—Uꞌstes abꞌa y quiqui sajcan e bꞌiqꞌuit chijobꞌ xeꞌ satpobꞌ. Y qꞌueche chic incojt man tacaret, che e Quis.

4 Entonces locꞌoy ixin e Saúl, y numuy tama tunor or e witzir xeꞌ tuaꞌ uchꞌajnarir e Efraín y numuy tama e lugar Salisá, pero machi utajwi e bꞌiqꞌuit chijobꞌ. Y de allí numuy tama e lugar Saalim y tama e lugar xeꞌ tuaꞌ uchꞌajnarir e Benjamín, pero ma tiaꞌ utajwi e chijobꞌ. 5 Y conda cꞌotoyobꞌ tama e lugar Suf, e Saúl uyare e man xeꞌ war axana tacar y che:

—Ucꞌani tuaꞌ casutpa caxin esto tama cotot, porque bꞌajcꞌat war ubꞌijnu nitata más tamaron que tama e bꞌiqꞌuit chijobꞌ xeꞌ satpobꞌ, che e Saúl.

6 Entonces oꞌjron e man y che:

—Pues tama e chinam era ayan inteꞌ winic xeꞌ jax inteꞌ profeta tuaꞌ e Dios xeꞌ acꞌajna meyra umen e gente, cocha tunor lo que uchecsu axin alocꞌoy bꞌan taca cocha uchecsu. Incoꞌ cawiric. Pues bꞌajcꞌat axin uyareon tin e bꞌir tuaꞌ cawajpi tuaꞌ catajwi e bꞌiqꞌuit chijobꞌ, che e man.

7 Entonces ojron e Saúl y che:

—Incoꞌ pue. Pero ¿tucꞌa tuaꞌ caqꞌueche axin tuaꞌ cawajcꞌu e winic? Porque tunor e pan lo que qꞌuecher camener mix tucꞌa. Y matucꞌa ayan ticꞌabꞌa tuaꞌ cawajcꞌu e profeta, che e Saúl.

8 Entonces ojron e man y che:

—Pues nen qꞌuecher nimener inteꞌ ut tumin xeꞌ chembꞌir taca e plata. Cawajqꞌuic e winic tuaꞌ e Dios tuaꞌ uyareon tiaꞌ erer catajwi e bꞌiqꞌuit chijobꞌ, che e man.

9 (Pues tama e onian tiempo conda tin e tuobꞌ e Israel cꞌani uyubꞌiobꞌ inteꞌ ojroner tuaꞌ e Dios, chenobꞌ cocha era y che: “Cꞌani inxin umbꞌi taca e ajchꞌujcsiaj,” pero lo que caware non coner que jax inteꞌ profeta[a]. Pero ixnix e tiempo arobꞌna ani que tin e profeta jax inteꞌ ajchꞌujcsiaj.)

10 Entonces ojron e Saúl y che:

—Bueno yaꞌ. Incoꞌ, che Saúl.

Entonces chatertiobꞌ ixiobꞌ esto tama e chinam tiaꞌ turu e profeta. 11 Y conda war atꞌabꞌay axiobꞌ tut e witzir tuaꞌ acꞌotoy tama e chinam, utajwi ubꞌobꞌ taca cora ijchꞌoctac xeꞌ war axin tuaꞌ ubꞌutꞌiobꞌ e jaꞌ. Entonces ojronobꞌ e Saúl y uman y chenobꞌ:

—¿Tara ca tiaꞌ erer catajwi e ajchꞌujcsiaj? chenobꞌ.

12 Entonces ojronobꞌ e ijchꞌoctac y chenobꞌ:

—Bꞌan yaꞌ, pero aquetpa más bꞌat bꞌana tama uyocher e chinam, cocha wartocto ayopa tuaꞌ uchamse inteꞌ arac tut Cawinquirar Dios tujor e witzir. 13 Quiquic wacchetaca tuaꞌ itajwi bꞌajxan que axin tuaꞌ aweꞌ. Pues mamajchi tuaꞌ aweꞌ este que acꞌotoy jaxir tuaꞌ uchojbꞌes e comida, y de allí axin awiobꞌ tin e pejcbꞌirobꞌ, chenobꞌ e ijchꞌoctacobꞌ.

14 Entonces e Saúl taca uman cayto xanobꞌ tut e witzir tuaꞌ acꞌotoyobꞌ tama e chinam. Y conda wartocto acꞌotoyobꞌ tama uyocher e chinam, utajwi ubꞌobꞌ taca e Samuel que war alocꞌoy tuaꞌ axin esto tujor e witzir tiaꞌ tuaꞌ achamesna e arac.

15 Pues e día bꞌajxan que e Saúl utajwi ubꞌa taca e Samuel, Cawinquirar Dios cay uchectes inteꞌ ojroner tut e Samuel y che: 16 “Pues ejcꞌar tama e hora cocha era cꞌani inwebꞌta watar toit inteꞌ winic xeꞌ ajlugar tama e departamento Benjamín. Pues jax e winic era xeꞌ tuaꞌ ache ungir tuaꞌ aquetpa rey tujor nichinam Israel. Pues jaxir tuaꞌ ucorpes nichinam tama ucꞌabꞌ tin e tuobꞌ uchꞌajnarir e Filisti, cocha nen incꞌun niwirnar tut nichinam y war umbꞌi lo que war ucꞌajtiobꞌ tacaren que war atzꞌintzꞌobꞌ yebꞌar ucꞌabꞌ tin e tuobꞌ uchꞌajnarir e Filisti,” che Cawinquirar Dios uyare e Samuel tama umayjut.

