Languages
20
Bɑ Yeremi dɑ̃ɑ doke

1 Yerɑ sɔ̃ɔ teeru, Pɑsuri Imɛrin bii wi u sɑ̃ɑ yɑ̃ku kowo u kɑ mɑɑ sɑ̃ɑ Yinni Gusunɔn sɑ̃ɑ yerun kɔ̃sobun tɔnwero u nuɑ mɑ Yeremi u yenibɑn gɑri geruɑ. 2 Yerɑ u derɑ bɑ nùn so, mɑ bɑ nùn dɑ̃ɑ doke nge wiiro Yinni Gusunɔn sɑ̃ɑ yerɔ, kɔnnɔ ge bɑ sokumɔ Bɛnyɑmɛɛn kɔnnɔn berɑ giɑ. 3 Adɑmɑ yen sisiru bururu, Pɑsuri u Yeremi dɑ̃ɑ ye wunɑ. Mɑ Yeremi u nùn sɔ̃ɔwɑ u nɛɛ, Yinni Gusunɔ kun mɑɑ nun sokumɔ Pɑsuri. Yĩsi ten tubusiɑnɑ bɔri yɛndɑ kɑ nun sikerenɛ. Adɑmɑ tɛ̃, u nun sokumɔ Mɑgɔɔ Misɑbibu. Yen tubusiɑnɑ nɑndɑbu kɑ nun sikerenɛ. 4 Domi Yinni Gusunɔ u geruɑ u nɛɛ, u koo wunɛ kɑ wunɛn bɔrɔbɑ nɑndɑbu kpɛ̃ɛ. U koo de bɛɛn yibɛrɛbɑ bu bɛɛn gɑbu go tɑbu sɔɔ, kpɑ ɑ ye wɑ kɑ wunɛn nɔni. Kpɑ Bɑbilonin sinɑ boko u Yudɑbɑ go kpɑ u gɑbu yoru mwɛɛri u kɑ dɑ Bɑbiloniɔ. 5 U koo de yibɛrɛbɑ bu Yerusɑlɛmun ɑrumɑni gurɑ, kɑ sɔmɑ ye tɔmbɑ kuɑn ɑre kpuro, kɑ sere gɑ̃ɑ gee ni nu wɑ̃ɑ ye sɔɔ. U koo de bu Yudɑbɑn sinɑmbun ɑrumɑni gurɑ, kpɑ bu kɑ ye kpuro dɑ Bɑbiloni mi. 6 Pɑsuri, wunɛ kɑ wunɛn yɛnugibu, bɑ koo bɛɛ yoru mwɑ bu kɑ dɑ Bɑbiloniɔ. Miyɑ i ko i gbi, wunɛ kɑ be ɑ gɑri weesugii kuɑ, kpɑ bu bɛɛ sike mi.

