5 Gotenya[~5~] enombanya tolatae jemana latala mana setapae watao miningi dokonya Moseseme lao pituu, “Mana setapae dupa watao minatatamo endakali doko, baa dokonya lete katatana,” lao pii pepa pia-pyaa. 6 Dopaka[~6~][~7~] doko, masoo miningi dokonya-kaita tolatae joo katenge dokonya pii dake silyamo: “Embame embanya mona dokome, (Kataisa laminao isa ipanya) ‘Api kaiti-kisa patape?’ lao masala nayape. 7 Dee,[~8~] (Kataisa laminao ketae pyakalyalanya) ‘Api yuu koko patape?’ lao masala nayapeaka.” 8 Dopaka doko, pii dake silyamoaka: “Gotenya pii lapae doko emba tengesa sepelyamo. Pii doko embanya kambupa monapa dolaponya silyamona,” lapae silyamo. Masoo miningi dokonya lao pii dokoaka naimame endakali dupa lamailyamano. 9 Embame[~9~] embanya kambu dokome, “Jisasa baa Kamongo dokona,” lao lao panawapi, embanya mona dokome baa Goteme malunya sakatasiana lao masoo minawapi pitino kandao doko, emba pyoo nyepae katate. 10 Doko, embanya moname masoo minilinopa Goteme emba tolataena lenge. Dee embame embanya masoo miningi doko kambumi lao panelenopa Goteme emba pyoo nyingi. 11 Gotenya[~10~] pii pepa pyapae dokonya, “Baa lao masoo minatamino endakali dupanya mendaipi mende elya nakayatana,” lapae silyamo. 12 Pii[~11~] doko endakali dupa pitaka kandao lapae silyamo. Doko Jutapi tata waka dupapi tata dolaponya mende mendepale daa. Gote mendai doko naima pitakanya Kamongo. Baame opale epe dupa longo lao baa lao tee lenge endakali dupa maingi. 13 Doko,[~12~] “Kamongo lao kee latamino endakali dupa pitaka pyoo nyepae katatamina,” lapae silyamo.

14 Dopaka[~13~] doko, dupame baa lao masoo minala nayatamino kandao doko, aipa petala baa lao kee latamipi? Dee dupame baanya lao pii doko nasetamino kandao doko, aipa petala baa lao masoo minatamipi? Dee endakali mendeme dupa pii lamaiya nayatamo kandao doko, aipa petala setamipi? 15 Dee[~14~] endakali mendapuame pii lamaiya pena nalatamino kandao doko, aipa petala dupame pii lamaitamipi? Gotenya pii pepa pyapae dokonya, “Endakali dupame wai epe mende langyanya minao epelyami dupa kandao taeme ipamini lamo lao tama pingina,” lapae silyamo. 16 Dopaka[~15~] doko, endakali dupa pitakame Wai Pii Epe doko watao minala nayami. Dokonya Aisayame lao pituu, “Kamongo, naimame pii lamaiyamanopa siamino doko apimi masoo minao kalyapena?” lea-pyaana lapae silyamo. 17 Dopana,[~16~] pii singi dokonya masoo miningi doko pyakalyingi. Dee pii singi doko Kataisanya lao pii lamaingi dokonya singi.

18 Dopaka[~17~] doko, nambame lelyona, kini dupame pii lapae doko sala nayamipi? Sepeami daape!