17 Pues conda e Samuel uwira e Saúl, ojron Cawinquirar Dios tacar y che: “Jax era e winic xeꞌ cay inwaret tamar acbꞌi. Pues jax jaxir xeꞌ tuaꞌ acꞌotori tujor nichinam Israel,” che Cawinquirar Dios uyare e Samuel.

18 Entonces conda war acꞌotoy e Saúl tama uyocher e chinam, utajwi ubꞌa taca e Samuel y che:

—¿Erer ca awaren tiaꞌ aquetpa uyotot e winic xeꞌ ajchꞌujcsiaj xeꞌ aquetpa chequer tut lo que tuaꞌ anumuy? che e Saúl.

19 Entonces ojron e Samuel y che:

—Pues nen jax e winic xeꞌ ajchꞌujcsiajen xeꞌ aquetpa chequer taniut lo que tuaꞌ anumuy. Quiqui bꞌajxan tichan esto tiaꞌ tuaꞌ cojytzꞌi ut e Dios, y yaꞌ yajaꞌ tuaꞌ iweꞌ tacaren. Y ejcꞌar conda asacojpa cꞌani inwaret tunor lo que cꞌani oybꞌi tacaren, y de allí uyubꞌi iꞌxin. 20 Y tama e bꞌiqꞌuit chijobꞌ xeꞌ satpobꞌ tama uxteꞌ día, machi ixto tuaꞌ abꞌijnu tamarobꞌ cocha tajwinobꞌix. Pero cꞌani inwaret que tunor tin e tuobꞌ e Israel bꞌan cocha tin e turobꞌ tama uyotot atata war uyusreobꞌ que net tuaꞌ iquetpa rey tama e Israel, che e Samuel.

21 Entonces ojron e Saúl y che:

—Pues nen ma tawaren tuaꞌ inquetpa rey tama e Israel cocha nen chꞌajnariren tuaꞌ e Benjamín xeꞌ jax e chꞌajnarir xeꞌ más chuchu tama tunor e Israel, y nifamilia jax xeꞌ más matucꞌa lo que ayan tacaron tama tunor tin e turobꞌ tama uchꞌajnarir e Benjamín. Entonces ¿tucꞌa tar war awaren cocha era? che e Saúl.

22 Entonces e Samuel uqꞌueche ixin e Saúl taca uman esto tiaꞌ tuaꞌ awiobꞌ, y uturbꞌa tuaꞌ aturuan tujor e mesa tiaꞌ tuaꞌ atajttzꞌa umen e treinta winicobꞌ xeꞌ más nojta ucꞌampibꞌirobꞌ xeꞌ pejcbꞌirobꞌ tama e wiar. 23 Y de allí e Samuel uyare tin e war apatna tama e cocina y che:

—Pues e wer xeꞌ inwajqꞌuet sajmi xeꞌ más incꞌun xeꞌ inwaret tuaꞌ achꞌujbꞌa, tares era y ajcꞌun e winic xeꞌ turu tujor e mesa, che e Samuel.

24 Entonces tin e war apatna tama e cocina ulocse intertiꞌ ut uyaꞌ e arac y uwabꞌu tut e Saúl. Y che e Samuel:

—Tara war e wer xeꞌ inchꞌujbꞌa tabꞌa. Chꞌama y cꞌuxu. Pues cay inchꞌujbꞌa e wer era tuaꞌ aquetpa tabꞌa conda merato impejca e inmojr winicobꞌ tuaꞌ acꞌotoyobꞌ tama e wiar. Pues bꞌan cocha era que e Saúl cꞌotoy weꞌ taca e Samuel tama e día era.

25 Y conda ecmayobꞌ tama e lugar tiaꞌ uyujtzꞌiobꞌ ut Cawinquirar Dios tuaꞌ axiobꞌ esto tama e chinam, tꞌabꞌay ixin e Samuel esto tujor e otot tiaꞌ cꞌatar ut y cay uyustes tiaꞌ tuaꞌ awayan e Saúl. 26 Y yajaꞌ taca quetpa e Saúl tuaꞌ awayan. Y conda sacojpa tama inteꞌ día e Samuel upejca e Saúl tiaꞌ chꞌar y che:

—Achpen. Cꞌotix e hora tuaꞌ iꞌxin esto tama oꞌtot, che e Samuel.

Entonces achpa e Saúl y locꞌoy tama e otot taca e Samuel. 27 Y conda cꞌotoyobꞌ esto tuyocher e chinam, cay ojron e Samuel taca e Saúl y che:

—Tzacren chic aman bꞌajxan, pero net quetpento tara tacaren. Pues ayanto más ojroner xeꞌ inchꞌami tuaꞌ e Dios que ucꞌani tuaꞌ inwaret, che e Samuel.

<- 1 Samuel 81 Samuel 10 ->