Languages
21
BOEIPA kah Laitloeknah

1 BOEIPA ol te kai taengla ha pawk tih, 2 “Hlang capa, na maelhmai te Jerusalem la khueh lah. Te phoeiah rhokso te cip thil lamtah Israel khohmuen te tonghma thil laeh. 3 Te vaengah Israel khohmuen te thui pah. BOEIPA loh he ni a thui. Kai loh ka cunghang a capang lamloh nang kam bong thil vetih nang lamkah aka dueng neh aka halang khaw ka saii pawn ni. 4 Ka cunghang he a capang lamloh thoeng tangloeng vetih nang lamkah pumsa hlang boeih tah aka dueng khaw, aka halang khaw tuithim lamloh tlangpuei due ka saii ni. 5 Te vaengah kai BOEIPA loh ka cunghang a capang lamloh ka bong phoeiah koep ka sang pawt te pumsa hlang boeih loh a ming uh ni.

6 Te dongah hlang capa nang te cinghen a khaemnah hil huei lamtah hmuetphawt neh amih mikhmuh ah huei pah. 7 Nang te, 'Balae tih na huei,' a ti vaengah, 'Olthang ha pawk dongah ni,' ti nah.

Te vaengah lungbuei boeih paci vetih kut khaw boeih tahah ni. Mueihla boeih ueih vetih khuklu boeih tui la poeh ni. Ka Boeipa Yahovah kah olphong tah ha pawk tih om coeng ke,” a ti.

8 BOEIPA ol tah kai taengah koep ha pawk tih, 9 “ Hlang Capa aw tonghma lamtah thui laeh.

'Boeipa loh he ni a thui, cunghang te
cunghang haat la huen laeh,' ti nah.
10 Rhaek la a om due a haat la a huen daengah ni
maeh khaw a ngawn eh.
Thing cungkuem aka sit ka capa kah
mancai te ngaingaih puei sih.
11 Huen ham neh a kut dongah pom ham
a paek dongah cunghang haat coeng.
Te dongah aka ngawn kut dongah paek ham a huen coeng.
12 Hlang capa aw pang lamtah rhung laeh.
Ka pilnam neh Israel khoboei boeih te a om thil coeng.
Ka pilnam neh aka om khaw
cunghang dongla a voeih coeng.
Te dongah na hlit te tum laeh.
 

13 Loepdak ngawn cakhaw mancai te sawtsit koinih ta? om khueng mahpawh. He tah ka Boeipa Yahovah kah olphong ni.

14 Te dongah hlang capa nang tonghma lamtah
kut neh kut ngawn laeh.
Cunghang khaw a pathum la rhaep laeh.
Amih te aka ngawn kah cunghang soah
aka ngawn cunghang loh vael khungdaeng saeh.
15 Te daengah ni lungbuei paci vetih
a vongka tom ah hmuitoel khaw a suplup eh.
Anunae Maeh sah ham khopha bangla a saii tih
a hnut cunghang hmui kang khueh coeng.
16 Saih lamtah bantang phai,
melam khaw na maelhmai
te banvoei la khueh lamtah tuentah uh.
17 Kai khaw ka kut neh ka kut te
ka ngawn daengah ni ka kosi ka hlam eh.
He tah BOEIPA kamah long ni ka thui,” a ti.

18 Te phoeiah BOEIPA ol te kai taengla ha pawk tih, 19 “Nang hlang capa aw Babylon manghai kah cunghang ha pawk ham longpuei rhoi te namah loh khueh laeh. Khohmuen pakhat lamloh ha thoeng rhoi saeh lamtah khopuei longpuei longcui ah kutngo suen la suen saeh. 20 cunghang ha pawk ham longpuei te Ammon koca Rabbah taengah khaw, Judah taeng neh Jerusalem vong cak khaw khueh pah. 21 Babylon manghai te longpuei caehtung kah longpuei longcoi rhoi ah bihma bi sak ham om ni. Te vaengah thaltang dongah a tap phoeiah sithui te a dawt vetih a thin duela a hmuh. 22 Tedae bihma tah Jerusalem te maehdoelh la khueh ham, ngawnkung taengah a ka ang sak ham, tamlung ol huel ham, vongka ah maehdoelh khueh ham, tanglung lun ham neh buep khoeng ham a bantang la a om pah ni. 23 Tedae amih taengah a bi khaw, amih mikhmuh ah a poeyoek la a bi bangla om ni. Amih taengah olhlo neh aka toemngam khaw thaesainah tuuk pah ham aka poek ni te.

24 Te dongah ka Boeipa Yahovah he ni a thui. Nangmih te namamih kah thaesainah poek sak ham, na boekoeknah hliphen ham, na tholhnah phoe ham, nangmih kah khoboe rhamlang boeih dongah nangmih thoelh ham a kut neh n'tuuk uh ni.

25 Nang Israel khoboei hlang rhong neh halang aw,
thaesainah a bawtnah tue kah a khohnin ha pawk coeng.
26 Ka Boeipa Yahovah loh he ni a thui.
Lupong te pit lamtah rhuisam khaw dul laeh.
Te tlam moenih. Aka toem he sang tih
aka sang te a kunyun sak.
27 Paletnah, paletnah, paletnah te ka khueh ni.
Laitloeknah te anih taengla a pawk due he khaw
om pawt vetih anih te ka paek ni.

28 Nang hlang capa tonghma lamtah thui pah. Ka Boeipa Yahovah loh a thui he Ammon koca neh amih kokhahnah kawng ni. Te dongah, “cunghang, cunghang te phong lamtah rhaek bangla maeh hlap ham huen laeh.

29 Nang ham te a poeyoek la a hmuh tih

nang te laithae neh halang rhok kah a rhawn ah
voeih ham ni nang te m'bi.
Thaesainah a bawtnah tue kah a khohnin ha pawk coeng.

30 A capang khui la sang laeh. Na suen nah hmuen kah

namah tuikong khohmuen ah nang te lai kan tloek ni.
31 Nang soah ka kosi ka hawk vetih
ka thinpom hmai neh nang kan sat thil ni.
Nang te kutthai kut al hlang rhoek kut ah
kutcaihnah la kan tloeng ni.
32 Hmai ham te toihthing la na poeh vetih
na thii te khohmuen khui ah om ni.
BOEIPA kamah loh ka thui coeng dongah
nang m'poek uh mahpawh,” a ti.

<- Ezekiel 20Ezekiel 22 ->