—Ananías ¿tucꞌa tuaꞌ awacta ochoy e Satanás tama awalma tuaꞌ uchiet amajres Unawalir e Dios conda ixiet aquete imbꞌijc e tumin lo que cay achꞌami conda achoni arum? 4 ¿Ma ca jax tabꞌa ani e rum era? Y conda ixiet achoni e rum, ¿ma ca jax tabꞌa e tumin? ¿Tucꞌa tuaꞌ que abꞌijnu ache cocha era? Majax e winicobꞌ xeꞌ war aturbꞌa abꞌa tuaꞌ amajres sino que jax e Dios xeꞌ cꞌani ani amajres, che e Pedro.

5 Entonces conda cꞌapa uyubꞌi tunor e ojroner era, cucrema chamay e Ananías. Y tunor tin e cꞌotoy unatobꞌ lo que numuy taca e Ananías bꞌacta uwirobꞌ. 6 Entonces yopobꞌ cora chꞌom tejromtac xeꞌ ubꞌasiobꞌ ucuerpo e chamen era taca inteꞌ bꞌujc, y uqꞌuechiobꞌ ixin y umuquiobꞌ.

7 Pues conda numuy uxteꞌ hora, yopa uwixcar e Ananías, pero machi unata tucꞌa numuy taca unoxibꞌ. 8 Entonces ojron e Pedro taca e Safira y che:

—Arenen, ¿erachox ca que nox ichoni e rum tama e tumin era lo que war iwareon? che e Pedro.

Y jaxir che:

—Bꞌan pue yaꞌ, jax e tumin yax, che e ixic.

9 Entonces ojron e Pedro y che:

—¿Tucꞌa tuaꞌ que ibꞌijnu tuaꞌ iturbꞌa ibꞌa tuaꞌ ipijchꞌi ani Unawalir e Dios? Yajaꞌ patir yix warobꞌ cora chꞌom maxtacobꞌ xeꞌ uqꞌuechiobꞌ ixin anoxibꞌ tuaꞌ umuquiobꞌ. Y era watobꞌ tuaꞌ uqꞌuechietobꞌ iꞌxin tuaꞌ asutpa umuquietobꞌ net ubꞌan, che e Pedro.

10 Entonces wacchetaca cucrema chamay e ixic tama unuc uyoc e Pedro. Y conda ochoyobꞌ e chꞌom maxtacobꞌ uwirobꞌ que chamay e ixic. Entonces ulocsiobꞌ ucuerpo y umuquiobꞌ tuyejtzꞌer unoxibꞌ. 11 Y tunor e gente tama e grupo ajcꞌubꞌesiajobꞌ tama e Jesús y tunor e inmojr gente xeꞌ cꞌotoy unatobꞌ lo que numuy era, bꞌactobꞌ meyra conda uyubꞌiobꞌ.

Pero tama e hora era war umorojse ubꞌobꞌ tunor tin e turobꞌ tama e concilio xeꞌ jax uwinquir e inmojr sacerdotiobꞌ taca tin e atzay uwirobꞌ ut y taca tunor e nuquir winicobꞌ tama e Israel. Y tamar era uyebꞌtobꞌ ixin tuaꞌ ataresnobꞌ e apostolobꞌ tama e cárcel. 22 Pero conda cꞌotoyobꞌ tama e cárcel, tin e ebꞌetnobꞌ ixin tuaꞌ utaresobꞌ e apostolobꞌ, uwirobꞌ que ma incojt apóstol turu macuir e cárcel. Entonces sutpa ixiobꞌ tut e concilio otronyajr 23 y chenobꞌ:

—Ixion tama e cárcel bꞌan cocha iwareon y conda cꞌotoyon cawira que warobꞌ cora policía xeꞌ war ucojcobꞌ e puerta, y cawira que cachar e puerta taca e candado, pero conda upasiobꞌ e puerta mix majchi ayan macuir e cárcel, chenobꞌ tin e ebꞌetna ixiobꞌ tuaꞌ utares e apostolobꞌ.

24 Entonces bꞌacta uwirobꞌ uwinquir e inmojr sacerdotiobꞌ y e capitán tuaꞌ e guardia tuaꞌ e templo y cora nuquir sacerdote conda uyubꞌiobꞌ tunor era y cay ubꞌijnuobꞌ que esto tiaꞌ tuaꞌ acꞌotoy acꞌapa tunor e canseyaj era. 25 Pero wacchetaca yopa inteꞌ winic xeꞌ ojron y che:

—E winicobꞌ xeꞌ iturbꞌa tama e cárcel acbꞌi yix turobꞌ otronyajr tama e templo war ucansiobꞌ e gente, che e winic era.

26 Entonces tin e más nuxi policía upejca cora policía y ixin tuaꞌ utaresobꞌ e apostolobꞌ tuaꞌ acꞌotoyobꞌ tut e nuquir winicobꞌ era otronyajr. Pero machi ucachiobꞌ y machi uquerejbꞌobꞌ e apostolobꞌ umen que war abꞌactobꞌ que bꞌajcꞌat aqꞌuijnobꞌ e gente este que bꞌajcꞌat ajujrobꞌ e policía taca e tun tuaꞌ uchamsiobꞌ. 27 Entonces conda cꞌapa utaresobꞌ e apostolobꞌ otronyajr, uyareobꞌ tuaꞌ awawanobꞌ tut e nuquir winicobꞌ. Entonces ojron uwinquir e inmojr sacerdotiobꞌ y che:

28 —¿Machi ca cawareox que ira ixcanseyan más tama ucꞌabꞌa e Jesús? Y era ¿tucꞌa war iche? War ibꞌutꞌi tunor e chinam Jerusalem taca e canseyaj era, y war iturbꞌa ibꞌa tuaꞌ iche acꞌaxi ticajor non tunor uchamer e Jesús, che uwinquir e inmojr sacerdotiobꞌ.

