Languages
2
Conda e Jesús utzꞌacpes inteꞌ winic xeꞌ chamen ucuerpo
Mateo 9:1-8; Lucas 5:17-26

1 Pues conda cꞌapa numuy cora día que turu e Jesús tama e choquem lugar, sutpa ixin esto tama e chinam Capernaum. Pero wacchetaca cꞌotoy unatobꞌ e gente que sutpa tari e Jesús otronyajr esto tama uyotot e Simón Pedro. 2 Y wacchetaca cay cꞌotoyobꞌ tama e otot este que bꞌutcꞌa, y ma cocha erer uwajpi otronteꞌ winic macu, y nien tama e puerta mamajchi erer oꞌchoy ubꞌan. Entonces e Jesús cay ucanse uyojroner e Dios tutobꞌ. 3 Y tamar era cꞌotoyobꞌ cuatro winicobꞌ xeꞌ war uqꞌuechiobꞌ axin inteꞌ winic xeꞌ chamen ucuerpo tama inteꞌ chꞌacteꞌ. 4 Pero cocha ayan e sian gente xeꞌ war ubꞌutꞌiobꞌ e otot tiaꞌ turu e Jesús, ma cocha erer oꞌchoyobꞌ macu. Y tamar era uqꞌuechiobꞌ ixin e winic esto tujor e otot y cay upasiobꞌ ujor e otot tuaꞌ uyubꞌi uyemsiobꞌ e ajmuac tama uchꞌacteꞌ esto tut e Jesús macuir e otot. 5 Y conda e Jesús uwira cobꞌa ucꞌubꞌesiaj e winicobꞌ era cay ojron taca e winic xeꞌ chamen ucuerpo y che:

—Nimaxtaquet, cꞌani incꞌumpa tacaret tama tunor amabꞌambꞌanir, che e Jesús.

6 Pero ayan cora ajcanseyajobꞌ tama uley e Moisés xeꞌ turobꞌ tama e otot era xeꞌ cay ubꞌijnuobꞌ tama uyojroner e Jesús y chenobꞌ: 7 “¿Tucꞌa tuaꞌ que war oꞌjron cocha era e winic yax? Porque taca uyojroner era war uqꞌuijnes e Dios. Porque mamajchi uyubꞌi usati e mabꞌambꞌanir, sino que jax taca e Dios”, xeꞌ war ubꞌijnuobꞌ e nuquir winicobꞌ jaxobꞌ taca. 8 Pero wacchetaca cꞌotoy unata e Jesús tama uyalma lo que war ubꞌijnuobꞌ e winicobꞌ, y tamar era ojron y che:

—¿Tucꞌa tuaꞌ que war ibꞌijnu que mabꞌambꞌan lo que war inche? 9 Ma erer inata jay erach niwojroner jay inware que cꞌumpix e Dios tama imabꞌambꞌanir, porque ma chequer tiut jay ayan e cꞌumpar tama imabꞌambꞌanir o jay machi. Pero jay inware: “Achpen cuchu achꞌacteꞌ y quiqui tama oꞌtot”, wacchetaca erer iwira jay erach niwojroner jay achpa axana e winic. 10 Entonces cꞌani inwirsiox era que nen xeꞌ Uyunenen e winic ayan nicꞌotorer tara tor e rum tuaꞌ incꞌumpa tama umabꞌambꞌanir inteꞌ winic, che e Jesús.
Entonces e Jesús uyare e winic xeꞌ chamen ucuerpo y che:

11 —Achpen waren y chꞌama achꞌacteꞌ y cuchu quiqui tama oꞌtot, che e Jesús.

12 Entonces achpa e winic xeꞌ chamen ani ucuerpo, uchꞌami uchꞌacteꞌ y locꞌoy ixin. Y bꞌan uche tut tunor e gente xeꞌ turobꞌ era. Y tamar era tunor e gente cay bꞌactobꞌ tamar, y cay utattzꞌiobꞌ ucꞌabꞌa e Dios y chenobꞌ:

—Ma tiaꞌ cawira numuy lo que war uche e winic era, chenobꞌ tunor e gente.
Conda e Mateo xeꞌ ucꞌabꞌa Leví ubꞌan pejcna
umen e Jesús
Mateo 9:9-13; Lucas 5:27-32

13 Pues entonces sutpa ixin e Jesús esto tutiꞌ e nuxi jaꞌ xeꞌ ucꞌabꞌa Galilea. Y cay yopa meyra gente tut tuaꞌ uyubꞌiobꞌ uyojroner. Entonces jaxir cay ucansiobꞌ. 14 Y conda cꞌapa canseyan, locꞌoy xana cora y uwira e Mateo xeꞌ jax uyunen e Alfeo. Y turu e Mateo tut inteꞌ mesa war uchꞌami e tumin tuaꞌ e gente lo que quetpa tuaꞌ utoyobꞌ e gobierno. Entonces e Jesús uyare e Mateo y che:

—Incoꞌ tacaren, che e Jesús.
Entonces achpa e Mateo y locꞌoy tuaꞌ axin taca e Jesús.

