Nɑɑmɑŋ tɛɛkɑɣɑ, ɩlɛnɑ ɩ́ kpɛnnɑ liɣitee nyǝɣǝlʋɣʋ kɛ kiloonɑɑ ŋmʋnʋɣʋ nɑ nɩɩnʋwɑ (300). 6 Ḿpʋ́ɣʋ́ ɩ ponɑ lɛɛtǝlɩ, nɑ ɩ́ cɛlɑ Ɩsɛɣɛlɩ wulɑʋ. Pɑ ŋmɑɑ ɩ tɑɑ sɩ: Mɑ́ kʋsǝnɑ mɑ yoolɑɑ nyʋɣʋ tʋ Nɑɑmɑŋ nɑ tɑkǝlɑɣɑ kɑnɛ sɩ, ń wɑɑ-ɩ ɩ ɑsilimɑ kʋtɔŋ. 7 Ɩsɛɣɛlɩ wulɑʋ tɛmɑ-kɛɣɛ kɑlʋɣʋ, ɩlɛnɑ ɩ́ cǝlɩ ɩ wontu, nɑ ɩ́ mɑ́ kɑpukɑ sɩ: Hɑ, ɩlɛ mɑ kɛ́ Ɩsɔ nɑ mɑ́ kʋɣɩ yǝlɑɑ nɑ mɑ́ feesiɣi-wɛ? Ɩ́ nɑwɑ Silii wulɑʋ kɔnɑ-m kʋtɔntʋ sɩ mɑ́ wɑɑ-ɩ tɔ. Mɑ nɔɣɔ kɛ ɩ pɛɛkǝɣɩ mpʋ yoo.

8 Wɑɑtʋ wei Ɩsɔ kʋyɔɣɔtʋtʋ tɛlǝsʋlʋ nɩɩwɑ sɩ Ɩsɛɣɛlɩ wulɑʋ cǝlɑ ɩ wontu, ɩlɛnɑ ɩ́ tili sɩ pɑ́ pɔɔsɩ-ɩ sɩ: Pepe tɔɔ kɛ́ pǝ cɑɑlɑ-ŋ mpʋ pǝ tɑkɑ? Yele-ɩ nɑ ɩ́ kɔɔ mɑ kiŋ, nɑ ɩ́ nyɩ sɩ tɑmpɑnɑ Ɩsɔ kʋyɔɣɔtʋtʋ tɛlǝsʋlʋ wɛ Ɩsɛɣɛlɩ tɑɑ.

9 Ḿpʋ́ɣʋ́ Nɑɑmɑŋ kpɑɣɑ ɩ kɛɛkɛ, nɑ ɩ kpɑɣɑnǝŋ, nɑ ɩ́ polo ɩ́ sǝŋ Ilisee tǝyɑɣɑ nɔɣɔ. 10 Ntɛnɑ Ilisee tili nɔɣɔlʋ sɩ pɑ́ heeli-ɩ sɩ: Polo ń ŋmilisi nyɑ́ tǝɣɩ Yɑɑtɑnɩ pɔɣɔ tɑɑ kɛ́ tɔm nɑɑtosompɔɣɔlɑɣɑ. Pɩɩ tɛ-ŋ tǝkpɑtɑkpɑtɑ.

11 Tǝnɑɣɑlɛ Nɑɑmɑŋ tʋ mpɑɑʋ nɑ pɑ́ɑ́nɑ́, nɑ ɩ́ tɔŋ sɩ: Pʋwɛ, mɑɑ nyǝmɑ́ sɩ Ɩsɔ kʋyɔɣɔtʋtʋ tɛlǝsʋlʋ kɑ́ lɩɩ ɩ mɑɣɑmɑɣɑ kɛ́, nɑ ɩ́ sǝŋ mɑ ɩsɛntɑɑ, nɑ ɩ́ sǝlǝmɩ ɩ Ɩsɔ Tɑcɑɑ, nɑ ɩ́ tokinɑ timpi tɑɑ kʋtɔŋ wɛɛ tɔ nɑ ɩ́ wɑɑ-m. 12 Ɩlɛ Tɑmɑsɩ pusi Apɑnɑ nɑ Pɑɑpɑɑ pɑ tɑ kǝlɩ Ɩsɛɣɛlɩ lɔɔŋ. Ye mɑ cɑɑkɩ mɑɑ yɑɑkɩ tǝnɑ nɑ pǝ́ wɑɑ-m?

