Languages
37
Diyosepa ana Eno Suwai
Aba Fatubu 37:1-8

1 Isako somo yai ena aba miya mate amainiya hinaga natuna Iyakobo* Isalaela hesana bwaꞌibwaꞌina mate Iyakobo na Guyau hesana falifalihuna ya tole: Isalaela. Aba Fatubu 32:28 ya miya, Kanana tanohina yai.

2 Nanatuna dededi doha ite:

Diyosepa mate hewali gubufwau, ena boliman 17 na ma afa haidana sipi sa itaꞌita watanidi. Afa haidana afa tinadi mate Bilaha yo Silipa,[b] tamana lalahuna haisa. In moho wasadi heyayana Diyosepa tamadi ena ya liba.

3 Fuyana yai Iyakobo mate Diyosepa ya fanuha wananahai habahim nanatuna tatau hahaisa, paꞌana ena tautaulaꞌi fuyana yai na natuna ni ya tubu. Be logena, ana luhuluhu uliꞌulina ya ginauli. 4 Fuyana haidana sa ita mate tamadi ya gadosisiyen wananahai, yo fede sa ꞌwaiyoꞌoꞌen, hige ti faꞌifaꞌiluwen yo hige ti liba komakoman lau lisina.

5 Fuya hesa, Diyosepa ya eno suwai, be fuyana haidana edi ya dede mate habahim sa ꞌwaiyoꞌoꞌen wanawananahai.

6 Ya falibadi iyen,

Agu eno suwai hola emi ya dede, 7 “Gabu yai witi pilipilinidi na hige walolona na egu pili ya obiyo dudulai, na umi emi pili sa obiyo fafataꞌiꞌili be sa dulu lidi lisina yai.”
 

8 Haidana sa faliba tiyen,

Em nuwatuhu bena um ema baꞌisa?! Yo bena wa ita watanimai?!
 
Ana eno suwai yo somo ya libaen lisina yai sa waiyoꞌo wananahaꞌen.
Diyosepa Afa haidana sa Uneꞌune Afulen
Aba Fatubu 37:12-36

12 Fuya hesa Diyosepa afa haidana tamadi ena sipi sa lawedi Sekem nuꞌuna sadaina yai sa faꞌanbandi. 13 Mulidi yai, Iyakobo ya libalau Diyosepa lisina, iyen,

Wa sibai afa haidam mate Sekem nuꞌuna sadaina yai sipi sa fafaꞌanbandi. Haba E fatamalim wa lau lebedi.
 
Diyosepa tamana alinana ya bui iyen,
Ya loholoho wananaha.
 

14 Yo fede Iyakobo ya libalau Diyosepa lisina iyen,

Afa haidam yo sipi u lau u itadi, sidohadi, haba wa fuyoma be wasadi egu wa liba.
 
Habahim Hebelon gonna yai ya fatamali ya lau.
Fuyanna Diyosepa ya mahano Sekem nuꞌuna yai, 15 mate ya fafalau gaibu na ya leu yo ya sai nuꞌuna yai. Taumoho hudoꞌi ya ita be ya fatiꞌoi, iyen,
Somo wa yoꞌoyoꞌoi?
 

16 Diyosepa taumoho wa alinana ya bui, iyen,

Haidagu E yoꞌoyoꞌoidi. Ibe wa falibagu iti somo yai sipi sa fafaꞌanbandi?
 

17 Taumoho wa iyen,

Amaiteꞌi na haꞌa sa lau. E atahi tiyen, “Te lau Dotan.”
 
Yo fede Diyosepa afa tuwahana ya lau watandi be ya lobahidi Dotan nuꞌuna sadaina yai.

18 Haidana eda lofalofa yai sa itaꞌita lau be sa ita. Hola hige i mahano lau lisidi na sa oilibaen bena haba sa wunui.

19 Ibodi sa oiꞌoiliba, tiyen,

Ma! Tau eno suwai ya laoma!
20 Au laoma ta wunui be ta lofe lidiyen ai hoꞌowa puluna hesa te haba tawa, “Suisui lululudi sa nali funuhi.” Haba ana eno suwai aniyona ya fawananaha, e higeꞌe?!
 

21 Fuyana Leubena ya atahiyen, mate haidana ya lau biliyedi, Iye,

Tabu ta wunui. 22 Tabu ꞌwasinana nimada yai i didi. Ai pulu pitapitalina te, ta lofe lidiyen, nuꞌu pitapitalina yai te. Na tabu nimamiu i talu ai hewana.
 
Leubena ya libalau haidana lisidi yai doha, paꞌana ena nuwatuhu mate, bena haba ya fofofahi be ya fafuyo tamadi lisina.

23 Fuyanna Diyosepa ya mahano lau mate, haidana ana luhuluhu uliꞌulina sa pwala fahi, 24 na sa bahei be sa lofe lidiyen pulu pitapitalina yai. Puluna mate afafana, hige hoꞌowa.

25 Habahim sa taꞌai be sa kalahe; na sa itaꞌita lau mate Midiyan dodogadi Isamaiyeli laulauwewena tau uneꞌune Gileyada yai sa laolaoma sa itadi. Edi kamela hewadi yai mate mulamula hahahana yo panepanedi sa husanidi na sa lau Idipi.

26 Hidadi Diuda ya liba iye,

Somo loholoho ainiya haba te abi, ibe tasida te wunui na ꞌwasinana te fui? 27 Au laoma ta uneꞌuneꞌen Midiyan dodogadi ai lisidi. Tabu ta wunui, in ꞌwasinada tefana.
 
Yo fede haidana wa hidadi ena nuwatuhu sa lau watan.

28 Yo fede, fuyanna Midiyan dodogadi sa mahanoma mate Diyosepa afa haidana pulu pitapitalina yai sa solu hitiyama be sa uneꞌuneꞌen siluba ouꞌoulina 20. Isamaiyeli dodogadi, Diyosepa sa une be sa lawen Idipi.[c]

29 Fuyana Leubena ya mahano fuyoma pulu pitapitalina ya ita, mate Diyosepa hige amainiya, yo fede ena kaleko ya ankam giginidi. 30 Ya fuyo be haidana ya falibadi iye,

Gwama hige amainiya! Haba somo E ginauli?
 

31 Habahim, haidana gouti sa wunui be ꞌwasinana yai Diyosepa ana leli sa dauꞌwai.

32 Leli uliꞌulina wa sa fafuyo tamadi lisina be sa liba, tiyen,

Leli te ꞌe lobahi, haga u ita komakomaniꞌi. Bena natum ana leli e higeꞌe?
 

33 Tamadi leli ya ita lobahi na ya liba, iyen,

Ii–, natugu ana leli! Nuwana suisui anꞌannalidi ti nali puliti!
 

34 Iyakobo ya nuwa heyaya be ena leli ya ankam pulitinidi na leli beyabeyadi ya liꞌodi. Natuna ya nuwa heyayaꞌen fuya lofalofa. 35 Nanatuna tatau yo wawahin nuwana bena sa faloholoho. In moho hige i fanuha. Ya liba iye,

Agu nuwa heyaya te haba ai lisigu sigana bee–, E peꞌi.
 

36 Diyosepa tau unena sa lawen Idipi be sa uneꞌuneꞌen Kin Falo ena tau paisowa, gati edi baꞌisa hesana Potifa lisina yai.

<- Aba Fatubu 36Aba Fatubu 38 ->