Yeremi u Yinni Gusunɔ
weeweenu koosimɔ
7 Yinni Gusunɔ, ɑ mɑn kɔkurɑ,
mɑ nɑ wunɛn gɑri wurɑ.
A mɑn sɛ̃re ɑ kɑmiɑ.
Wee tɔ̃ru bɑɑtere
tɔmbu kpuro bɑ rɑ n mɑn yɛ̃ɛmɔwɑ,
kpɑ bɑ n mɑn gɑri bɔkɔ mɔ̀.
8 Nɑ̀ n kĩ n gɑri gere,
sere n nɔɔgiru suɑ kɑ dɑm n nɛɛ,
yibɛrɛbɑ bɑ wee bu sun dɑm dɔre,
kpɑ bu sun kɑm koosiɑ.
Yinni Gusunɔ,
tɔmbɑ rɑ n mɑn yɛ̃ɛmɔwɑ wunɛn gɑrin sɔ̃ bɑɑdommɑ.
9 Nɑ̀ n nɛɛ, kon nun deriwɑ,
nɑ ǹ mɑɑ wunɛn gɑri kpɑrɑmɔ,
n dɑ n sɑ̃ɑwɑ nge dɔ̃ɔ u wɑ̃ɑ nɛn wɑsi sɔɔ
u nɛn kukunu mɛnimɔ.
Kpɑ n kookɑri ko n kɑ tii mɑrisi,
ɑdɑmɑ nɑ ku rɑ kpĩ.
10 Nɑ nɔɔmɔ tɔn dɑbinu nu mɑn kɔ̃sɑ bwisikusimɔ.
Bɑ mɔ̀, nɑndɑbu wɑ̃ɑ bɑɑmɑ.
Su kɑ win gɑri dɑ wirugibun mi.
Be bɑ rɑɑ kɑ mɑn nɔɔ tiɑ sɑ̃ɑ
bɑ mɛɛrimɔ nɑ̀ n kon sokurɑ.
Bɑ mɔ̀, sɔrɔkudo kon de bu mɑn sɑmbɑ ko.
Kpɑ bu wɑ bu mɑn mwɑ bu mɔru kɔsie.
11 Adɑmɑ nɑ yɛ̃ mɑ wunɛ Yinni Gusunɔ, ɑ wɑ̃ɑ kɑ nɛ
nge tɑbu durɔ dɑmgii.
Yen sɔ̃nɑ be bɑ mɑn nɔni sɔ̃ɔmɔ bɑ koo sokurɑ.
Bɑ ǹ kpɛ̃ bu mɑn kɑmiɑ.
Yen sɔ̃nɑ bɑ koo sekuru wɑ
kpɑ bɑ n tu yɑɑye sere kɑ bɑɑdommɑɔ.
12 Wunɛ Gusunɔ wɔllu kɑ tem Yinni,
wunɛ wi ɑ rɑ tɔnu wɛ̃ɛri,
ɑ kɑ wɑ ù n sɑ̃ɑ gemgii,
kpɑ ɑ n win bwisikunu kɑ win gɔ̃run gɑri yɛ̃,
wunɑ kon de ɑ nɛn yibɛrɛbɑ mɔru kɔsie.
Domi wunɑ nɑ tii nɔmu sɔndiɑ.
13 I Yinni Gusunɔ siɑro kɑ womusu.
Domi u rɑ wɔnwɔndo wɔre
sɑɑ tɔn kɔ̃son nɔmɑn di.
14 Tɔ̃ɔ bɔ̃rigirɑ tɔ̃ɔ tè sɔɔ bɑ mɑn mɑrɑ.
Tɔ̃ɔ te, tu ku domɑru wɑ.
15 Bɔ̃rurowɑ wi u dɑ u nɛn tundo sɔ̃ɔwɑ u nɛɛ,
wee, bɑ nùn bii tɔn durɔ mɑruɑ.
Mɑ lɑbɑɑri ye, yɑ nùn nuku doo bɑkɑbu wɛ̃.
16 Durɔ wi, u kɑm koowo
nge wuu si Yinni Gusunɔ u kɑm koosiɑ
u ǹ sin wɔnwɔndu kue.
Kpɑ u wuri nɔ bururu,
kpɑ u tɑbun wurenu nɔ sɔ̃ɔ sɔɔ gbɑ̃ɑrɑ.
17 Mbɑn sɔ̃nɑ Gusunɔ u ǹ yɑnde dere n gbi
sɑnɑm mɛ nɑ wɑ̃ɑ nɛn mɛron nukurɔ,
kpɑ nuku te, tu yɑnde ko nɛn sikiru,
kpɑ nɑ n wɑ̃ɑ mi sere kɑ tɛ̃.
18 Mbɑn sɔ̃nɑ nɑ yɑrɑ nɛn mɛron nukurun di,
nɑ kɑ sere wɑhɑlɑ yeni kɑ wɑsi wuriri bini wɑɑmɔ,
mɑ nɛn wɑ̃ɑrɑ wiru goorɑmɔ kɑ sekuru.

<- Yeremi 19Yeremi 21 ->