Ɩlɛnɑ Nɑɑmɑŋ hɑ siɣile nɑ ɩ́ tɛɛkǝnɑ pɑ́ɑ́nɑ́. 13 Mpʋɣʋlɛ ɩ tǝmlɛ nyǝ́mɑ se ɩ wɑɑlɩ nɑ pɑ́ pɔɔsɩ-ɩ sɩ: Tɑ cɑɑ, ye Ɩsɔ kʋyɔɣɔtʋtʋ tɛlǝsʋlʋ kɑ tʋ-ŋ tǝmlɛ sɔsɔɔlɛ nɑtǝlɩ sɩ ń lɑ, n kɑ́ kpisɑɑ? Ɩlɛ pepe tɔɔ kɛ́ ɩ tɔmɑ sɩ ń yɑ lʋm nɑ pǝ́ wɑɑ-ŋ, nɑ ń kisiɣi?

14 Ɩlɛnɑ Nɑɑmɑŋ tisi nɑ ɩ́ tii Yɑɑtɑnɩ pɔɣɔ lʋm tɑɑ, nɑ ɩ́ ŋmilisi ɩ tǝɣɩ tɔm nɑɑtosompɔɣɔlɑɣɑ, ɩsɩɩ Ilisee heelɑ-ɩ tɔ. Ɩlɛnɑ ɩ kʋtɔŋ tɛ, nɑ ɩ tɔnʋɣʋ mǝlɩ tǝsotosoto, ɩsɩɩ pǝyɑɣɑ sǝkpelɑɣɑ. 15 Ḿpʋ́ɣʋ́ Nɑɑmɑŋ nɑ ɩ nyǝ́mɑ pɑ mǝlɑ kpɑkpɑɑ kɛ Ilisee tɛ, nɑ ɩ́ tɔ́ sɩ: Pǝnɛntɛ mɑ nyǝmɑ́ sɩ Ɩsɔ nɔɣɔlʋ fɛɩ tɛtʋ tɑɑ kɛ́ tiili, ɩsɩɩ Ɩsɛɣɛlɩ Ɩsɔ. Ɩlɛ mɑ sɛɛkǝnɑ-ŋ nɑ wontu tǝnɛ.

16 Amɑ Ilisee tuuwɑ sɩ: Nɑ Ɩsɔ wei ɩ tǝmlɛ mɑ lɑkɩ tɔ, mɑ kɑɑ mʋ pǝ tɑɑ pʋlʋ.

Ḿpʋ́ɣʋ́ Nɑɑmɑŋ cɑɑlɑ-ɩ, ɩlɛnɑ Ilisee kisi. 17 Ɩlɛnɑ Nɑɑmɑŋ tɑsɑ sɩ: N kisɑ mɑ kʋhɑhɑm tɔ, yele nɑ mɑ́ cosi mǝ tɛtʋ kɛ pǝcɔ, ɩsɩɩ kpɑŋɑsɩ nɑɑlɛ sǝɣǝlɑ. Mpi tɔ, Ɩsɛɣɛlɩ Ɩsɔ tike kɛ mɑɑ lɑkɩ ciikuɣu kɔtɑɣɑ nɑ kɔtɑɣɑ ŋkɑ kɔkɔ lusɑ kɑ tǝnɑ tɔ. 18 Amɑ kʋlʋmtʋ kɛ mɑ sǝlǝmǝɣɩ sɩ Tɑcɑɑ ɩ́ wii-m. Ye mɑ cɑɑ Silii wulɑʋ sʋʋkɩ ɩ tʋɣʋ Limɔŋ kutuluɣu tɑɑ sɩ ɩ lɑɑkɩ, mɑɑ sɩɩ-ɩ. Hɑɩ, Tɑcɑɑ tɑɣɑnɩ-m ntɩ ɩnɩ.

19 Mpʋɣʋlɛ Ilisee sɩ: Kpe, Ɩsɔ ɩ́ sɩɩ-ŋ.

Ɩlɛnɑ Nɑɑmɑŋ tʋ mpɑɑʋ.

