1 Pues entonces niwermanuox, lo que war unsre tama niwalma y lo que war incꞌajti taca e Dios iraj iraj jax era: Que incꞌani tuaꞌ acorpesnobꞌ tin e tuobꞌ e Israel. 2 Pues ayan lo que erer inware tamarobꞌ xeꞌ jax era: Que jaxirobꞌ ayan inteꞌ nuxi utzeriaj tama e Dios, pero uchebꞌiobꞌ que atzꞌacta tuaꞌ taca oꞌbꞌianobꞌ tut uley e Moisés. 3 Pues machi unatobꞌ cocha tuaꞌ aquetpa erach inteꞌ taca e Dios. Y tamar era ixin usicbꞌobꞌ e Dios bꞌan taca cocha ubꞌijnuobꞌ, pero machi cꞌani ubꞌijnu uwirobꞌ que ucꞌani tuaꞌ umanxujres ubꞌobꞌ tut e Dios tuaꞌ uyubꞌi aquetpobꞌ erach tacar. 4 Porque e Jesucristo cꞌapa uche tunor lo que ucꞌani uley e Moisés conda ixin chamay tuaꞌ ucorpeson, y tamar era jaxir uche que tunor tin e axin acꞌubꞌseyanobꞌ tamar, axin aquetpobꞌ erach taca e Dios.

5 Pero tin e cꞌani aquetpa erach taca e Dios tacar taca uley e Moisés ucꞌani ani tuaꞌ uche bꞌan taca cocha chꞌar tzꞌijbꞌabꞌir umen e Moisés[a] conda che: “E winic xeꞌ acꞌapa uche tunor lo que chꞌar tzꞌijbꞌabꞌir tama uley e Moisés cꞌani uchꞌami e cuxtar xeꞌ bꞌutꞌur taca uchojbꞌesiaj e Dios”, xeꞌ chꞌar tzꞌijbꞌabꞌir umen e Moisés. 6 Pero che tama uley e Moisés[b] que inteꞌ erer aquetpa erach taca e Dios jay axin acꞌubꞌseyan tamar, y que ma intran ani porque chꞌar tzꞌijbꞌabꞌir que: “Ira aware tama awalma y che, ¿chi tuaꞌ atꞌabꞌay axin tut e qꞌuin?” xeꞌ war che ¿chi tuaꞌ axin tut e qꞌuin tuaꞌ uyemse e Jesucristo tuaꞌ watar tara tor e rum tuaꞌ ucorpeson? 7 Y machi tuaꞌ aware: “Y ¿chi canic tuaꞌ ecmay axin tama e chꞌen tiaꞌ aquetpobꞌ e chamenobꞌ?” xeꞌ war che ¿chi canic tuaꞌ axin tut e chꞌen era tuaꞌ utꞌabꞌse watar e Jesucristo tujam e chamenobꞌ tuaꞌ aquetpa tara tor e rum tuaꞌ ucorpeson? 8 Entonces lo que war che jax era: “Pues e ojroner tama e corpesiaj turu toit; turu tama awej y turu tama awalma.” Y jax era e ojroner tama e cꞌubꞌesiaj lo que war cachecsu tut e gente axin. 9 Porque jay achecsu taca awej que e Jesucristo jax Awinquirar y icꞌubꞌseyan tama awalma que e Dios usuti ubꞌixqꞌues e Jesús tujam e chamenobꞌ, net tuaꞌ icorpesna. 10 Porque tama cawalma cacꞌubꞌseyan tama e Jesucristo tuaꞌ caquetpa erach tut e Dios, y taca cawej cachecsu que e Jesucristo jax Cawinquirar tuaꞌ cacorpesna.

11 Pues chꞌar tzꞌijbꞌabꞌir tama uyojroner e Dios[c] y che: “Tin e acꞌotoy acꞌubꞌseyanobꞌ tama e Jesucristo ma tiaꞌ tuaꞌ asubꞌajrobꞌ conda acꞌotoyobꞌ tut e Dios.” Bꞌan chꞌar tzꞌijbꞌabꞌir tama uyojroner e Dios. 12 Pues mamajchi xeꞌ intiach uwirnar tut e Dios, motor jay tuaꞌ e Israel o motor jay majax tuaꞌ e Israel. Pues ayan inteꞌ taca Cawinquirar ticajor tunoron xeꞌ turon tara tor e rum, y jaxir tuaꞌ axin uchojbꞌes ut tunor tin e axin upejca ucꞌabꞌa. 13 Porque chꞌar tzꞌijbꞌabꞌir tama uyojroner e Dios[d] y che: “Tunor tin e axin upejca ucꞌabꞌa Cawinquirar cꞌani acorpesnobꞌ.” Bꞌan chꞌar tzꞌijbꞌabꞌir tama uyojroner e Dios. 14 Pero ¿cocha tuaꞌ axin upejcobꞌ ucꞌabꞌa Cawinquirar Jesucristo jay ma tiaꞌ acꞌubꞌseyanobꞌ tamar? Y ¿cocha tuaꞌ acꞌotoy acꞌubꞌseyanobꞌ tamar Cawinquirar Jesucristo jay ma tiaꞌ uyubꞌiobꞌ oꞌjron inteꞌ tamar? Y ¿cocha tuaꞌ uyubꞌiobꞌ e ojroner tama e corpesiaj era jay mamajchi acꞌotoy tutobꞌ tuaꞌ uchecsu tunor era? 15 Y ¿cocha tuaꞌ axin inteꞌ tuaꞌ uchecsu e ojroner tama e corpesiaj tut e gente era jay mamajchi umen eꞌbꞌtana axin? Bꞌan cocha chꞌar tzꞌijbꞌabꞌir tama uyojroner e Dios[e] y che: “Galan ucꞌoter tunor tin e uchecsu e ojroner tama e jiriar tut e gente y xeꞌ uchecsu tutobꞌ tunor e ojroner xeꞌ imbꞌutz tama e corpesiaj.” Bꞌan chꞌar tzꞌijbꞌabꞌir tama uyojroner e Dios.

16 Pero majax tunor e gente xeꞌ cꞌani uchꞌami e ojroner tama e corpesiaj conda achecsuna tutobꞌ. Pues chꞌar tzꞌijbꞌabꞌir umen e Isaías[f] tama e onian tiempo y che: “Cawinquiraret, mamajchi war ucꞌubꞌse e ojroner lo que war cawareobꞌ.” Bꞌan chꞌar tzꞌijbꞌabꞌir tama uyojroner e Dios. 17 E cꞌubꞌesiaj watar tut inteꞌ conda war uyubꞌi uyojroner e Dios, y lo que war uyubꞌi era jax e ojroner tama e corpesiaj tama Cawinquirar Jesucristo.

18 Pero cꞌani umbꞌi tibꞌa: “¿Uyubꞌi ca tin e tuobꞌ e Israel e ojroner tama e corpesiaj?” Pues uyubꞌiobꞌ ixto yaꞌ. Porque chꞌar tzꞌijbꞌabꞌir tama uyojroner e Dios[g] y che: