1 BOEIPA kah paipi thingkawng te Zion David khopuei lamloh Jerusalem kah manghai Solomon taengla khuen ham Solomon loh Israel a ham rhoek, koca rhoek kah a lu boeih, Israel ca rhoek kah a napa rhoek kah khoboei rhoek, koca kah a lu boeih te a tingtun sak. 2 Te dongah Israel hlang boeih te manghai Solomon taengla Ethanim hla, a hla rhih dongkah khotue vaengah tingtun uh.
3 Israel kah a ham rhoek boeih a pawk uh neh khosoih rhoek loh thingkawng te a koh uh. 4 BOEIPA kah thingkawng te a khuen uh tih tingtunnah dap neh dap kah hmuencim hnopai boeih te Levi khosoih rhoek loh a khuen uh. 5 Manghai Solomon neh thingkawng hmai ah anih taengla amah neh aka tuentah uh Israel rhaengpuei boeih loh a khawk la boiva neh saelhung a nawn uh te daek uh lek pawt tih tae uh lek pawh. 6 Te vaengah khosoih rhoek loh BOEIPA kah paipi thingkawng te im khui kah cangimphu khuikah amah hmuen la a khuen uh. Te te cherubim phae hmui kah hmuencim kah hmuencim la a khueh. 7 Cherubim loh thingkawng hmuen te phae a phuel thil tih cherubim loh thingkawng so neh a so kah a cung soah a khuk. 8 A cung te a hlawt van dongah a cung hmoi te cangimphu hmai kah hmuencim lamloh tueng. Tedae poeng lamloh tueng pawt cakhaw tahae khohnin duela om. 9 Thingkawng khuiah Horeb ah Moses loh a khueh lungto cabael rhoi phoeiah a tloe om pawh. Egypt kho lamloh a coe uh phoeiah teah ni BOEIPA loh Israel ca rhoek taengah paipi a saii.
10 Hmuencim lamloh khosoih rhoek a khoe uh vaengah tah BOEIPA im te cingmai loh a khuk. 11 BOEIPA im te BOEIPA kah thangpomnah a bae dongah khosoih rhoek khaw cingmai hmai ah thohtat ham pai uh thai pawh.
12 Te vaengah Solomon loh,
“BOEIPA loh yinnah khuiah khosak ham a thui coeng.
13 Namah loh kumhal due kho na sak nah ham
hmuen la na imhmuen kah im a sak khaw ka sak coeng,” a ti.
14 Te phoeiah manghai loh a maelhmai te a hooi tih Israel hlangping boeih te yoethen a paek vaengah Israel hlangping boeih khaw pai uh. 15 Te vaengah,
“Israel Pathen BOEIPA tah a yoethen pai.
A ka neh a pa David taengah a thui tih
a kut neh a soep sak.
16 'Ka pilnam Israel te Egypt lamkah ka khuen khohnin lamloh
ka ming om sak ham neh im thoh sak ham
Israel koca boeih khuikah khopuei te ka coelh moenih.
Tedae David te ka pilnam Israel soah om sak ham ka coelh,' a ti.
17 Israel Pathen BOEIPA ming la im sak ham he
a pa David kah thinko ah om coeng.
18 Tedae BOEIPA loh a pa David te,
'Kai ming la im sak ham na thinko ah a om bangla
na thinko ah a om ham khaw then.
19 Tedae nang loh im na thoh pawt vetih
na pumpu lamkah aka thoeng na capa lat long ni
kai ming ham im a thoh eh,' a ti nah.
20 BOEIPA loh a thui ol te a cak sak dongah
a pa David phoeiah a thoh.
Te dongah ni BOEIPA kah a thui bangla
Israel kah ngolkhoel dongah ka ngol tih
Israel Pathen BOEIPA ming la im ka sak.
21 Te phoeiah Egypt kho lamloh amih a khuen vaengah
a pa rhoek taengah a saii BOEIPA kah paipi thingkawng ham
hmuen pahoi ka khueh,' a ti.
Solomon Kah Thangthuinah
22 Te vaengah Solomon te Israel hlangping pum hmai kah BOEIPA hmueihtuk hmai ah pai tih a kut te vaan la a phuel. 23 Te phoeiah,
“Israel Pathen BOEIPA aw,
namah bang Pathen a so kah vaan ah khaw,
a dang kah diklai ah khaw a om moenih.
