San Marcos 8

Conda e Jesús uwese 4,000 winicobꞌ

Mateo 15:32-39

1 Pues tama e tiempo era cay umorojse ubꞌobꞌ meyra sian gente tut e Jesús, pero matucꞌa tuaꞌ ucꞌuxiobꞌ, y tamar era e Jesús upejca uyajcanuarobꞌ y che:

2 —Nen inyajta ut e sian gente era porque desde uxiꞌ turobꞌ tacaren y matucꞌa war ucꞌuxiobꞌ. 3 Y machi cꞌani inwareobꞌ tuaꞌ axiobꞌ tama uyototobꞌ bꞌan taca, porque bꞌajcꞌat acucremobꞌ tama e bꞌir umen que machi war awiobꞌ, y ayan tin e tariobꞌ innajt tara ubꞌan, che e Jesús.

4 Pero ojron uyajcanuarobꞌ y chenobꞌ:

—¿Y tiaꞌ tuaꞌ catajwi e sian comida tuaꞌ cawese tunor e gente era tama inteꞌ choquem lugar cocha era? che uyajcanuarobꞌ.

5 Entonces e Jesús uyubꞌi tuobꞌ y che:

—¿Y jaygojr pan ayan tibꞌa? che e Jesús.

Y jaxirobꞌ chenobꞌ:

—Ayan siete ut pan, che uyajcanuarobꞌ.

6 Entonces e Jesús uyare e gente tuaꞌ aturuanobꞌ tor e cꞌopot, y de allí uchꞌami e siete ut pan tama ucꞌabꞌ y cay utattzꞌi ucꞌabꞌa e Dios tamar. Y de allí cay uxere ixin taca uyajcanuarobꞌ y jaxirobꞌ upuquiobꞌ ixin taca tunor e gente. 7 Y ayan ubꞌan cora yerobꞌ chay xeꞌ qꞌuecher umenerobꞌ, y conda e Jesús cꞌapa uchojbꞌes utobꞌ uyare uyajcanuarobꞌ tuaꞌ upuquiobꞌ axin taca e gente ubꞌan. 8 Y tunor e gente wiobꞌ y chuanobꞌ. Y conda cꞌapa wiobꞌ cay umorojsiobꞌ lo que quetpa tama e pan y ubꞌutꞌiobꞌ siete chiquiꞌ. 9 Y tin e wiobꞌ ayanobꞌ 4,000 winicobꞌ. Entonces e Jesús uyare e gente tuaꞌ axiobꞌ tama uyototobꞌ. 10 Y de allí ixin tꞌabꞌay taca uyajcanuarobꞌ tama inteꞌ barco xeꞌ turu tutiꞌ e nuxi jaꞌ, y ixiobꞌ tor e jaꞌ esto tama e lugar Dalmanuta.

E seña tama e tiempo

Mateo 16:1-4; Lucas 12:54-56

11 Entonces conda yopobꞌ teinxejr e nuxi jaꞌ era ecmobꞌ tama e barco. Y ayan cora fariseobꞌ xeꞌ turobꞌ yajaꞌ xeꞌ cay ojronobꞌ taca e Jesús, pero war aqꞌuijnobꞌ. Pues war usicbꞌobꞌ cocha tuaꞌ umajresobꞌ e Jesús, y tamar era uyareobꞌ tuaꞌ uche inteꞌ nuxi milagro tutobꞌ tuaꞌ aquetpa chequer jay ebꞌtabꞌir umen e Dios. 12 Pero e Jesús sutpa ujaqꞌui umusic y che:

—¿Tucꞌa tuaꞌ que war ucꞌajtiobꞌ inteꞌ seña tanibꞌa e winicobꞌ era? Pero cꞌani inwareobꞌ que machi ixto tuaꞌ aꞌjcꞌunobꞌ inteꞌ seña cocha war ucꞌajtiobꞌ, che e Jesús.

