—Cornelio, che e ángel.

4 Y e Cornelio intaca quetpa wawan war uchꞌujcu uwira ut e ángel, war abꞌacta. Y jaxir uyubꞌi tuaꞌ e ángel y che:

—¿Tucꞌa acꞌani, niwinquiret? che e Cornelio.

Entonces ojron e ángel otronyajr y che:

—Pues cꞌar umen e Dios que war acꞌajti tacar y que war atacre tin e tzajtaca ut iraj iraj, y tunor era atzay eꞌrna umen e Dios. 5 Y era tzacren chic cora winicobꞌ esto tama e chinam Jope tuaꞌ upejcobꞌ inteꞌ winic xeꞌ ucꞌabꞌa Simón xeꞌ arobꞌna Pedro ubꞌan. 6 Pues cꞌani itajwi e Pedro era tama uyotot inteꞌ winic xeꞌ ucꞌabꞌa Simón xeꞌ jax inteꞌ xeꞌ unata apatna tama e qꞌuewer. Y uyotot e Simón era aquetpa tutiꞌ e nuxi jaꞌ. Bꞌan che e ángel uyare e Cornelio.

7 Entonces conda cꞌapa locꞌoy e ángel xeꞌ war oꞌjron taca e Cornelio, jaxir ixin upejca chateꞌ uman. Y upejca inteꞌ ajtzꞌojyir tuaꞌ ubꞌan xeꞌ jax inteꞌ winic xeꞌ uyusre uche lo que ucꞌani e Dios. 8 Y e Cornelio cay uyare tunor lo que numuy tacar, y de allí utzacre ixiobꞌ esto tama e chinam Jope tuaꞌ usicbꞌobꞌ e Pedro tuaꞌ utaresobꞌ.

9 Entonces tama uyuxin e día tama otronteꞌ día warto axanobꞌ e manobꞌ era taca e ajtzꞌojyir tuaꞌ ayopobꞌ tama e chinam Jope, y jax e hora era ubꞌan conda e Pedro cay tꞌabꞌay ixin tichan tujor uyotot tuaꞌ ucꞌajti taca e Dios. 10 Y cocha eixna turu tichan war ucꞌajti taca e Dios, cay jaytzꞌa, y tamar era uyare e gente tama e otot tuaꞌ uyustes e comida. Pero jaxir quetpa tichan war ucojco este que oꞌstana tunor e comida, conda checta inteꞌ umayjut. 11 Y tama umayjut uwira que pasar ut e qꞌuin y que war ecmay watar lo que lar uwirnar cocha inteꞌ nuxi sacsac bꞌujc xeꞌ cachar inteꞌ inteꞌ upunto taca e lazo. Y war emsena watar taca e lazo esto tut e qꞌuin. 12 Y tama e nuxi sacsac bꞌujc ayan meyra animalobꞌ xeꞌ intiachix ucꞌabꞌobꞌ. Y ayan xeꞌ chanteꞌ uyocobꞌ y ayan lo que bꞌan uwirnar cocha e chan y ayan xeꞌ bꞌan uwirnar cocha e ajpat y ayan meyra mut xeꞌ majax intera ucꞌabꞌobꞌ. 13 Y e Pedro uyubꞌi inteꞌ nuc xeꞌ ojron y che:

—Pedro, achpen, chamsen inteꞌ animal y cꞌuxu, che e nuc xeꞌ tari tama umayjut era.

14 Pero ojron e Pedro y che:

—Machi Niwinquiraret, porque nen ma inyajr cꞌotoyen incꞌuxi lo que mabꞌambꞌan bꞌan cocha che tama uley e Moisés, che e Pedro.

15 Entonces ojron e nuc era otronyajr y che:

—Pues lo que arobꞌna umen e Dios que imbꞌutz, ira aware net que mabꞌambꞌan, che e nuc tama umayjut.

16 Y bꞌan arobꞌna e Pedro tama uxyajr umen e nuc tama umayjut que ucꞌani tuaꞌ ucꞌuxi lo que ayan tama e nuxi sacsac bꞌujc, pero e Pedro sutpa uyare e nuc otronyajr que machix tuaꞌ ucꞌuxi porque ma inyajr cꞌotoy ucꞌuxi lo que mabꞌambꞌan bꞌan cocha che tama uley e Moisés. Y de allí sutpa qꞌuejcha ixin tichan e nuxi sacsac bꞌujc esto tut e qꞌuin. 17 Entonces e Pedro quetpa tujor e otot y warto ubꞌijnu tamar umayjut y tamar lo que war che tunor era, conda wacchetaca yopobꞌ e winicobꞌ xeꞌ eꞌbꞌetnobꞌ ixin umen e Cornelio, y war uyubꞌiobꞌ tuaꞌ e gente tiaꞌ aquetpa uyotot e Simón y era yaꞌ cꞌotoy wawanobꞌ tut upuertir uyotot e Simón. 18 Y jaxirobꞌ upejcobꞌ taca inteꞌ nuxi nuc desde tut e puerta y che:

—O ¿yaꞌ ca turu inteꞌ winic tama e otot era xeꞌ ucꞌabꞌa Simón xeꞌ arobꞌna Pedro ubꞌan? che e winicobꞌ era.

