1 Te khohnin neh te vaeng tue ah Judah neh Jerusalem thongtla te ka mael rhoe ka mael puei ni. 2 Namtom boeih te ka coi vetih amih Jehoshaphat kol la ka suntlak puei ni. Ka pilnam neh ka rho Israel kongah amih te lai ka soeh thil ni. Namtom taengah a yaal uh tih ka khohmuen he a tael uh dongah. 3 Ka pilnam ham hmulung a naan uh. Te dongah tongpaca te pumyoi la a paek uh tih hutaca te ok ham la misurtui la a yoih uh.
4 Tyre, Sidon neh Philistia saa boeih aw nang neh kai balae benbo? Kai soah aka thuung la na tiing uh nim? Kai he nan thuung uh cakhaw nangmih tiing bangla na lu ah tlek kan thuung paitok ni. 5 Ka cak neh ka sui na loh uh tih ka ngailaemnah hnothen te na bawkim la na khuen uh. 6 Judah ca rhoek neh Jerusalem ca te Greek ca taengla na yoih uh tih a Khorhi dong lamloh amih te na lakhla sak. 7 Amih yoih nah hmuen lamloh amih te pahoi ah ka haeng coeng he. Te dongah na thaphu te na lu ah kan thuung ni. 8 Na canu na capa rhoek te Judah ca rhoek kut ah ka yoih vetih amih te Sabean taeng neh khohla namtom taengah a yoih uh ni tila BOEIPA loh a thui.
9 He he namtom taengah doek uh laeh.
Caemtloek te ciim uh laeh.
Hlangrhalh rhoek haenghang uh laeh.
Thoeih uh saeh lamtah caemtloek
hlang boeih te paan uh saeh.
10 Na tuktong te cunghang la,
na vin te khaw cai la dae uh.
Tattloel long khaw ka, “Hlangrhalh,” ti saeh.
11 Kaepvai lamkah namtom boeih capit uh lamtah
paan uh lamtah tingtun uh laeh.
BOEIPA aw na hlangrhalh rhoek pahoi ah ael sak laeh.
12 Haenghang saeh lamtah namtom te
Jehoshaphat kol la cet uh saeh.
Kaepvai kah namtom boeih te
laitloek hamla kana ngol ni te.
13 Cangah ham hmin coeng tih vinkui te tueih uh laeh.