13 Entonces e Jesús uyacta e winicobꞌ era y sutpa tꞌabꞌay tama e barco otronyajr tuaꞌ axin esto teinxejr e nuxi jaꞌ.

E levadura tuaꞌ e fariseobꞌ

Mateo 16:5-12

14 Pues war axiobꞌ tor e jaꞌ tama e barco, pero najpa umenerobꞌ tuaꞌ utaresobꞌ lo que tuaꞌ ucꞌuxiobꞌ y ayan taca ingojr pan tacarobꞌ. 15 Entonces ojron e Jesús y che:

—Chꞌujcunic iwira tuaꞌ machi ixmajresna tama ulevadura e fariseobꞌ y tama ulevadura e Herodes, che e Jesús.

16 Pero uyajcanuarobꞌ cay ubꞌijnuobꞌ jaxobꞌ taca y chenobꞌ:

—¿Umen ca que machi catares e pan que war oꞌjron cocha era? che uyajcanuarobꞌ jaxobꞌ taca.

17 Pero e Jesús unata tucꞌa war oꞌjronobꞌ y tamar era uyubꞌi tuobꞌ y che:

—¿Tucꞌa tuaꞌ que war iware que matucꞌa e pan? Merato ixcꞌotoy inata tama tunor era, y macarto ijor. Pues nox imbꞌijc taca war ixcꞌubꞌseyan tama e Dios. 18 Nox ayan unaqꞌuiut pero machi war ixeron, y ayan ichiquin pero machi war ixobꞌian. Y nien ma cꞌar imener lo que numuy 19 conda impuqui ixin e cinco ut pan taca e 5,000 winicobꞌ. Y conda bꞌan inche ¿jayteꞌ chiquiꞌ cay imorojse tamar lo que quetpa? che e Jesús.

Y jaxirobꞌ chenobꞌ:

—Doce, chenobꞌ.

20 Y che e Jesús:

—Y conda cay impuqui e siete ut pan taca e 4,000 winicobꞌ ¿jayteꞌ chiquiꞌ cay imorojse tamar lo que quetpa? che e Jesús.

Y jaxirobꞌ chenobꞌ:

—Siete, chenobꞌ.

21 Entonces ojron e Jesús otronyajr y che:

—¿Machi ixto ca iyubꞌi tunor era? che e Jesús.

Conda e Jesús utzꞌacpes inteꞌ winic xeꞌ tajpem unacꞌut tama e chinam Betsaida

22 Pues entonces e Jesús y uyajcanuarobꞌ ixiobꞌ esto tama e chinam Betsaida. Y tama e lugar yajaꞌ ayan cora winicobꞌ xeꞌ ucꞌotesobꞌ tut e Jesús inteꞌ winic xeꞌ tajpem unacꞌut. Y jaxirobꞌ cay ucꞌajtiobꞌ taca e Jesús tuaꞌ ucꞌatbꞌu ucꞌabꞌ tamar. 23 Entonces e Jesús uchuqui ucꞌabꞌ e winic xeꞌ tajpem unacꞌut y cay uqꞌueche ixin patir e chinam. Y entonces utujbꞌa orucꞌabꞌ y uturbꞌa tama unacꞌut e winic, y de allí ucꞌatbꞌu ucꞌabꞌ tama ujor y cay uyubꞌi tuaꞌ y che:

—¿Erer ca awira lo que ayan tara? che e Jesús.

24 Y e winic uchꞌujcu uwira y che:

—Pues era inwira cora winicobꞌ pero uwirnarobꞌ bꞌan taca cocha cora teꞌ, pero xeꞌ war axanobꞌ, che e winic.

25 Entonces e Jesús sutpa ucꞌatbꞌu ucꞌabꞌ tama unacꞌut e winic, y de allí e winic cay uchꞌujcu uwira y quetpa chequer tut tunor lo que ayan tama e lugar era, y quetpa tzꞌacpesbꞌir inyajrer. 26 Y de allí e Jesús uyare e winic tuaꞌ axin tama uyotot y che:

—Ira iyochoy tama e chinam era otronyajr, y ira aware e gente lo que numuy tacaret, che e Jesús.

Conda e Pedro uyare e Jesús y che:

“Net jaxet e Cristo”

Mateo 16:13-20; Lucas 9:18-21

27 Entonces ixin e Jesús taca tunor uyajcanuarobꞌ tuaꞌ acꞌotoyobꞌ tama cora aldea lo que ayan tuyejtzꞌer inteꞌ chinam xeꞌ ucꞌabꞌa Cesarea de Filipo. Y conda war axanobꞌ tama e bꞌir e Jesús cay uyubꞌi tuaꞌ uyajcanuarobꞌ y che:

—¿Y tucꞌa war chenobꞌ e gente tamaren xeꞌ Uyunenen e winic? che e Jesús.

