Ado Mala Hedabi Magaea Dëdëi

1 Godeïe malö Yesu Gelesoïe Ado Mala Hedabi dafidi mi gäwi amo gowe. 2 Godeïe ado säla ïlo Aisaeaea dafidi bea säla ïe bebagi ado gowe dëdëla negei amo dialea.

9 Segeyo afädë amo galamu Yesu e Galili segeïe gaamu Nasalesela maasebegi, Yonea Yesu ödä Yodonagi gei. 10 Yesu ödägi gela ödägila agesua fodolo aliga adogoi amole, mu dusuia gase amo melï. Amala dusuia gasebegi, Gesami haea maliabu gadoi digalahilä ema fisebe amo melï. 11 Beaha nebegi, selesaia mosöalahilä ado säia idogosalea sähalea, Nïe malöfalïe, na di boba hamolahilä dima obeägï edefademalä neawela säi.

12 Ado säha maadesebegi, Godeïe Gesamia Yesu sege nafade udia dolö aligisia made ami mosaloi. 13 Amala sigi awäla ifosisebegi, e ami segeyo nabülasi biyidia nelo. Yesu neebea ami mugabe Saidania ea nafade hamomabelela fedogola bimolö misi. Yesu sugua ilaba elö elöi neebea ami nebegi, selesaia fiia e ugila negemolö misi.

14 Yone nafodola negei nebegi, Yesu e Galili awälahilä Godea Beaha Maadela Sigi Neebe amoïe Ado Mala Hedabi säla ïaha nelo. 15 Yesuea sähalea, Segeyo daiala negei dilo amo walio gogi gausiala digasebego. Godea Beaha Maadela Sigi Neebea ami namolö amo ga madefalï dialeamelë. Dili asigi besula Ado Mala Hedabi gomu gaula mogomalola säla ï.

16 Yesu e Galili oeabo agesu amogi awäha nea beahamelebe seme digiilo dolö äudä Saimonoge ïe edoo Ädulule seme selëgë digiisa neebe melï. 17 Bealahilä Yesuea elema sähalea, Ne awäsewe gadola bëgëla misië. Alia udia dolö nimäia. Na alima neala oleledeläla säi. 18 Amala säsebegi, elea fodolofalï selëgë negesilahilä e bëgëla asi. 19 Yesu e holöbö sedade awälahilä beahamelebe Sebediïe malö Yemesege ïe edoo Yone dudaia nea selëgë hamogisa neebe melï. 20 Bealahilä fodolofalï ele wesebegi, elele eedo Sebedige bidi nimolö hamoi hamosa nefolalo amolige dudaia amilahilä ele Yesu bëgëla asi.

21 Ili Gabaniama beselagalalahilä salea. Segeyo Sabada gafegi*1.21 Segeyo Sabadada Yu udia dolö ilile hele aligilo segeyoge, amase, Godeïe ëi gauia adalo segeyoge dilo. Godea sege föi dibe amo sulubadela segeyo gafeiagi hamosa maadelahilä, segeyo gifalädalügi hï e hele fila sulo. Isilale udia dolö ilia amo gadola hamomäia, ea segeyo Sabada daiai. Segeyo Sabadada Edolo nilïada gafela sälo. Mi Gäwi 2.2-3ge, Sigi Obëgëi 20.8-11ge bimalo. Yesu e gedolo mosöa awälahilä ea mala säla olelesa nelo. 22 Mala dawadigi amolia säla olelelo amo gadola made, Yesuea geloi gaulahilä, geloi hïdo elöi olelesebegi, udia dolö sefolalo amolia nabalahilä ili asigigi fudugisa sefolalo. 23 Segeyo amo gala amala olelesa nebegi, dolö mugabe fedai afädë gedolo mosöa ami maala sulo amea üalalahilä sähalea, 24 Nasalese dolö Yesuo, nilï neebea wida dia abilia hamodelä misi. Nilï nufudadigidelä misile. Dida na dawa. Dida dolö mogoi hedabifalï Gode hï e neebeala misimelëla säi. 25 Amala säsebegi, Yesuea mugabe amoma nemola sähalea, Adomabu. Dolö go dïgïlahilä hä mosöla säi. 26 Amala säsebegi, mugabe amea dolö amo neala amulämelasilahilä üalalahilä doadigila asi. 27 Amala hamosebegi, udia dolö sulubadela sefolalo amolia fudugilahilä hilidomu sëdäwala säla didigala sähalea, Walio hamoi amo edodu. Mala gähe amo gabu. Walio dolö goea ado säi amoda geloi hïdo elöi gelola säimelë. Ea mugabema säseda, mugabea nabala hamolo gabula säi. 28 Yesuea hamoi amo udia dolö Galilimadi nefolalo amoli sulubadelaea nabala didigai.