29 Entonces ojron e Pedro y e inmojr apostolobꞌ y chenobꞌ:

—Machix tuaꞌ cacꞌubꞌseyan tut inteꞌ winic jay majax bꞌan cocha ucꞌani e Dios. 30 Pues Cadiosir xeꞌ tuaꞌ catata viejobꞌirobꞌ ubꞌan ixin usuti ubꞌixqꞌues e Jesús tujam e chamenobꞌ. Y jax jaxir xeꞌ cꞌapa ichamse conda ichꞌubꞌa tut inteꞌ cruz. 31 Pues Cadiosir ixin utꞌabꞌse e Jesús tuaꞌ aquetpa tuyejtzꞌer unojcꞌabꞌ tut e qꞌuin, y uche aquetpa Cawajcꞌotorer y Cawajcorpesiaj tuaꞌ upasi e bꞌir tut e gente tama e Israel tuaꞌ uyubꞌiobꞌ uyustes ubꞌobꞌ y tuaꞌ acorpesnobꞌ tama tunor umabꞌambꞌanirobꞌ. 32 Y non era ajchecsuyajon tama tunor era y bꞌan ubꞌan Unawalir e Dios. Y Cadiosir war uyajcꞌu Unawalir tunor tin e war acꞌubꞌseyanobꞌ tut jaxir. Bꞌan che e Pedro y e inmojr apostolobꞌ.

33 Pues conda e nuquir winicobꞌ tama e Israel uyubꞌiobꞌ tunor era, qꞌuijnobꞌ meyra y cꞌani ani uchamsiobꞌ. 34 Pero tujam e nuquir winicobꞌ era ayan inteꞌ winic xeꞌ jax inteꞌ fariseo xeꞌ ucꞌabꞌa Gamaliel xeꞌ jax inteꞌ ajcanseyaj tama uley e Moisés xeꞌ obꞌna meyra umen e gente. Jaxir achpa wawan tujam e nuquir winicobꞌ era y cay ojron, pero cꞌani oꞌjron tacar taca e concilio, y tamar era uyare tuaꞌ aloqꞌuesnobꞌ e apostolobꞌ patir cora era. 35 Y conda cꞌapa loqꞌuesnobꞌ e apostolobꞌ, jaxir cay ojron taca e concilio y che:

—Winicox xeꞌ tuox e Israel, iwiric tamar lo que war ibꞌijnu iche taca e winicobꞌ era. 36 Cꞌar imener lo que numuy jax tocto era conda ayan ani inteꞌ winic xeꞌ ucꞌabꞌa Teudas xeꞌ cay ucanse e gente que jaxir nuxi winic. Y cay xanobꞌ tupat jaxir 400 winicobꞌ. Pero conda chamesna e Teudas, cꞌapa locꞌoy tunor e winicobꞌ, inteꞌ inteꞌ ixiobꞌ tama uyototobꞌach y cꞌapa tunor lo que cay ubꞌijnu uche e Teudas era. 37 Y otronyajr, conda war achena e tzicmar, achpa inteꞌ winic xeꞌ ucꞌabꞌa Judas xeꞌ turu ani tama e departamento Galilea. Y cay xanobꞌ tacar meyra winicobꞌ. Pero jaxir sutpa chamesna ubꞌan, y de allí cꞌapa ixiobꞌ inteꞌ inteꞌ tama uyototobꞌach otronyajr, y cꞌapa tunor lo que cay ubꞌijnu uche e Judas era. 38 Y tamar era cꞌani inwareox que ira iyose ibꞌa taca e winicobꞌ era y que actanicobꞌ bꞌan taca. Porque jay lo que war uchiobꞌ jax taca tuaꞌ inteꞌ winic cꞌani acꞌapa. 39 Pero jay lo que war uchiobꞌ tuaꞌ e Dios, ma cocha erer itijres nox. Y tamar era war inwareox que iwiric, porque jay tuaꞌ e Dios tunor era, machi cꞌani catajwi que war caturbꞌa cabꞌa tuaꞌ cache pelear upater e Dios, che e Gamaliel tut e concilio.

40 Y tamar era tunor e nuquir winicobꞌ quetpobꞌ tzꞌustaca. Entonces uyareobꞌ tuaꞌ ataresnobꞌ e apostolobꞌ otronyajr y uyareobꞌ tuaꞌ ajajtzꞌobꞌ taca inteꞌ jarbꞌir qꞌuewer, y de allí uyareobꞌ y che:

—Irix ixojron tama ucꞌabꞌa e Jesús, che e nuquir winicobꞌ. Y de allí tzacarna tuaꞌ alocꞌoy axiobꞌ.

41 Entonces conda e apostolobꞌ locꞌoyobꞌ tut e nuquir winicobꞌ era, war atzayobꞌ que tajwinobꞌ que tawar umen e Dios tuaꞌ asubꞌajrnobꞌ tama ucꞌabꞌa e Jesús. 42 Pero jaxirobꞌ machi uyactobꞌ e canseyaj tama e Jesús, y machi uyactobꞌ tuaꞌ uchecsuobꞌ ucꞌabꞌa e Jesús que jax e Cristo, y bꞌan uchiobꞌ iraj iraj tama tunor e ototobꞌ tama e chinam era y tama e templo ubꞌan.

<- Hechos 4Hechos 6 ->