1 Sambasa[~1~] gii doko pateamopa Matia Makatala tange dokopi, Matia Jemesa endangi dokopi, enda Salomipi dutupame Jisasa kai pyala mona latala welepi opale tunduma pingi mendapua sambeami-pyaa. 2 Sandeenya yongama wamba niki pyakaya-kaita malu dokonya peami-pyaa. 3 Dupame pao pituu, “Malu kambu dokonya kana piti petae doko apimi kapilya mina-mina pyoo nyakata laape?” lao mende lamai lamai pyoo peami-pyaa. 4 Pupala kandeaminopa kana doko nyoo kapya latae sia-pyaa. Kana doko etete andake mende-pyaa. 5 Enda[~2~] dupame malu dokonya kolandatala akali yonge pee londe kyoo lapae pingi mende kingi tolae-kaita pilya siasa kandatala mona andao walu leami-pyaa. 6 Dopa[~3~] piaminopa baame enda dutupa lamaiyoo, “Nyakama mona andao walu nalalapape. Jisasa Nasatete tange ita pokonya pyao yukuiyamino doko nyakamame kutilyamino. Baa sakatatalame lamo. Angenya nasilyamo. Baa seteamino panda dake kanjepa. 7 Nyakamame[~4~] pupala baanya disaipele dupapi Pitapi lamaiyoo, ‘Baa wambao Galili yuu dokonya pelyamo. Wamba baame nyakama langiamoli pyoo nyakamame baa Galili yuu dokonya kandatamina,’ lamaiyepape,” lea-pyaa. 8 Enda dupame kamanda pyakalyetala malu doko yakinatala mona andao walu lao paka peami-pyaa. Dupame paka kayamino dokome endakali mende lamaiya nayami-pyaa.

9 [Sandee[~5~] gii dokonya yongama wamba Jisasa sakatatala Matia Makatala tange dokome wambao kandena lao panea-pyaa. Wamba enda doko-kisa enjele koo kalange paleamopa Jisasame watao pyakamaiya-pyaa. 10-11 Jisasa-pipa[~6~] awapa kateamino endakali dupa ee lao yamataka lao peteaminopa, enda dokome pupala dokaita lamaiyoo, “Jisasa lenge tao katamupa nambame kanjona,” lea-pyaa. Dopa leamopa dokaitame sepala pii doko kiningina lao masala nayami-pyaa.

12 Maitakao disaipele dupanya lapoma yuu taono doko yakinatala peambinopa dolapome kandena lao Jisasa waka joo peambino dokonya pea-pyaa. 13 Dolapome pupala disaipele yangi dupa lamaiyambinopa dolapome kiningi lelyambinona lao dupame masala nayamiaka-pyaa.

14 Maitakao[~7~] akali kingi ita mende-kisa dee mendai dutupa nee nao peteaminopa Jisasa baa dokaitame kandena lao ipao panea-pyaa. Dopa petala baa sakatatala paneamopa kandeamino endakali dupame kiningi lelyaminona lao masala nayamino dokonya dokaita pyalanya lao, “Nyakamame kiningina lao masala naenya, tuu pyoo mona pyakilyoo kalyaminona,” lea-pyaa. 15 Dopa[~8~][~9~] latala baame dokaita lamaiyoo, “Nyakamame yuu dupa pitakanya pupala Wai Pii Epe doko endakali dupa pitaka lamaiyepape. 16 Masoo[~10~] minao kaimbu nyetamo endakali doko Goteme pyoo nyeta. Masoo minala nayatamo endakali doko daa latala watao pyata. 17 Masoo[~11~] minatamino endakali dupame kongali datupa pitami. Dupame nambanya kenge doko lao enjele koo dupa watao pyatami. Dee pii tata waka dupa latamiaka. 18 Kanopato[~12~] salenda dupa kingimi minatala koyala nayatami. Tomakai dupa napala kumala nayatami. Endakali yaina pyapae dupa kingimi minataminopa yaina dupa mee jetamina,” lea-pyaa.

19 Kamongo[~13~] Jisasame pii dutupa lamaitiamopa Goteme baa kaiti-kisa lanyia-pyaa. Dopa piamopa baa Gotenya kingi tolae-kaita kalyamo. 20 Disaipele[~14~] dupame yuu dupa pitakanya pupala pii doko lamaiyami-pyaa. Dopa piaminopa Kamongo dokome nyakama-pipa kalai awapa pyoo kongali piamino dupanya baame pii doko angi injisia-pyaa.]