29 Ili gedolo mosöa amila doadigila fedala Yemese Yonelebalä awäla Saimono Ädululele mosöa beselagalai. 30 Saimonoïe esöa hëgï olo oloi dibegi ilia Yesu maasebegi, ema fodolofalï säla ï. 31 Säla ïasebegi, Yesu e udia oloi dibea ami awälahilä ea naabogi neawela nowela ifosi. Amala hamosebegi, hëgï dafidi dilo amo hogosa helela wahilahilä udia amea ili molö muäia neala ï. 32 Deadi eso digase gaalu, udia dolö nefolalo amolia oloi difolalo amo neala gaula, mugabe fedai nefolalo amoge sigi gaulala Yesu neebea gegedoi. 33 Udia dolö ami nefolalo amoli sulubadela maala mosöa nogila digalo idi galo mia ami gegedola nefolalo. 34 Amala hamosebegi, Yesuea udia dolö yafie olo elö elöla oloi dilo amo wahiladigi, mugabe fedai yafie nefolalo amo nesiladigiladigisa nelo. Amala hamosebegi, mugabe amolia Yesu eda gowe neala dawadigi nefolalo. Amalebeda Yesuea mugabe amolima sähalea, Dilia sämabula säi.

35 Segeyo sagala digaia made Yesu e yosefalï doadigila awälahilä udia dolö aligilo made dibea ami Godema adosa sulo. 36 Saimono ebalä nefolalo amolia Yesu e hohogola hobeala bëgëi. 37 Beagolelahilä ema sähalea, Neebe amoli sulubadelaea di hogosa neamelëla säla ï. 38 Amala säla ïasebegi, Yesuea säla obëgësalea, Sege gaamu ga made dibea ami ado mala oleledelä afiadi. Neda hamoi amo hamomolö misimelëla säi. 39 Amala sälahilä Galili sege sulubadelamadi nawesa nea gedolo mosö neebeadi ami awälahilä Yesuea ado mala säla oleleladigi, mugabe fedai nefolalo amoli nesiladigisa nelo.

40 Amala hamosa nebegi, dolö gudubu hamoi afädë Yesu neebea ami maalahilä emo gumu sasagala fia idogola salea sähalea, Dia ne wahimäiala helësëseda, hä dia ne wahilasimolöi nebegola säi. 41 Amala säsebegi, Yesuïe isogi edefademalä bobasëmolöea nobalahilä, ïe naabo mogodigia gala, dolö amo diigisalea sähalea, Na amala helësësa, wahimola säi. 42 Amala hamosebegi, gudubu hamoi amo fodolofalï hogosa helelahilä wahii. 43 Yesuea dolö amo fodolofalï mosalola sälahilä amoma gelolafalï sähalea, 44 Dofä asiala elöma säloeo. Di wahii go odoama säla ïmabio. Gobela ïlo dolö neebea ami di siia bimäia olemolö mosalo. Amalahilä, di wahii go ilima olemolöïe, Mosesea säla negei dibe amo gadola nelebo afädë odala ïmalola säla ï. 45 Amala säla ï amo nabalahilä gaso, dolö amea awäha nea hamoi amo säla ïïa awäha nelo. Amala säsebegida Yesu e gaamu dibeadi amogi ilile siigi moholöi made beala udia dolö maadeido gasi gala nelo. Amala nebegi, udia dolö yafie sege dibe sulubadelagila Yesu e neebea ami mafusa nelo.