—An-sui-beba-gudidaed burgwisad. Be wisid, a-dule Bab-Jehováʼba nue ibsadii daed. Epenne, anmar dulegi mani-gasgusad. Emide, a-dule nonikid. An-ibe an-masmala-warbogwad e-maiga-guega sedbied.

2 Geb Eliseo ega sogded:

—¿Degite, ibu bega imakbi be an-abesunna? ¿Ibi wis neggi be nikasunna?

Ome sogded:

—Dummad, bipisaale neggi an ibmar nikasulid, unnila olivo-gwallubi bormogi wis-ichee siid.

3 Eliseo ega sogded:

—Degirdi, dule-be-neg-dikarba-mamaidse, bormo-ollogana ichesur be egiso, bela be amioedi be sedago. 4 A-sorba, be-masmala-ebo negyaba be dogo. Geb, yawagak be edio. Agine, olivo-gwallu bormomargi be enogo. Degi, bormomar-engumaidba, bachik-bachik be urbo.

5 Geb degine, omegwa Eliseo-idu e-negse naded. Agine, e-masmala-ebo, negyaba yawagak-ediar sigisad. E-masmaladi ega bormomar senonidaed. Geb e-nan e-abin olivo-gwallu bormogi bar-daed. 6 Bela bormomargi olivo-gwallu engusgu, omegwa e-machi-wargwenga sogded:

—Bormo-baid anga seda.

E-Machi, abin-sogded:

—Bormomar, bela.

Agine, olivo-gwallu yog-galegar naded.

7 Geb degine, omegwa, Bab-Dummad-e-dulese naded, geb ega ibmar-gusad sogsad. Agi, Eliseo ega sogded:

—Emisgindi be nae, olivo-gwallu manigi be uknae. Geb dulegi-mani-ganikid be bennuko. Mani-gwabguoedgi bemar nabir gudii gumaloed.

—Ome-Sunam-neggweburginedse be gorna.

Geb e-mai, omegwase gorapid. Geb omegwa Eliseoʼse nonikid. 13 Agine, Eliseo, Gieziʼga sogded:

—Omega be soge: ‘Be anmarga bela-bela be alamakdiid. ¿Ibu bega wis imakbi be an-abemoga? ¿An bega rey-ebo sunmaknabi be abege, igi, sordamar-bila-onomalad-e-dummad-ebodibe?’

Omegwa abin-sogded:

—An-dulemar-abargi an nueganbi gudiid, bonisulid.

14 Eliseo, Gieziʼse egichialid:

—¿Degite, an ibu ega imaksunnoe?

Giezi abin-sogded:

—Ome mimmigan sulid, ar e-sui bato seredgusad.

15 Eliseo sogded:

—Ese be gorna.

Geb Giezi omegwase gorapid. Degi, omegwa, yawagak-naba gwisgunonikid. 16 Eliseo omega sogded:

—We-birga-danikidgi, degi, we-ibaginbali be-nukugi be-mimmi be gani guoed.

Ome, Eliseo-abin sogded:

—Dogdar-itole. Bedi Bab-Dummad-e-duled. Mer angi be dodoge.

17 Degidgine, ome gurgin-nika gunonikid. Geb birga-nasadgine, ega-iba-soglesadgi ome mimmi baknonikid. Ar igi Eliseo ega sogsagusa, deyob gusad.

18 Degi, machi-bipi dungualid. Geb ibagwengine, machi-bipi e-bab daknaded. E-babde, dulemar-ibmar-gwag-wemalad-abargi-gunaimogad. 19 Agine, ukiagwale susugwa binnasuli goralid:

—¡Aaa! ¡An nono-nunmake!

Geb e-bab dule-ega-arbaedga sogded:

—¡E-nanse be sede!

20 Dule, machi-bipi-gadebin imaksad. Geb, e-nanse sesad. E-nana e-nukugi e-machi-bipi-ganigusad. Deyob-gani, yorukudse machi-bipi burgwisad. 21 Geb degi, e-nan, Bab-Dummad-e-dule-gabednegse sesad. Agi, e-gabed-maidgi omesisad. Geb yawagak-edis alid. 22 Geb agine, e-suise goted:

—Mai-wargwen be anga barmidage. Degi, moli-uayasuid-ome be anga barmidabalo. Bin gwae Bab-Dummad-e-dule an daknagwelo. Emisgwa an nonibaloed.

23 E-sui ega sogded:

—¿Ibiga be daknae? Yoo nii-binid gwisgued, obunnoged-ibasurbalid.

E-ome e-suiga sogded:

—Akarsuli.

24 Degi, moli-uayasuid-ome-birgi omega gan sismalad. Geb ome e-maiga sogded:

—Ogus. Nae. Mer igarba be anga obunnogo. An bega sogedse, be obunnogo.

