—Iran coit, che e Pedro.

5 Entonces e winic cay uwira utobꞌ war ubꞌijnu que ayan lo que cꞌani aꞌjcꞌuna umenerobꞌ. 6 Pero ojron e Pedro y che:

—Nen matucꞌa niplata y matucꞌa niworo, pero lo que ayan tacaren inwajqꞌuet. Tama ucꞌabꞌa e Jesucristo xeꞌ tuaꞌ e chinam Nazaret inwaret: Achpen, waren, y xanen, che e Pedro.

7 Entonces e Pedro uchuqui unojcꞌabꞌ e winic tuaꞌ utꞌabꞌse, y wacchetaca qꞌuecꞌo uyoc y qꞌuecꞌo ixin tunor unuc uyoc. 8 Y tamar era tobꞌoy achpa e winic y war awawan tamar uyoc y cay xana. Y ochoy macuir e templo taca e Pedro y e Juan. War axana, y war atobꞌoy axin, y war utattzꞌi ucꞌabꞌa e Dios. 9 Y tunor e gente uwirobꞌ que war axana e winic y que war utattzꞌi ucꞌabꞌa e Dios. 10 Y conda e gente sutpa uwirobꞌ e winic era, unatobꞌ que jaxir jax xeꞌ aturuan ani tuyejtzꞌer e puerta tuaꞌ e templo xeꞌ ucꞌabꞌa Galan, y que jax xeꞌ tzꞌej ani uyoc y que era axana ixto yaꞌ. Entonces bꞌactobꞌ uwirobꞌ lo que numuy tama e winic.

—Winicox xeꞌ tuox e Israel, ¿tucꞌa tuaꞌ que war ixbꞌacta iwira lo que numuy taca e winic era? Y ¿tucꞌa tuaꞌ que war ichꞌujcu iwiron cocha era? O ¿war ca ibꞌijnu que non catzꞌacpes e winic era umen que non ayan cacꞌotorer xeꞌ ticabꞌach o umen que non más imbꞌutzon tut e Dios? Pero majax bꞌan cocha war ibꞌijnu. 13 Pues Cadiosir xeꞌ jax Udiosirobꞌ catata viejobꞌirobꞌ xeꞌ jax e Abraham y e Isaac y e Jacob, jax Cadiosir era xeꞌ ixin utattzꞌi más nojta Uyunen xeꞌ jax e Jesús. Y e Jesús jax tin e xejbꞌebꞌir ut nojta imener este que iwajcꞌu tama ucꞌabꞌ e ajcꞌamparobꞌ tuaꞌ uqꞌuechiobꞌ axin cachbꞌir. Y de allí ichecsu que ixejbꞌe ut jaxir tut e Pilato ubꞌan, porque conda cꞌanix abꞌajna umen e Pilato, nox machi icꞌani. 14 Y nox isuti ipat tut jaxir xeꞌ erach y xeꞌ matucꞌa war uche, y cay icꞌajti taca e Pilato tuaꞌ uyacta alocꞌoy tama e cárcel inteꞌ ajchamseyaj xeꞌ calapir uwirnar. 15 Y tamar era chequer que jax nox xeꞌ ixiox ichamse e Jesús xeꞌ tari tuaꞌ uyajcꞌu e cuxtar xeꞌ machi tuaꞌ acꞌapa. Pero e Dios ixin usuti ubꞌixqꞌues e Jesús tujam e chamenobꞌ, y jax non xeꞌ ajchecsuyajon tama tunor era. 16 Pues tamar e cꞌubꞌesiaj tama ucꞌabꞌa e Jesús qꞌuecꞌojsena inyajrer e winic era xeꞌ war iwira y xeꞌ natanwa imener tuaꞌ uyubꞌi axana. Pues jax e cꞌubꞌesiaj tama ucꞌabꞌa e Jesús xeꞌ uche aquetpa tzꞌacpesbꞌir e winic era bꞌan cocha war iwira tunorox.

17 ’Pero niwermanuox, chequer taniut era que machix war inata tucꞌa war iche, nien nox, y nien tin e ajcꞌotorerobꞌ tibꞌa conda ixiox ichamse e Jesús. 18 Pues Cadiosir cꞌapa uche bꞌan taca cocha chꞌar tzꞌijbꞌabꞌir umen e profetobꞌ xeꞌ turuanobꞌ tama e onian tiempo que e Cristo aquetpa tuaꞌ unumse ubꞌa meyra conda acꞌotoy aturuan tara tor e rum. 19 Y tamar era ucꞌani tuaꞌ iwacta tunor imabꞌambꞌanir y ucꞌani tuaꞌ isuti tunor ibꞌijnusiaj tuaꞌ uyubꞌiox ixxana tama ubꞌir e Dios. Jay bꞌan iche entonces Cawinquirar Dios axin ucorpesox tama tunor imabꞌambꞌanir y axin uyebꞌta watar inteꞌ nuxi chojbꞌesiaj tama iwalma. 20 Y de allí Cadiosir cꞌani uyebꞌta watar e Jesús tibꞌa otronyajr xeꞌ jax xeꞌ sicbꞌabꞌir bꞌajxan umen e Dios tuaꞌ aquetpa e Cristo tibꞌa. 21 Pero tama e tiempo era jaxir ucꞌani tuaꞌ aquetpa tut e qꞌuin tichan este que acꞌotoy e hora conda Cadiosir acꞌapa uyustes tunor lo que ayan, bꞌan cocha chꞌar tzꞌijbꞌabꞌir tama uyojroner e Dios umen e profetobꞌ xeꞌ erachobꞌ tama e onian tiempo. 22 Y bꞌan che e Moisés ubꞌan conda che que: “Cawinquirar Dios cꞌani uyebꞌta watar otronteꞌ profeta tibꞌa, bꞌan cocha uyebꞌta tarien nen”, che e Moisés. “Ubꞌinic tunor lo que axin uyareox jaxir[a]. 23 Porque tunor tin e machi obꞌian tut e profeta era cꞌani aloqꞌuesna tujam umaxtacobꞌ e Dios.” Bꞌan chꞌar tzꞌijbꞌabꞌir tama uyojroner e Dios umen e Moisés tama e onian tiempo.

24 ’Pues tunor tin e profetobꞌ tama e onian tiempo desde e Samuel y nacpat xeꞌ war uchꞌamiobꞌ inteꞌ ojroner tuaꞌ e Dios, cay ojronobꞌ tunorobꞌ tama e día era conda aquetpa tuaꞌ achecta e Cristo. 25 Pues nox quetpa tuaꞌ ichꞌami lo que actana umen e profetobꞌ xeꞌ turuanobꞌ tama e onian tiempo, y quetpa ubꞌan tuaꞌ ichꞌami e pacto xeꞌ chembꞌir umen e Dios taca catata viejobꞌirobꞌ conda uyare e Abraham y che: “Tunor e sian familiobꞌ tama tunor or e rum cꞌani achojbꞌesnobꞌ umen inteꞌ sitzbꞌir tama achꞌajnarir.[b]” Bꞌan chꞌar tzꞌijbꞌabꞌir tama uyojroner e Dios. 26 Y tamar era conda usuti ubꞌixqꞌues Cawinquirar Jesucristo tujam e chamenobꞌ, Cadiosir uyebꞌta ixin tuaꞌ uchojbꞌesox nox bꞌajxan tuaꞌ ixixin iwacta tunor imabꞌambꞌanir inteꞌ intiox. Bꞌan che e Pedro uyare e sian gente xeꞌ wawanobꞌ tut tama inteꞌ corredor tama e templo.

<- Hechos 2Hechos 4 ->