28 Y uyajcanuarobꞌ chenobꞌ:

—Ayan tin e war ubꞌijnuobꞌ que net jaxet e Juan xeꞌ ajchꞌuymar, y ayan tin e war ubꞌijnuobꞌ que net jaxet e profeta Elías xeꞌ turuan tama e onian tiempo, y ayan tin e war ubꞌijnuobꞌ que net jaxet otronteꞌ profeta xeꞌ turuan tama e onian tiempo xeꞌ sutpa bꞌixcꞌa, che uyajcanuarobꞌ.

29 Entonces e Jesús uyubꞌi tuobꞌ y che:

—Y nox, ¿tucꞌa iware tamaren? che e Jesús.

Entonces ojron e Pedro y che:

—Net jaxet e Cristo, che e Pedro.

30 Entonces e Jesús uyare uyajcanuarobꞌ que machito tuaꞌ uyare e gente que jaxir jax e Cristo xeꞌ war che que jaxir jax Cawajcorpesiaj.

Conda e Jesús cay uchecsu tut uyajcanuarobꞌ que jaxir ucꞌani tuaꞌ achamesna

Mateo 16:21-28; Lucas 9:22-27

31 Pues entonces e Jesús cay uchecsu tut uyajcanuarobꞌ que jaxir xeꞌ jax Uyunen e Winic ucꞌani tuaꞌ unumse ubꞌa meyra tama ucꞌabꞌ e nuquir winicobꞌ, y que ucꞌani tuaꞌ unumse ubꞌa meyra tama ucꞌabꞌ tin e uwinquir e inmojr sacerdotiobꞌ y tama ucꞌabꞌ tin e ajcanseyajobꞌ tama uley e Moisés. Y cay uchecsu tutobꞌ ubꞌan que jaxir ucꞌani tuaꞌ achamesna, pero que tama e uxteꞌ día cꞌani asujta abꞌixqꞌuesna tujam e chamenobꞌ. 32 Y e Jesús war uchecsu ubꞌa tut uyajcanuarobꞌ cocha era, conda pejcna umen e Pedro tuaꞌ alocꞌoy patir tacar, y cay uyare que majax imbꞌutz lo que war arobꞌna umener. 33 Pero e Jesús wacchetaca sutpa uwira ut uyajcanuarobꞌ y cay ucꞌaye e Pedro y che:

—Loqꞌuen tara Satanás, porque net machi anata tucꞌa war ubꞌijnu e Dios. Net intaca war abꞌijnu bꞌan cocha ubꞌijnuobꞌ e winicobꞌ tara tor e rum, che e Jesús.

34 Entonces e Jesús cay upejca uyajcanuarobꞌ y e gente xeꞌ turobꞌ tuyejtzꞌer y che:

—Tin e cꞌani axin tanipat ucꞌani tuaꞌ unajpes ubꞌa y axin tanipat ejcꞌar ejcꞌar motor que axin ani achamesna tamaren. 35 Porque tin e cꞌani ucorpes ucuxtar cꞌani asatpa, pero tin e usati ucuxtar tamaren y tamar uyojroner e Dios cꞌani acorpesna. 36 Pues ¿tucꞌa ucꞌampibꞌir tut inteꞌ winic jay axin uchꞌami tunor lo que ayan tara tor e rum jay tamar era axin usati uyalma? 37 ¿Y cobꞌa nic tumin tuaꞌ utoyi inteꞌ winic tuaꞌ ani ucorpes uyalma? 38 Y jay ayan tin e axin asubꞌajra tamaren y tamar niwojroner tut e gente tara tor e rum xeꞌ machi war acꞌubꞌseyanobꞌ tamaren y xeꞌ mabꞌambꞌan uwirnarobꞌ, entonces nen xeꞌ Uyunenen e Winic cꞌani insubꞌajra tamarobꞌ ubꞌan conda insutpa waten taca tunor utawarer Nitata y taca tunor e angelobꞌ xeꞌ erach, che e Jesús.

<- San Marcos 7 San Marcos 9 ->