmɑ bɑ ǹ win gɑri wure. Wi, Yinni Gusunɔwɑ u yeni geruɑ.

Yinni Gusunɔn mɔru

12 Yinni Gusunɔ u nɛ, Yeremi sɔ̃ɔwɑ u nɛɛ, n doo n nɛn tɔmbu Isirelibɑ sɔ̃ mɑ wi, ben Yinni, u geruɑ u nɛɛ, tɑm bwɑ̃ɑrɑ wɑ̃ɑwɑ tɑm sɔ̃. Adɑmɑ bɑ̀ n wisɑ bɑ nɛɛ, bɑ yɛ̃ mɛ, 13 sɑɑ yerɑ kon bu sɔ̃ n nɛɛ, mɛsumɑ wi, Yinni Gusunɔ u geruɑ. U nɛɛ, u koo de win mɔru yu ko nge tɑm mɛ mu koo Yerusɑlɛmun tɔmbu kpuro go, kɑ sinɑm be bɑ sɔ̃ Dɑfidin sinɑ gɔnɑ sɔɔ, kɑ yɑ̃ku kowobu, kɑ win sɔmɔbu, tem mɛn tɔmbu kpuro gesi. 14 Kpɑ bu soonɑ bu kɔsukunɑ, bɑɑbɑ kɑ bii, u ǹ ben goon wɔnwɔndu mɔ̀. Gɑ̃ɑnu mɑɑ sɑri ni nu koo nùn yɔ̃rɑsiɑ sere u kɑ be kpuro go.

Yinni Gusunɔ u tɔmbu

kirɔ mɔ̀ ben tii suɑbun sɔ̃

15 Bɛɛ, Isirelibɑ,

i swɑɑ dɑkio i nɔ, ye nɑ gerumɔ.

I ku mɑɑ tii suɑ,

domi Yinni Gusunɔ u kɑ bɛɛ gɑri mɔ̀.

16 I Gusunɔ bɛɛn Yinni bɛɛrɛ wɛ̃ɛyɔ

u sere kɑ yɑm wɔ̃kuru nɑ

te tɑ koo de i sokukirɑ guunu wɔllɔ.

Mɛyɑ i yɑm bururɑm mɑrɑ,

ɑdɑmɑ u koo de mu tĩrɑ mɑm mɑm

kpɑ mu gɔsiɑ yɑm wɔ̃ku bɑkɑru

nge te tɑ wɑ̃ɑ gɔribun wɑ̃ɑ yerɔ.

17 Ì kun gɑri yi swɑɑ dɑki,

kon dɑ n swĩ bɔkuɔ bɛɛn tii suɑ bin sɔ̃.

Kon nɔni yĩresu yɑri n bɑndɑ.

Domi bɑ koo bɛɛ Yinni Gusunɔn tɔmbu yoru mwɛɛri

bu kɑ dɑ tem tukumɔ.

18 Yinni Gusunɔ u mɑn sɔ̃ɔwɑ u nɛɛ,

n sinɑ boko kɑ win mɛro sɔ̃ɔwɔ n nɛɛ,

bu sinɔ temɔ domi ben sinɑ furɔsu wɔrukɑ

si su sɑ̃ɑ ben burɑru.

19 Wee, wuu si su wɑ̃ɑ sɔ̃ɔ yɛ̃sɑn nɔm dwɑru giɑ Nɛgɛbuɔ,

sin tɔmbɑ doonɑ kpuro,

mɑ wuu si, su kɛnuɑ.

Goo sɑri wi u koo mɑɑ su kɛniɑ,

domi bɑ sin tɔmbu Yudɑbɑ gurɑ kpuro sem

bɑ kɑ doonɑ tem tukumɔ.

Bɑ Yerusɑlɛmun bɛɛrɛ wunɑ

20 Wunɛ Yerusɑlɛmu, ɑ nɔni seeyo ɑ wɑ,

wee, wunɛn yibɛrɛbɑ bɑ wee sɔ̃ɔ yɛ̃sɑn nɔm geu giɑn di.

Mɑnɑ tɔn be nɑ rɑɑ nun nɔmu sɔndiɑ bɑ wɑ̃ɑ,

bèn sɔ̃ ɑ rɑɑ bɛɛrɛ mɔ.

21 Be bɑ rɑɑ nun sokumɔ yinni,

bɑ̀ n nun sɛɛyɑsiɑbu nɑ, mbɑ kɑɑ gere.

Sɑɑ ye sɔɔrɑ wuriribu bu koo nun deemɑ

nge tɔn kurɔ wi u yiire u kĩ u mɑ.

22 Kɑɑ tii bikiɑ gɔ̃ruɔ ɑ nɛɛ, mbɑn sɔ̃nɑ yeni yɑ nun deemɑ.

Wunɛn torɑ dɑbinun sɔ̃nɑ bɑ wunɛn bekuru potɑ kɑ dɑm

bɑ nun sekuru doke.

23 Etiopigii u koo kpĩ u win wɑsin gɔnɑ kɔsi?

Musuku gbeeku gɑ koo mɑɑ kpĩ gu gen sɑnsun bɑusu kɔsi?

Aɑwo.

Nge mɛyɑ bɛɛ be i kɔ̃sɑn dɔɔnɛ mɔ,

i ǹ kpɛ̃ i geɑ ko.

24 Yen sɔ̃, kon bɛɛ yɑrinɑsiɑwɑ

nge mɛ woo gɑ rɑ yɑkɑsu yɑrinɑsie gbɑburɔ.

25 Wunɛ, Yerusɑlɛmu,

yèn sɔ̃ ɑ nɛ, Yinni Gusunɔ duɑri,

mɑ ɑ wunɛn nɑɑnɛ doke weesu sɔɔ,

wee ye nɑ nun yiiye.

26 Kon wunɛn bekuru gbɑbiɑ

kpɑ bu wunɛn tereru wɑ.

27 Nɑ wɑɑmɔ sɑkɑrɑru kɑ kuuki yi ɑ mɔ̀,

sɑnɑm mɛ ɑ bũnu gɑsirimɔ ɑ sɑ̃ɑmɔ guunu wɔllɔ kɑ yɑkɑsɔ.

Yɑ sɑ̃ɑwɑ gɑ̃ɑ kɔ̃sunu nɛn nɔni sɔɔ.

Yen sɔ̃, wunɛ Yerusɑlɛmu, kɑɑ kɑm ko ɑ̀ kun tii dɛɛrɑsie.

Sɑɑ yerɑ̀ ɑ mɑrɑ, ɑ kɑ tii dɛɛrɑsiɑ.

<- Yeremi 12 Yeremi 14 ->