25 Geb omegwa Bab-Dummad-e-dule-maidse nadsunnad. Carmelo-yarse mosgu, Eliseo bannabaa omegwa-dani daksad. Geb e-mai-Gieziʼga sogded:

—Ome-Sunam-neggweburgined dani. 26 Gwae be abin-nae, be abarmakde. Ega be sogo, be nued-sogeye, degi, be-sui, be-mimmi nueganbimarmo sogeye.

Degi, geb e-mai naded. Giezi omega ibmar-sogsagu, omegwa ega sogded:

—Anmar bela nueganbi.

27 Degine, omegwa, yar-birse Bab-Dummad-e-dule-siidse modapgu, e-naggi angaagwar nagusad. Geb Giezi, Eliseoʼgi omegwa-obangubi-gualinad. Degi-inigwele, Eliseo ega sogded:

—Mer ese achao, ar bela-belad nue-bukib-binsaed. Bab-Jehová amba anga yoo soged, we-omede igi-nue-itoge.

28 Geb, omegwa Eliseoʼga sogded:

—Dummad, ¿an mimmi-abeye an bega sogsasi? ¿An bega sogsasursi, mer be angi dodoye?

29 Degidgi, Eliseo, Gieziʼga sogded:

—Mor-nudak nue-yoo, nae. An-gaapoled be sedo. Igarba be dule abinguardibe, mer ese be golo. E bese gollalile, mer bedi ese golo. Be neg-mosale, machi-bipi-e-wagargi be, an-gaapoled omeso.

30 Geb machi-bipi-e-nan, Eliseoʼga sogded:

—Napira Bab-Jehová-nuggi, an bega sogo: Bab-Jehová beba gudisoggu, walagwen an be-obegosuli.

Degisoggu, Eliseo omegwaba nadsunnad. 31 Gieziʼdi, bato amar-idu negse mosad. Geb Giezi machi-bipi-e-wagargi, gaapoled omesisad. Degi-inigwele, machi-bipi gwen gigli-gigli gussulid. Degidgine, Giezi gannar Eliseoʼse alid. Geb Giezi, Eliseoʼga sogded:

—Amba machi-bipi ataksulid.

32 Eliseo, negse mosgua, e-megedgi machi-bipi burgwar-mai dakdapid. 33 Geb Eliseo, machi-bipi-maidse dogsad. Yawagak edus-imaksad, degi, Bab-Jehováʼse-goted. 34 Bab-Jehováʼse-gochad-sorba, Eliseo, machi-bipi-birgi megisad. Eliseo machi-bipi-e-gayagi, e-gaya nasiksad, degi, e-ibya-innik egi ataksabalid, degine, machi-bipi-e-argangi e-argan-mesisbalid. Degidgine, machi-bipi durgualid. 35 Geb degine, Eliseo, gwisgusad. Negyaba, bire-bire gudii gusad. A-sorba, gannar Eliseo machi-bipi-birgi megisad. Agine, machi-bipi asmialid, ilagugle (7) asmisad. Geb agi, atakalid. 36 Geb, Eliseo, Gieziʼse goted, ega sogded:

—Ome-Sunam-neggweburginedse be gornae.

Degi, Giezi omegwase gorapid. Omegwa Eliseoʼse nonigu, Eliseo ega sogded:

—Be-mimmi be sue.

37 Omegwa dogdeyalaba, Eliseo-mali-naba, yokorgi-sindigar e-wagar-napase-ebulegedse, signonikid. A-sorba, omegwa e-mimmi-susa nodsunnad.

—¡Bab-Dummad-e-duleye, we-mas ina-nusubi!

Agi, bar-guchasurmalad. 41 Geb degi, Eliseo sokalid:

—Madubur anga sedamar.

Geb mas-yagine, Eliseo madubur obatisad. A-sorba, Eliseo sogded:

—Emisgi, gwenadganga mas-wee.

Geb, mas-yagine ina-nusu-nikad surgusad, bar mas ina-nusubi guchasurmalad.

—Gwenadganga mas mimie.

43 E-mai abin-sogded:

—¿Wede unniosi, dulemar-dulataledga (100) an mimier?

Degi, Eliseo, e-mai-abin sogded:

—Gwenadganga mas mimie. Ar weyob Bab-Jehová soged: ‘Mas gunmaloed, degi, amba gwabguoed.’

44 Degisoggu, Eliseo-e-mai na mas mimissunnad. Igi Bab-Jehová, Eliseoʼga sogsa gusa deyobi gunonikid. Bela dulemar mas-guchagu, amba mas gwabgusad.

<- 2 Reyes 32 Reyes 5 ->