Na mikhmuh ah a lungbuei boeih neh
aka pongpa na sal rhoek taengah
paipi neh sitlohnah na ngaithuen coeng.
24 A pa David amah taengah na thui te
na sal taengah na ngaithuen.
Na ka neh na thui tih
tahae khohnin kah bangla na kut neh na soep sak.
25 Te dongah Israel Pathen BOEIPA aw,
a pa David amah taengah na thui te
na sal ham kha ngaithuen dae.
'Ka mikhmuh ah na pongpa bangla,
ka mikhmuh ah pongpa ham
na ca rhoek a longpuei te a dawk ngaithuen uh atah
ka mikhmuh kah Israel ngolkhoel dongah aka ngol ham
nang kah hlang pat mahpawh,' na ti.
26 Te dongah Israel Pathen aw,
na ol te na ol bangla, tangnah mai laeh.
Te te namah kah sal,
a pa David taengah na thui coeng.
27 Tedae Pathen he diklai ah ngol tang nim?
Vaan neh vaan phoeikah vaan rhoek long pataeng
nang n'cangbam uh thai moenih.
Te dongah he im ka sak long aisat he.
28 Tedae na sal kah thangthuinah neh
anih kah lungmacil taengla mael lah.
Ka Pathen BOEIPA aw tamlung neh
thangthuinah te han ya lah.
Tihnin ah na sal he
na mikhmuh ah thangthui coeng.
29 “He im soah khoyin khothaih na mik dai thil lah.
Te hmuen ah,
“Ka ming pahoi om saeh,” na ti.
Te dongah na sal loh he hmuen la a thangthui vanbangla
thangthuinah te hnatun pah.
30 He hmuen la a thangthui uh vaengah,
na sal neh na pilnam Israel kah lungmacil te hnatun pah.
Namah loh na khosak nah hmuen ah hnatun pah.
Vaan lamloh na yaak vaengah khaw khodawkngai pah.
31 Hlang he a hui taengah tholh tih
tap hamla a soah thaephoeinah a khuen tih ha pawk vaengah
he im kah na hmueihtuk hmai ah a tap atah,
32 Namah loh vaan lamkah hnatun lamtah rhoi pah.
Halang boe sak ham na sal rhoek te laitloek pah.
A khosing te amah lu ah khueh pah.
Aka dueng tang sak ham te a duengnah bangla
anih ham khueh pah.
33 Na pilnam Israel khaw na taengah tholh uh tih
thunkha mikhmuh ah a yawk vaengah,
namah taengla mael uh tih
na ming te a uem uh vaengah,
he im ah namah taengah thangthui uh tih
rhennah a bih vaengah,
34 namah loh vaan lamkah hnatun lamtah
na pilnam Israel kah tholhnah te khodawkngai pah.
Te phoeiah amih te a napa rhoek taengah
na paek khohmuen la mael puei.
35 Na taengah tholh tih
vaan ke a khaih dongah khotlan a om pawt vaengah,
he hmuen la thangthui uh tih
na ming te a uem uh vaengah,
amih te na phaep tih a tholhnah lamloh na mael uh vaengah,
36 namah loh vaan lamkah hnatun lamtah
na sal rhoek neh na pilnam Israel kah
tholhnah te khodawkngai pah.
Longpuei then te amih thuinuet lamtah a
khuiah pongpa uh saeh.
Te vaengah na pilnam taengah
rho la na paek na khohmuen ah khotlan pae.
37 Khohmuen ah khokha pai tih
duektahaw vaengah, mawn neh dung,
kaisih neh phol a tlung vaengah,
a khohmuen vongka ah
a thunkha om tih anih te a daengdaeh vaengah,
nganboh boeih neh tlohtat cungkuem vaengah,
38 Hlang boeih lamkah neh,
na pilnam Israel boeih lamtah aka thoeng
thangthuinah boeih neh lungmacil boeih,
hlang loh a thinko tloh a ming uh tih
he im la a kut a phuel uh vaengah,
39 namah loh na om nah hmuen vaan lamkah
hnatun lamtah khodawkngai pah.