15 Y nacpat era ixin e Jesús esto tama uyotot e Mateo y cay weꞌ tacar. Y tama e otot era ayan meyra ajmorojseyajobꞌ tumin tuaꞌ e gobierno bꞌan cocha e Mateo, y ayanto más ajmabꞌambꞌanirobꞌ ubꞌan xeꞌ turobꞌ tor e mesa war awiobꞌ taca e Jesús y taca uyajcanuarobꞌ. Y ayanto más gente tama e otot era ubꞌan xeꞌ war axanobꞌ tupat e Jesús iraj iraj. 16 Y cꞌotoy cora winicobꞌ xeꞌ ajcanseyajobꞌ tama uley e Moisés taca cora fariseobꞌ xeꞌ war awawanobꞌ achꞌujcsanobꞌ. Y conda uwirobꞌ lo que war anumuy taca e Jesús que war aweꞌ taca tunor e ajmabꞌambꞌanirobꞌ era, jaxirobꞌ cay ojronobꞌ taca uyajcanuarobꞌ e Jesús y chenobꞌ:

—¿Tucꞌa tuaꞌ war aweꞌ Iwajcanseyaj taca e ajmorojseyajobꞌ tumin tuaꞌ e gobierno y taca tunor e sian ajmabꞌambꞌanirobꞌ? che e nuquir winicobꞌ era.

17 Pero e Jesús war uyubꞌi tunor era y che:

—Tin e majax ajmuac machi ucꞌani inteꞌ ajtzꞌaconer, sino que jax taca tin e ajmuac. Nen tarien majax tuaꞌ impejca tin e unatobꞌ que imbꞌutzꞌobꞌ, sino que tarien tuaꞌ impejca tin e satrem turobꞌ, che e Jesús.
Conda uyubꞌiobꞌ tuaꞌ e Jesús tama e ayuno
Mateo 9:14-17; Lucas 5:33-39

18 Pues entonces tama inyajr ayan cora ajcanuarobꞌ tuaꞌ e Juan xeꞌ ajchꞌuymar y cora ajcanuarobꞌ tuaꞌ e fariseobꞌ xeꞌ machi war awiobꞌ tuaꞌ ucꞌajtiobꞌ taca e Dios. Entonces yopobꞌ cora winicobꞌ tut e Jesús y cay uyubꞌiobꞌ tuaꞌ y chenobꞌ:

—Pues uyajcanuarobꞌ e Juan xeꞌ ajchꞌuymar y uyajcanuarobꞌ e fariseobꞌ machi war awiobꞌ tuaꞌ ucꞌajtiobꞌ taca e Dios iraj iraj, pero e ajcanuarobꞌ tabꞌa majax bꞌan war uchiobꞌ, che e winicobꞌ era.

19 Y che e Jesús:

—Erer cabꞌijnu que niwajcanuarobꞌ larobꞌ tacar tin e pejcnobꞌ tuaꞌ acꞌotoyobꞌ tama inteꞌ nujbꞌiar. Pues conda war atzayobꞌ taca e noxipbꞌir tama inteꞌ nojqꞌuin cocha era ¿erer ca ubꞌijnuobꞌ tuaꞌ uyactobꞌ tuaꞌ awiobꞌ tuaꞌ ucꞌajtiobꞌ taca e Dios? Pues conda turuto e noxipbꞌir ma cocha erer. 20 Pero watar e día conda axin aloqꞌuesna e noxipbꞌir tutobꞌ tama e nojqꞌuin, y entonces tin e pejcbꞌirobꞌ erer uyactobꞌ tuaꞌ awiobꞌ tuaꞌ ucꞌajtiobꞌ taca e Dios. Y bꞌan ubꞌan conda inxin inlocꞌoy tara tor e rum, cꞌani ubꞌijnuobꞌ niwajcanuarobꞌ tuaꞌ uyactobꞌ tuaꞌ awiobꞌ tuaꞌ ucꞌajtiobꞌ taca e Dios.

