Languages
2
Yandemahemoha tuprɨra yande pɨ̃sɨrosa rese

1 Sese iyacatu co ñehesa yasendu vahe rese yayapɨsaca tuprɨ catu co tecocuer pɨasu sui yande yepepɨẽhɨ ãgua. 2 Esepia, co Tũpa rembiguai remimombehugüer seroyaprɨ ité secoi, iyavei oyemboangaipa vahe, ndovɨroyai vahe avei imombaraɨsuprɨ ité sembiapo rupi yuvɨrecoi aracahe. 3 ¿Mara yahera pĩha evocoiyase yande yañemi Tũpa ñemoɨrosa sui viña acoi ndayandemahemoha tuprɨise co yande pɨ̃sɨrosa avɨye vahe rese? Esepia, yande Yar ahe rane ité omombehu co ñehesa ñepɨsɨrosa resendar. Ipare sendusar, “Supi eté co ñehesa” ehi yuvɨreco. Ichui ahe avei omombehu yuvɨreco yandeu. 4 Iyavei Tũpa oyapo setá mbahe yavai rai vahe poromondɨisa ndayasepiai vahe. Iyavei oEspíritu Santo pɨpe, omboyoavɨratɨ mbahecuasa imbou yandeu güemimbotar rupi ‘toicua yuvɨreco co ñehesa supi tuprɨ vahe’ oyapave.

Jesucristo ava nungar tuprɨ secoi

5 Ndahei güembiguai povrɨve omondo Tũpa ɨvɨ oime vaherã, acoi oromombehu vahe pẽu. 6 Oime rumo icuachiaprɨ aracahendar pɨpe omombehu tuprɨ vahe:

“Che Yar, ¿uma vo evocoiyase ava?
¿Mahera ndemahenduha ava tẽi rese, iyavei eresãro no?
7 Ndaseta arɨimi erereco ɨvɨ cotɨ catu nde rembiguai sui.
Ipare voi rumo eremondo nde porañetesa imboeteisave chupe.
8 Iyavei opacatu erereco uca mbahe nde rembiapo ipovrɨve” ehi imombehu.
Ẽgüe ehise Tũpa, ndoseyai eté que ñepei yepe mbahe ipo pendarẽhɨ. Cũritei rumo ndaopacatu tuprɨ vɨtei mbahe ipovrɨve. 9 Yaicua niha Jesús, ahe Tũpa güembiguai sui ndaseta aravɨter ɨvɨ cotɨ catu vɨreco. Oporoaɨsusa pɨpe oipota imano ãgua opacatu ava repɨrã. Cũritei rumo iyemombaraɨsu pare, omondo oporañetesa imboeteisave chupe.

10 Iyavei opacatu mbahe oime Tũpa upe, ichuindar avei ‘toyuvɨroique opacatu che rahɨr che reco porañetesave’ oyapave. Sese omombaraɨsu uca Guahɨr Jesucristo ‘tomboavɨye tuprɨ rane che remimbotar Poropɨ̃sɨrosar güeco ãgua’ oya. 11 Esepia, opacatu vɨreco ñepei Vu yuvɨreco co seco catuprɨ vahe, seco mbocatuprɨsar avei. Sese Tahɨr nochi eté, “Che rɨvɨreta peico” ohe ãgua vɨroyasar upe. 12 Ahe aipo ehi icuachiaprɨ aracahendar pɨpe:

“Añehera nde rese che rɨvɨreta upe.
Asapucai aveira sapucaisa ndeu opacatu ava ndeu oñemonuha vahe pãhuve” ehi.
13 Iyavei aipo ehi:
“Che ayeroya itera sese” ehi.
Ichui aipo ehi iri:
“Co oroico Tũpa rahɨr cheu ombou vahe rese” ehi icuachiaprɨ pɨpe aracahe.

14 Inungar ava vɨreco vahe guahɨr, oyoya soho, suvɨ; ẽgüe ehi avei Jesús vɨreco voho, vuvɨ yande nungar; omano pɨpe sui omocañɨ vaherã iporoyuca ai vahe pĩratasa; ahe Caruguar. 15 Opacatu ava manosa sui osɨquɨyesa pɨpe mbiguai tẽi nungar yuvɨrecoi vahe güecove vɨteseve, evocoi nungar sui senose ãgua, ẽgüe ehi Jesús. 16 Esepia, ahe ndoui Tũpa rembiguai pɨ̃tɨvɨi ãgua, ahe rumo ou Abraham suindareta pɨ̃tɨvɨi ãgua. 17 Sese niha tɨvɨreta nungar tuprɨ ité oyapo Tũpa, “Toime che rovaque pahi rerecuar ɨvate catu vahe seco tuprɨ vahe; taseco mbegüe avei, tomondo güetecuer ava angaipa repɨrã ñeroisa reime ãgua” ehi. 18 Esepia, ahe avei oiporara Caruguar poroãtoisa. Sese cũritei ahe oicatu ité ava Caruguar remiatoi pɨ̃tɨvɨi ãgua.

<- HEBREOS 1HEBREOS 3 ->