Nɑɑmɑŋ tɛɛwɑ ɩ tɑ tɩɩ hɑtǝlǝtɑ sɔsɔm. Ɩlɛnɑ 20 Kehɑsi mɑɣɑsɩ ɩ tɑɑ sɩ: Mɑ cɑɑ kisɑ Silii toŋ tʋ ɩnɩ ɩ wontu ntɛ́ yem. Nɑ Ɩsɔ, ɩsɩɩ mɑ se ɩ wɑɑlɩ nɑ mɑ́ mʋ pʋlʋpʋ. 21 Ntɛnɑ ɩ́ se ɑpɑlʋ ɩnɩ ɩ wɑɑlɩ. Nɑɑmɑŋ pǝsɑɑ nɑ ɩ́ nɑ-ɩ mpʋ, ɩlɛnɑ ɩ́ lɩɩ ɩ kɛɛkɛ tɑɑ nɑ ɩ́ ŋmɑɑ ɑtɛ. Ɩlɛnɑ ɩ́ sǝŋɩ-ɩ nɑ ɩ́ pɔɔsɩ-ɩ sɩ: Alɑɑfǝyɑ kɛlɛ? 22 Ḿpʋ́ɣʋ́ sɩ: Alɑɑfǝyɑ kɛ́. Mɑ cɑɑ kʋsǝnɑ-m sɩ Ɩsɔ kʋyɔɣɔtʋtʋ tɛlǝsǝlɑɑ kpekǝle nyǝ́mɑ nɑɑlɛ lɩɩnɑ Ɩfǝlɑyim pulɑsɩ tɑɑ, nɑ pɑ́ kɔɔ ɩ tɛ. Sɩ ń hɑ-wɛɣɛ liɣitee nyǝɣǝtʋ kiloonɑɑ hiu nɑ nɑɑnʋwɑ, nɑ ɑcimɑ wontu kɛ nɑɑlɛ. 23 Ntɛnɑ Nɑɑmɑŋ sɩ: Yele mɑ cɛlɛ-ŋ kiloonɑɑ nɩɩtoso.

Ɩlɛnɑ Nɑɑmɑŋ kɑɑnɑ Kehɑsi nɑ Nɑɑmɑŋ tʋ nyǝɣǝtʋ ntǝɣɩ huluŋ tɑɑ nɑ ɩ́ hɔkɔ. Nɑ ɩ́ cɛlɛ-ɩ tɔtɔɣɔ ɑcimɑ wontu, nɑ ɩ́ sʋkɩ ɩ tǝmlɛ nyǝ́mɑ nɑɑlɛ nɑ pɑ́ tǝŋnɑ Kehɑsi. 24 Pɑ tɑlɑ pulɑɣɑ nɑkǝlɩ, ɩlɛnɑ Kehɑsi mʋ huluŋ nɑ wontu nɑ ɩ́ sʋʋnɑ ɩ tɛ. Ɩlɛnɑ Nɑɑmɑŋ tǝmlɛ nyǝ́mɑ nɑ́ɑ́ mǝlɩ.

25 Wɑɑtʋ wei Kehɑsi mǝlɑ ɩ cɑɑ kiŋ, ɩlɛnɑ Ilisee pɔɔsɩ-ɩ sɩ: Leɣe n lɩɩnɑɑ? Mpʋɣʋlɛ sɩ: Tɑ cɑɑ, mɑ tɑ polo tiili se.

26 Ntɛnɑ Ilisee sɩ: Sɑɑ wei ɑpɑlʋ ɩnɩ ɩ nɑ-ŋ nɑ ɩ́ lɩɩ ɩ kɛɛkɛ tɑɑ nɑ ɩ́ ŋmɑɑ ɑtɛ tɔ, pǝ hʋlɑ-m kɛ́ te. Ɩlɛ pǝ tɑ tɑtɑ sɩ ń hiki wontu kʋpɑntʋ nɑ liɣitee, nɑ ń yɑnɑ Olifinɑɑ nɑ lɛsɛŋnɑɑ tɑwɑ, nɑ tɔlɑ nɑ yomɑɑ ɑpɑlʋnyǝmɑ nɑ ɑlʋnyǝmɑ. 27 Pǝ tɔɔ tɔ, Nɑɑmɑŋ kʋtɔŋ kɑ́ mǝlɩ nyɑnɑ nyɑ́ lʋlʋɣʋ nyǝ́mɑ mǝ tɔɔ kɛ́ tɑm tɔɔ.

Wɑɑtʋ wei Kehɑsi lɩɩ Ilisee kiŋ ɩlɛnɑ ɑsilimɑ kʋtɔŋ wɑɑsɩ ɩ tɔnʋɣʋ tǝnɑ nɑ ɩ́ hʋlʋmɩ tǝlɑɩlɑɩ ɩsɩɩ kponkpomʋlʋm.

<- Awulɑɑ II 4Awulɑɑ II 6 ->