19 Pero e Pedro turu tichan tujor e otot y tamar era machi uyubꞌi lo que arobꞌna umen e winicobꞌ ejmar. Entonces Unawalir e Dios uyare e Pedro cocha era y che:

—Pedro, ayan uxteꞌ winicobꞌ ejmar xeꞌ war usicbꞌetobꞌ. 20 Achpen y ecmen quiqui tacarobꞌ tiaꞌ cꞌani uqꞌuechietobꞌ iꞌxin. Ira ibꞌacta porque jax nen xeꞌ intzacre tariobꞌ, che Unawalir e Dios.

21 Entonces ecmay e Pedro y ixin tut e winicobꞌ xeꞌ tzacarna tariobꞌ umen e Cornelio y uyare cocha era y che:

—Pues jax nen e winic xeꞌ war isicbꞌa. Y ¿tucꞌa tuaꞌ que war isicbꞌen? che e Pedro.

22 Entonces ojronobꞌ e winicobꞌ era y chenobꞌ:

—Pues non era tarion umen que tzacarnon tarion umen e Cornelio xeꞌ jax inteꞌ capitán tuaꞌ cora ajtzꞌojyirobꞌ. Pues jaxir jax inteꞌ winic xeꞌ erach y xeꞌ uyujtzꞌi ut e Dios. Y jaxir jax inteꞌ winic xeꞌ war abꞌacꞌajrna y xeꞌ war acꞌajna umen tunor tin e tuobꞌ e Israel. Y checta inteꞌ ángel tut y cay arobꞌna tuaꞌ usicbꞌet tuaꞌ iyopa tama uyotot, y que jaxir ucꞌani tuaꞌ uyubꞌi tunor lo que cꞌani aware, che e winicobꞌ era.

23 Entonces e Pedro ojron y che:

—Ochenic macu, turenic tacaren y tara tuaꞌ ixwayan tama e acbꞌar era. Y ejcꞌar inxin tacarox, che e Pedro.

Y tama otronteꞌ día bꞌan uche e Pedro. Y ayan cora ajcꞌubꞌesiajobꞌ tama e Cristo xeꞌ turuanobꞌ tama e chinam Jope xeꞌ ixiobꞌ tacarobꞌ ubꞌan.

24 Entonces cꞌotoyobꞌ tama e chateꞌ día era esto tama e chinam Cesarea. Y yaꞌ turu e Cornelio tama uyotot war ucojco uyopar e Pedro. Y yix turobꞌ cora upiarobꞌ e Cornelio y cora gente tin e atzay uwira ubꞌobꞌ tacar. 25 Y conda yopa e Pedro tama uyotot e Cornelio, jaxir locꞌoy tuaꞌ uyose macu. Y conda uwira que jax e Pedro cotuan tut y cay uyujtzꞌi ut. 26 Pero e Pedro uchuqui ucꞌabꞌ e Cornelio tuaꞌ ujachi y che:

—Ira icotuan ojytzꞌi niut. Achpen waren, porque nen winiquen bꞌan cocha net, che e Pedro.

27 Y warto oꞌjronobꞌ conda ochoyobꞌ macuir e otot. Y conda e Pedro cꞌotoy macu, uwira que ayan e sian gente xeꞌ morojsebꞌir turobꞌ tuaꞌ uyubꞌiobꞌ lo que tuaꞌ aꞌrobꞌnobꞌ umener. 28 Entonces cay ojron jaxir y che:

—Pues nox war inata que inteꞌ xeꞌ tuaꞌ e Israel machi uyubꞌi oꞌchoy aturuan tujam e gente xeꞌ majax tuobꞌ e Israel, y nien machi ani tuaꞌ cawarajse e gente cocha nox. Pero e Dios cay uwirsen que ma erer inware nien tama inteꞌ winic que bꞌonem uyalma y ma erer inware nien que matucꞌa ucꞌampibꞌir. 29 Y tamar era conda tzacarna ixin cora winicobꞌ tuaꞌ usicbꞌen utaresenobꞌ, tarien wacchetaca porque bꞌan uyaren e Dios tuaꞌ inche. Pero era cꞌani ani innata, ¿tucꞌa tuaꞌ iwebꞌta ixin e winicobꞌ era tuaꞌ utaresenobꞌ? Y ¿tucꞌa icꞌani tuaꞌ inche era? che e Pedro.