Na saii vaengah hlang te a thinko na ming dongah
a cungkuem te amah khosing bangla khueh pah.
Namah bueng loh hlang ca boeih kah thinko na ming.
40 A pa rhoek taengah na paek khohmuen maelhmai dongkah
Nang taengah boe a koek cakhaw amih aka sol kah mikhmuh ah
amih te haidamnah dongah pae lamtah
amih te haidam uh eh.
51 Amih te Egypt lamkah thi hmai-ulh khui lamloh
na khuen na pilnam neh na rho ni.
52 Na mik na sal kah lungmacil taeng neh
na pilnam Israel kah lungmacil taengah aka dai la om saeh,
namah taengah a cungkuem la a pang uh vaengah,
amih te aka hnatun la om lah.
53 Ka Boeipa Yahovah aw,
a pa rhoek te Egypt lamloh na sal Moses kut dongah
na khuen vaengah
na thui bangla namah loh amih te namah kah rho la
diklai pilnam cungkuem lamloh na hoep coeng,” a ti.
Solomon kah Yoethen Paek
54 BOEIPA taengah thangthui ham thangthuinah neh lungmacil boeih he Solomon a khah phoeiah BOEIPA hmueihtuk hmai kah a khuklu dongah aka cungkueng lamloh thoh tih a kut te vaan la a phuel. 55 Pai tih Israel hlangping cungkuem te yoethen a paek vaengah ol ue neh, 56 “A cungkuem ah a thui bangla a pilnam Israel taengah duemnah aka pae BOEIPA tah a yoethen pai. A sal Moses kut ah a thui a ol then boeih te ol pakhat khaw a hloo moenih. 57 Mamih kah Pathen BOEIPA he a pa rhoek taengah a om bangla mamih taengah khaw om saeh. Mamih he n'hnoo boel saeh lamtah mamih he m'phap boel saeh. 58 A pa rhoek a uen bangla mamih thinko he amah taengla buung ham, amah kah longpuei cungkuem ah pongpa ham, a olpaek, a oltlueh neh a laitloeknah khaw ngaithuen ham om. 59 BOEIPA mikhmuh ah rhennah ka bih vanbangla ka ol he khoyin khothaih aka yoei mamih kah BOEIPA Pathen taengah om saeh. Te daengah ni hnin at kah olka dongah aka om a sal kah laitloeknah neh a pilnam Israel kah laitloeknah he amah khohnin ah a saii thai eh. 60 Te daengah ni diklai pilnam boeih loh YAHWEH amah phoeiah Pathen tloe om pawh tila a ming eh. 61 Tedae tahae khohnin kah bangla a oltlueh dongah pongpa ham neh a olpaek ngaithuen ham tah nangmih kah thinko te mamih kah Pathen BOEIPA taengah a rhuemtuet la om saeh,” a ti. 62 Te phoeiah manghai neh a taengkah Israel boeih loh BOEIPA mikhmuh ah hmueih a nawn uh.
63 Solomon loh rhoepnah hmueih a nawn tih BOEIPA taengah saelhung thawng kul thawng hnih neh boiva thawng yakhat thawng kul a nawn. Te tlam te manghai neh Israel ca boeih loh BOEIPA im te a uum uh.
64 Teah te hmueihhlutnah neh khocang khaw, rhoepnah maehtha khaw ngawn dongah Amah khohnin ah manghai loh BOEIPA im hmai kah vongup khui a ciim. Te vaengah BOEIPA mikhmuh kah rhohum hmueihtuk tah hmueihhlutnah neh khocang, rhoepnah maehtha a ael ham lakah a caek dongah ni. 65 Te vaeng tue ah Solomon loh khotue a saii tih a taengkah Israel boeih he Lebokhamath lamloh Egypt soklong duela khawk hlangping uh. Mamih kah Pathen BOEIPA mikhmuh ah hnin rhih, hnin rhih, hnin hlai li a dun uh. 66 A hnin rhet dongah pilnam te a tueih tih manghai te yoethen a paek uh. BOEIPA loh a sal David ham neh a pilnam Israel ham a saii hnothen cungkuem ham kohoe neh lungbuei then la a dap te a paan uh.
