Languages
95
Bu Karrimarneboddan Dja Karrimarrkmang Yawey Nawu Kawohrnan Rowk.
Psalm 95

1 Mah, wanjh ngurrimray karriwayinin nuye nawu Yawey, dja karrimarnemarrmarrnin! Kab karrikayhmen bu karriburluburlume nungka nawu kanngehke kadberre. 2 Karrimirndemornnamerrimen kore kumirrk nuye bu karriwernhmanjbun, dja mak karriwayinin nuye dja karrimarnedirri music dorrengh.

3 Kuhni karrikurduyime dja nungka nawu Yawey nakka djalwernhdulkarrekimuk dja nakimuk God duninjh, dja mak king duninjh nawu kabenyurrhke bedberre birribubuyika gods. 4 Nungka kakarrme kubid nuye kanjdji duninjh kore kondanjkunu kurorre, mak manbu manwarddekuyeng kaddumkah, makka warridj nungka nuye. 5 Mak manbu kurrula, makka nuye rerrih, dja wanjh nungka marnbom. Dja mak nungka welengbolkmarnbom mahni kurorre kunbidwi nuye.

6 Mah, wanjh ngurrimray karrimarneboddan nuye Yawey dja karridjalburluburlumen. Nungka kanmarnbom kadberre, wanjh karridjalmarnebarddurrukkurlhdan kore kumirrk nuye. 7 Nungka wanjh God kadberre, dja kannahnan ngad nuye bininj, yiman kayime shepherd kamirndenahnan mayh nawu sheep kore kubolkmak nuye.

Wanjh bolkkime ngurribekkabekka kore nungka kawokdi, kore kayime, 8 “Yuwn bu ngurrikangerayekworren dja kandibodmekenhwon yiman birriyimeng nawu mawahmawah ngudberre kore bolkngeyyoy Meribah dja Massah kore kubolkdarleh.[~1~] 9 Kumekbe nawu mawahmawah ngudberre ngandirohrokmeng dja ngandiwiddjungi, dja kunukka birribengmidjdanj kore ngandikurdunani ngaye bu kunmak ngabenhmarnekurduyimi.[~2~] 10 Wanjh kundjalkuyengkenh ngaye ngabenyiddungi bedberre bininj bu kudjewk forty, dja ngayimeng bedda minj birrimayalimak bininj, dja minj nganwokmarrkmayinj kore ngadjareni bu birrirawinj. 11 Wanjh kumekbekenh kunu ngayidduy dja ngawokkurrmerrinj bu minj kabirringimen kore ngayekenh ba bu kabirringehme.” [Exodus 17:7][~3~]

<- Psalms 94Psalms 96 ->