Languages
28
1 Tuwo livalayana Aisake inove, Yakobo iduduwe ima, ikaipakuye. Ikaipakuye ikavava, idigo kana,
‘Natugu, taabu Kenani vavinaina kunaināi. 2 Go sem kūna asa Padani Aram. Amoko goi kūna sinam tamana Betuweli ina vada goi. Vavina tayamo doiyam Lebani natunao yaidi goi kukābi kunāi. 3 Yaubada Tokalika im nai bei ikaipakuye, e bei ina guinuwa goi kususáila, tubumowo badabadaaidi. Tauna kom boda badabadaidi tubudi. 4 Aiyuwoina ina kaipaku Eberamo yaina bei ivadamane iwo kom ma tubumowo yaimi,[a] e nava ame poyapoyayana goi kueeogaoga bei kokabi imi kaba lovina. Ame poyapoyayana boi Yaubada ikatotule Eberamo yaina bego tubunao ivinidi.’[b]

5 Aisake ibóbwara ikavava, Yakobo ietune ina Padani Aram. Padani Aramyana moe Yakobo be Iso doiyadi Lebani ina kasa; Lebaniyana tamana Betuweli guma Aram.

6 E Iso livala inove bego tutayana tamana Aisake Yakobo ikaipakuye, isanabode kana, ‘Taabu Kenani vavinaina kunaināi’ go, ivaduduwe ietune ina Padani Aram bego vavina tayamo inai. 7 Aiyuwoina inove bego Yakobo tamadi be sinadi sopadi bogina ikabikaone, tauna bogina ina Padani Aram. 8 E moeko goi bogina iyagoi boi Kenani vevinaidi inaidi, tamana Aisake ikataedi. 9 Tuwo Iso latuwona vavina tayamo tuwaina inai, e ina tamana siyana Isimaeli igite bei tauyana natuna yoina Malate inai. Malateyana siyana Navayota. Moeko goi Iso ivakeyauwo, Malateyana moe monena aitonina.

Yakobo ina kanamimi tetelina

10 E Yakobo itaoya, asa Bera Siva ikalave go, iketoiya ina asa Karani. 11 Inonoina go, ima tayamo asa ibabane, e amoko goi ikanaliya. Bogina kuyagoi. Níyala bogina isaliu. E mainao asayana goi dídiya tayamo ikabi, iyato ilogédava, e amoko goi imasisi. 12 Go ina masisiyana goi ikanamimi. Ina kanamimiyana ame nakae: Aitámana tayamo igite poyapoya goi iitaoya go, sipona ituko ina yábana. Go Yaubada ina aneroseyao situkotuko nakae sisousou.[~3~] 13 Aitamanayana kikina[~4~] Yauwe itataoya idigo kana,

‘Yau Yauwe, tubum Eberamo be tamam Aisake idi Yaubada. Moe poyapoyayana goi kuumasisi, kom mam bodao bei avinimi.[~5~] 14 Im boda adi badabada bei ivakaigaga![~6~] Tuwo im bodayana bei poyapoya ame madabokina situgidagidali, tauna sina bomatu dadavina, youya dadavina, koiboga dadavina be nakae yawéyana dadavina. Boda liliudi poyapoya goi bei siyagoi kom be im boda[~7~] pasidi akaipakuyedi.[~8~] 15 Kunōve. Yau avakiitaum, tuwo nako goi kuna Yau bei avabodebodem gobe akaluvilemneim amem poyapoya ame goi. Moitamo. Geya akalavemta. Bei avakiitaum ana kadókana aguinuwe nakae bogina akatotule yaim.’

16 E Yakobo masisi goi itaoya go, inuwonúwana kana,

‘Moitamo Yauwe ameni asa ame goi go, mainao geya ayagoiyeta.’
17 Go tauyana atena iyova gagaina toina, idigo kana,
‘Iyaa! Ame poyapoyayana moitamo aba kateyova gagaina toina! Ame moitamo Yaubada ina vada; nakona yábana ana kaba siu!’

18 Tuwo vanuwo itomo nobuyana giyaina goi Yakobo itaoya go, didiyayana iloogedoi ikabi, ivataoe. Didiyayana aba kinana bego poyapoya amo kimaasabaina Yaubada umana. Ivataoe ikavava, didiyayana ikimasabe Yaubada umana ame nakae: Didiyayana goi oribe putumina isiwoi. 19 Ikavava, asayana boi yoina Lusi go, ivayou Beteli. 20 E Yakobo ikatótula Yauwe yaina idigo kana,

‘Yaubada, neta moitamo kom kuvakiitaugu be guna ketoiya goi kuvabodeebodegu, neta avagu be guna kwama kuvinigu 21 ana kadókana akaluvila ana tamagu yaina magu dedevina, e Yauwe kom bei avayokoim yau guna Yaubada. 22 E ame didiyayana bogina aavataoe bei akimasabe, moe Yaubada im vada, bei ameko goi kai tomota kasakululu yaim. Kaga liliuna kuuvinigu bei akaiguyauye aiguyau ana badabada yawou, e tayamo avinim.’

<- ABA VATOWO 27ABA VATOWO 29 ->