30 Entonces ojron e Cornelio y che:

—Pues uxiꞌ era bꞌan cocha tama e hora era nen turen tama niotot, y machi war inweꞌ tuaꞌ incꞌajti taca e Dios conda wacchetaca checta inteꞌ winic xeꞌ ejpray ut ubꞌujc xeꞌ yopa wawan taniut. 31 Jaxir uyaren cocha era y che: “Cornelio, Cadiosir uyubꞌix tunor lo que cay acꞌajti tacar, y jaxir war uwira y war ucꞌajpes tunor lo que cay ache tuaꞌ atacre tin e matucꞌa ayan tacar. 32 Tzacren chic cora winicobꞌ tuaꞌ usicbꞌobꞌ utaresobꞌ inteꞌ winic xeꞌ ucꞌabꞌa Pedro xeꞌ turu tama uyotot inteꞌ winic xeꞌ ucꞌabꞌa Simón xeꞌ jax xeꞌ unata apatna tama e qꞌuewer. Jaxir turu tama e chinam Jope y uyotot aquetpa tutiꞌ e nuxi jaꞌ. Y conda axin watar e Pedro era, ubꞌin tunor lo que axin uyaret.” Bꞌan uyaren e ángel tama nimayjut. 33 Y tamar era inwebꞌta ixin cora winicobꞌ tuaꞌ usicbꞌetobꞌ y utaresetobꞌ, y era cꞌani inwaret que bueno que tariet wacchetaca. Pero era tara turon tunoron tut e Dios, cꞌani coybꞌi tunor lo que Cawinquirar war uturbꞌa tama awalma tuaꞌ awareon. Bꞌan che e Cornelio uyare e Pedro.

—Pues coner erer innata que e Dios machi ubꞌijnu jay jax taca e gente tama e Israel xeꞌ ayan ucꞌampibꞌirobꞌ. 35 Porque Cadiosir war uyajta ut e winicobꞌ tama tunor or e rum tin e war acꞌubꞌseyanobꞌ tut y tin e war uchiobꞌ lo que imbꞌutz. 36 Pues e Dios cay uyare tunor umaxtacobꞌ e Israel tunor e ojroner xeꞌ galan tuaꞌ e jiriar lo que ayan tama Cawinquirar Jesucristo, y que jaxir jax xeꞌ aquetpa Ajwinquirar tuaꞌ tunor. 37 Y nox era inata tamar lo que cay numuy tama e lugar Israel conda cꞌapa chꞌuyma e Juan, y conda cꞌapa uchecsu uyojroner e Dios jaxir. Y inata cocha checsuna ixin uyojroner Cawinquirar Jesucristo tama tunor e departamento Galilea, y de allí cocha checsuna ixin tunor e ojroner era tama tunor or e lugar Israel. 38 Y war inata tamar e Jesús xeꞌ tuaꞌ e chinam Nazaret, y que e Dios uyajcꞌu ucꞌotorer conda uyajcꞌu Unawalir. Y war inata que e Jesús ixin tic taca war uche lo que imbꞌutz, y que war utzꞌacpes e gente axin xeꞌ war unumse ubꞌobꞌ yebꞌar ucꞌotorer e Satanás. Y bꞌan cay uche umen taca que turu e Dios tacar. 39 Y non taca e hermanuobꞌ era ajchecsuyajon tama tunor lo que uche e Jesús tama e departamento Judea y tama e chinam Jerusalem. Pero tin e ajcꞌotorerobꞌ tama e chinam Jerusalem ixin uchamsiobꞌ e Jesús conda uchꞌubꞌobꞌ tut inteꞌ cruz y uyactobꞌ chamay tamar. 40 Pero Cadiosir usuti ubꞌixqꞌues e Jesús tujam e chamenobꞌ tama e uxteꞌ día, y de allí uyajcꞌu e Jesús tuaꞌ uchectes ubꞌa ticoit non. 41 Pero machi uchectes ubꞌa tut tunor e gente sino que ticoit taca non xeꞌ ajchecsuyajon xeꞌ sicbꞌabꞌironix umen e Dios. Y non wion tacar, y uchꞌion tacar conda cꞌapa sujta bꞌixqꞌuesna tujam e chamenobꞌ. 42 Y jaxir uyareon que ucꞌani tuaꞌ caxin cachecsu uyojroner e Dios tut tunor e gente, y que ucꞌani tuaꞌ cachecsu tutobꞌ que jax taca jaxir xeꞌ pejcna umen e Dios tuaꞌ aquetpa juez tuaꞌ tunor tin e bꞌixir y tuaꞌ tunor tin e chamen ubꞌan. 43 Y tunor e profetobꞌ tama e onian tiempo cay utzꞌijbꞌa uyactobꞌ que tunor tin e axin acꞌubꞌseyanobꞌ tama e Jesús cꞌani acorpesnobꞌ tama tunor umabꞌambꞌanirobꞌ umen que ayan e cꞌotorer tama ucꞌabꞌa e Jesús. Bꞌan che e Pedro uyare e Cornelio taca tunor tin e turobꞌ tama uyotot.

—Y ¿tucꞌa tuaꞌ que machi cachꞌuyi e gente era taca e jaꞌ cocha jaxirobꞌ uchꞌamiobꞌ Unawalir e Dios bꞌan cocha non? che e Pedro.

48 Entonces e Pedro uyare tuaꞌ achꞌujyobꞌ tunor e gente era tama ucꞌabꞌa e Jesucristo. Y conda cꞌapa chꞌujyobꞌ, tunor e gente cay upejcobꞌ e Pedro tuaꞌ aquetpa tacarobꞌ cora día tuaꞌ uyubꞌiobꞌ más tamar e Dios.

<- Hechos 9Hechos 11 ->