21 ’Mamajchi axin uxuri imbꞌijc bꞌujc xeꞌ imbꞌutz tuaꞌ utaqꞌui tama inteꞌ tzuc bꞌujc. Porque jay bꞌan ani uche e bꞌujc xeꞌ tacbꞌir era axin uchꞌijse más nojta e chꞌen tama e tzuc bꞌujc, y de allí matucꞌa ucꞌampibꞌir e bꞌujc lo que utaqꞌui tama e tzuc bꞌujc era ubꞌan. 22 Pues tin e war uche e vino axin uyari e vino xeꞌ intocto achena tama inteꞌ bolsa xeꞌ chembꞌir taca e qꞌuewer xeꞌ intocto achena ubꞌan. Pero mamajchi axin uyari e vino xeꞌ intocto achena tama inteꞌ bolsa xeꞌ chembꞌir taca e qꞌuewer xeꞌ bꞌitzꞌemix ut, porque jay bꞌan uche, entonces conda acay oꞌjmay e vino y axin atꞌabꞌay, axin awejrtzꞌa e qꞌuewer cocha machi uyubꞌi abꞌitzꞌa más, y entonces axin asatpa e qꞌuewer y axin atucpa e vino ubꞌan. Bꞌan che e Jesús tuaꞌ uchecsu tut e gente que ma cocha erer uyapru e canseyaj tuaꞌ e Jesús taca e onian bꞌijnusiaj tuaꞌ e gente.

Conda ubꞌna tuaꞌ e Jesús tucꞌa erer uche inteꞌ tama inteꞌ día tuaꞌ e jiriar
Mateo 12:1-8; Lucas 6:1-5

23 Pues tama inteꞌ día tuaꞌ e jiriar war axana e Jesús taca tunor uyajcanuarobꞌ macuir cora trigo. Y conda uyajcanuarobꞌ cay jajpnobꞌ umen e winar cay ulocsiobꞌ ut e trigo y cay umuxrobꞌ upat tama ucꞌabꞌobꞌ, y cay uyujtobꞌ locꞌoy usojqꞌuir y cay ucꞌuxiobꞌ ut e trigo. 24 Y ayan cora fariseobꞌ xeꞌ war axanobꞌ tupat e Jesús xeꞌ war uwirobꞌ lo que war uchiobꞌ uyajcanuarobꞌ. Entonces cay uyareobꞌ e Jesús y chenobꞌ:

—Chꞌujcun awira que awajcanuarobꞌ war uchiobꞌ inteꞌ patnar que machi acꞌajna tuaꞌ uchiobꞌ umen uley e Moisés tama inteꞌ día tuaꞌ e jiriar cocha era, che e fariseobꞌ.

25 Y che e Jesús:

—¿Machi ca iche leer lo que chꞌar tzꞌijbꞌabꞌir tama uyojroner e Dios tama e David taca upiarobꞌ conda jajpnobꞌ umen e winar conda war axanobꞌ? 26 Pues numuy tunor era conda quetpa e Abiatar cocha uwinquir e inmojr sacerdotiobꞌ. Pues ochoy e David macuir uyotot e Dios[a] y cay uchꞌami cora pan xeꞌ quetpa ajcꞌubꞌir e Dios. Y mix erer ani ucꞌuxi e pan era nien jaxir y nien upiarobꞌ sino que ajtaca e sacerdote xeꞌ erer ucꞌuxi. Pero conda jajpnobꞌ umen e winar, e David cay uchꞌami e pan era y cay uyajcꞌu upiarobꞌ y cay ucꞌuxiobꞌ tunorobꞌ, che e Jesús.

27 Entonces ojron otronyajr e Jesús y che:

—Pues e día tuaꞌ e jiriar chembꞌir umen e Dios tuaꞌ utacre e winicobꞌ, y majax tuaꞌ aquetpa tujor e winicobꞌ. 28 Y tamar era cꞌani inwareox que nen xeꞌ Uyunenen e winic ayan nicꞌotorer tuaꞌ inware tucꞌa erer uche inteꞌ y tucꞌa ma erer uche tama e día era xeꞌ jax inteꞌ día tuaꞌ e jiriar, che e Jesús.

<- San Marcos 1San Marcos 3 ->