Languages
46
Yakobo ina bodao ikabidi, taiyao sina Itipita tetelina

1 E tuwo Isileli itaoya konana ikatubayasidi. Ikatubayasidi ikavava, e ina bodao taiyao siketoiya sina asa Bera Siva goi. Amoko goi yoguyogu ikabidi, ikaumatedi ikailagasidi aba kasala goi igabudi, ikasaledi Yaubada yaina. Ame Yaubadayana yaina tamana Aisake nakae boi isaakululu. 2 E sabamgo goi Yaubada ina Isileli ikatuwoini idigo kana,

‘Yakobo! Yakobo!’
‘U, yau amegu’, Yakobo kaena.
3 E Yaubada idigo kana,
‘Yau Yaubada. Yau yaigu tamam boi isaakululu. Taabu kuumatōita bego kusou kuna Itipita goi. Moitamo. Amoko goi bei akisailim, e bei tubumowo boda tayamo gagaina. 4 Yau bei avakitaum tutayana kusou kuna Itipita goi. Go niga bei tubumowo akaluvilemneidi poyapoya ame goi sikaiyaka. E kina go natum Iyosepa im tuta ámasa goi bei ikaaiyaka yaim, e bei itoboine matam itapopoli.’

5 E tuwo Yakobo imasisi. Imasisi vanuwo itomo, itaoya, dedeogayadi boi Pero ieetunedi goi isowoya itulaga tubunao be natunao monediyao taiyao. Sisowoya ikavava, Bera Siva sikalave. 6 Idi yoguyoguyao be konadi liliudi Kenani goi sibaabanedi, sikabidi, e sinavedi Itipita goi. 7 Yakobo natunao be tubunao liliudi inavedi Itipita goi.[a]

8 E ame Isileli natunao be tubunao koroto madi bodayauwo sina Itipita. Yoidi ame nakae:

Rubeni moe Yakobo ina botomoya. 9 E Rubeni natunao koroto yoidi ame nakae:
Enoki,[b] Palu, Esironi be Karami.
10 E Simioni natunao koroto yoidi ame nakae:
Yamweli,[c] Yamini, Owadi, Yakini, Sokara[d] be Saulo.[e] Sauloyana sinana Kenani vavinaina.
11 E Livai natunao koroto yoidi ame nakae:
Gerasoni, Kowate be Merari.
12 E Yuda natunao koroto yoidi ame nakae:
Era, Onani, Seile, Peresi be Serako.[f] Ego Era be Onani Kenani goi sikámasa.
Peresi natunao koroto ame nakae:
Esironi be Kamla.
13 E Isakara natunao koroto yoidi ame nakae:
Toli, Puva, Yobi[~7~] be Simroni.
14 E Sebuloni natunao koroto yoidi ame nakae:
Seredi, Eloni be Yaliyela.

15 Amo Yakobo natunao koroto nakae natuna vavina Daina Padani Aram goi Reya ivenatunidi. Natunao be tubunao liliudi Reya goi adi badabada tetiteri (33).

16 E Gadai natunao koroto yoidi ame nakae:
Sipiyoni,[~8~] Agi, Suni, Esiboni,[~9~] Eri, Arodi be Areli.[~10~]
17 E Aseri natunao koroto yoidi ame nakae:
Imna, Isiva, Isivi, Bariya. Ego niudi yoina Seraka.
Bariyayana natunao koroto yoidi ame nakae:
Keveri be Malikiyeli.

18 Amo Yakobo natunao koroto Silipa ivenatunidi. Boi Silipayana Lebani ina pákwana go, natuna Reya ivini. Yakobo natunao be tubunao liliudi Silipayana goi adi badabada yawou ainima tayamo.

19 E Yakobo monena Reitiyeli natunao koroto adi taiyuwo ivenaatunidi yoidi Iyosepa be Beniyamina. 20 E Itipita goi Iyosepa monena Asenati ivenátuna, natunao koroto adi taiyuwo, Manase be Eparaim. Asenati tamana Potipera, tauyana Tonúwala asa Oni goi.[~11~]

21 E Beniyamina natunao koroto yoidi ame nakae:
Bela, Bekeri, Asibela, Gera, Namani, Ei, Rose, Mopima, Kupim be Aridi.

22 Amo Yakobo natunao koroto Reitiyeli ivenatunidi. Yakobo natunao be tubunao madabokidi Reitiyeli goi adi badabada yawou aivasi.

23 E Dani natuna koroto yoina Kosim.
24 E Napatali natunao koroto yoidi ame nakae:
Yasiyela, Guni, Yeseri be Silem.

25 Amo Yakobo natunao koroto Bila ivenatunidi. Boi Bilayana Lebani ina pákwana go, Reitiyeli ivini. Yakobo natunao be tubunao liliudi Bila goi adi badabada ainima aiyuwo.

26 E Yakobo natunao be tubunao liliudi taiyao sina Itipita goi adi badabada sikstisikisi (66). Go natunao monediyao geya sikatuyaividita. 27 Ego Iyosepa natunao adi taiyuwo Itipita goi sibíbina. Neta kidi taiyao Yakobo ina bodao liliudi sina Itipita goi adi badabada seventi (70).[~12~]

Yakobo mana bodao Itipita goi

28 E Yakobo natuna Yuda ietune ina Iyosepa goi bego tauyana Goseni ina kenao ikatukede. Tuwo nakae iguinuwe. Ikavava, ikaluvila ima, e madabokidi taiyao sisowóduwo Goseni dadavina goi, moe Itipita sinaena. 29 Tutayana sisowóduwo, Iyosepayana ina pakonayao ina sariyota sikatubayasi. Ikavava, e ituko ina Goseni dadavina bego tamana ivalobode. E isowóduwo Goseni dadavina goi ikandobala tamana igite, isou ina tamanayana ivayavau nukotona iyoisi, iyowoi go, itáiya tuta maanawena. 30 Go Isileli natuna Iyosepa ilatuwoko idigo kana,

‘O natugu! Ame tuta itoboinegu magu tuboina akámasa. Toinigu matagu goi bogina agitem kom maa yawoim, tauna auyáwana gagaina.’
31 E Iyosepa tamana be senao ilatuwokoidi idigo kana,
‘Tamagu be segowo, ame tutayana ana Pero alatuwoko kagu,
“Segowo boi Kenani goi sikaaiyaka bogina sima. 32 Tauyadi sipi adi tomatakavata. Idi paisewayana goi yoguyogu liliudi simatakaavatedi. Idi yoguyoguyao madabokidi, idi sipi, idi goti be idi bulumakau nakae konadi liliudi bogina simedi.”
33 E tauna tutayana Peroyana iduduwemi, e kōna bei ilumadademi kana,
“Kaga imi paisewa?”
34 E komi kodīgo kami,
“Kai im pakonayao yoguyogu adi tomatakavata boi nimatu tubumao nakae ima ame tuta.”
Neta nakae kobóbwara, bei itagonemi Goseni goi kokaiyaka. Bogina koyagoi. Da Itipita yoguyogu adi tomatakavatayao sinumolaitedi.’

<- ABA VATOWO 45ABA VATOWO 47 ->