San Marcos 16

Conda sujta bꞌixqꞌuesna e Jesús tujam e chamenobꞌ

Mateo 28:1-10; Lucas 24:1-12; Juan 20:1-10

1 Pues entonces conda cꞌapa e día tuaꞌ e jiriar ixiobꞌ e María xeꞌ tuaꞌ e chinam Magdala taca e María xeꞌ jax utuꞌ e Santiago y e Salomé tuaꞌ umaniobꞌ cora perfume tuaꞌ axin uyariobꞌ tama ucuerpo e Jesús tiaꞌ chꞌar chamen. 2 Entonces conda war asacojpa tama e bꞌajxan día tuaꞌ e semana xeꞌ jax inteꞌ día domingo, ixiobꞌ e ixictac era tuaꞌ acꞌotoyobꞌ tiaꞌ turu umujr e Jesús, pero esto conda chectix tari e qꞌuin. 3 Y cay ojronobꞌ jaxobꞌ taca y chenobꞌ:

—¿Chi nic tuaꞌ ulocse e nuxi tun lo que war umaqui utiꞌ e chꞌen tiaꞌ chꞌar e Jesús? chenobꞌ e ixictac era.

4 Pero conda cꞌotoy uwirobꞌ tiaꞌ turu umujr e Jesús uwirobꞌ que loqꞌuesbꞌir e nuxi tun xeꞌ macar ani utiꞌ e chꞌen tamar. 5 Entonces ixin ochoyobꞌ tama e chꞌen y cay uwirobꞌ que macuir ayan inteꞌ chꞌom sitz xeꞌ turu tuyejtzꞌer unojcꞌabꞌ tiaꞌ chꞌar ani e Jesús. Pues bꞌujcsebꞌir e sitz era taca inteꞌ bꞌujc xeꞌ largo y xeꞌ galan sacsac ut. Pero bꞌactobꞌ e ixictac conda uwirobꞌ e chꞌom sitz. 6 Entonces ojron e sitz y che:

—Ira ixbꞌacta. Nen innata que nox war isajca e Jesús xeꞌ tuaꞌ e chinam Nazaret xeꞌ chamesna tut e cruz. Pues jaxir machix chꞌar tara sino que sutpix bꞌixcꞌa tujam e chamenobꞌ. Iranic iwira tiaꞌ chꞌar ani ucuerpo. 7 Quiquic arenic uyajcanuarobꞌ e Jesús y e Pedro y arenic cocha era: “Jaxir axix era esto tama e departamento Galilea, y yajaꞌ tuaꞌ iwira ut bꞌan cocha cay arenox umener”, che e chꞌom sitz era.

8 Entonces locꞌoyobꞌ e ixictac tama e mujr era y ixiobꞌ ajner porque war achinchobꞌ y war abꞌactobꞌ, y mamajchi uyareobꞌ tucꞌa numuy umen que war abꞌactobꞌ meyra.

Conda e Jesús uchectes ubꞌa tut e María

xeꞌ tuaꞌ e chinam Magdala

Juan 20:11-18

9 Pues entonces conda sutpa bꞌixcꞌa e Jesús tujam e chamenobꞌ conda war asacojpa tama e bꞌajxan día tuaꞌ e semana, ixin uchectes ubꞌa bꞌajxan tut e María xeꞌ tuaꞌ e chinam Magdala xeꞌ jax xeꞌ loqꞌuesna siete mabꞌambꞌan mein tamar. 10 Entonces e María ixin y cay uyare tin e cay xanobꞌ taca e Jesús lo que uwirobꞌ, cocha jaxirobꞌ tzajtaca turobꞌ y war aruobꞌ tama uchamer e Jesús. 11 Pero conda uyubꞌiobꞌ que sutpa bꞌixcꞌa e Jesús tujam e chamenobꞌ y que e María cay uwira ut, machi ucꞌubꞌsiobꞌ.

Conda e Jesús uchectes ubꞌa tut chateꞌ uyajcanuarobꞌ

Lucas 24:13-35

12 Y de allí e Jesús uchectes ubꞌa tut chateꞌ uyajcanuarobꞌ conda war axanobꞌ tama e bꞌir, pero quetpa intiach uwirnar tutobꞌ. 13 Pero conda cꞌotoy unatobꞌ que jax e Jesús sutpa ixiobꞌ tut e inmojr uyajcanuarobꞌ y cay uyareobꞌ que uwirobꞌix e Jesús, pero jaxirobꞌ machi ucꞌubꞌsiobꞌ.

Conda e Jesús uyare uyajcanuarobꞌ que ucꞌani tuaꞌ uqꞌuechiobꞌ axin uyojroner

Mateo 28:16-20; Lucas 24:36-49; Juan 20:19-23

14 Pues entonces otronyajrto e Jesús ixin uchecsu ubꞌa tut e once uyajcanuarobꞌ. Y conda cꞌotoy tutobꞌ, war awiobꞌ. Y cay ucꞌayobꞌ cora umen que machi cꞌubꞌseyanobꞌ tamar lo que arobꞌnobꞌ umen tin e cay uwirobꞌ ut jaxir, y umen que uqꞌuecꞌojse uyalmobꞌ tuaꞌ machi ucꞌubꞌsiobꞌ que bꞌixir. 15 Entonces ojron e Jesús y che:

—Quiquic tama tunor or e rum y checsunic uyojroner e Dios tama e corpesiaj tut tunor e gente axin. 16 Y tunor tin e axin acꞌubꞌseyanobꞌ tamaren y achꞌujyobꞌ, cꞌani acorpesnobꞌ. Pero tunor tin e machi acꞌubꞌseyanobꞌ tamaren axin asatpobꞌ. 17 Y tin e axin acꞌubꞌseyanobꞌ tamaren cꞌani aꞌjcꞌunobꞌ cora chequerir que ayan nicꞌotorer tacarobꞌ. Jaxirobꞌ axin uyajnesobꞌ alocꞌoy e sian mabꞌambꞌan mein tama nicꞌabꞌa. Y axin aꞌjcꞌunobꞌ tuaꞌ oꞌjronobꞌ tama inteꞌ ojroner xeꞌ ma tiaꞌ cano oꞌjronobꞌ tamar. 18 Y jay axin ujajpiobꞌ inteꞌ chan tama ucꞌabꞌ, o jay axin uyuchꞌiobꞌ lo que jax inteꞌ veneno, machix tuaꞌ unumse ubꞌobꞌ tamar. Y conda axin ucꞌatbꞌu ucꞌabꞌobꞌ tujor tin e ajmuac, axin atzꞌacpobꞌ ubꞌan, che e Jesús.

Conda e Jesús tꞌabꞌay ixin tichan

Lucas 24:50-53

19 Entonces conda cꞌapa ojron Cawinquirar Jesús taca uyajcanuarobꞌ qꞌuejcha ixin tichan tut e qꞌuin y cꞌotoy turuan tama unojcꞌabꞌ Catata Dios tichan. 20 Entonces jaxirobꞌ locꞌoyobꞌ y cay uchecsuobꞌ axin tunor uyojroner e Dios tama e corpesiaj tic taca tama tunor or e rum. Y Cawinquirar war utacre uyajcanuarobꞌ taca ucꞌotorer y war uchecsu que erach uyojroner taca meyra sian milagro xeꞌ chembꞌir umenerobꞌ. Tara acꞌapa tunor niwojroner, che e Marcos.

<- San Marcos 15