Nimbe Para Tilimu 5

Jononi buk te panga tekolio ka toringimu kanorumu ungumu

1 Altopo kanopolio wali iye nomi kingimunga polona molorumu iyemu yunge imbo kindo buk panga teli te lerimuna kanoru, akumunga olando maindo peya imbi mare molorumu. Oi kandel gris kandoringina we imbo te naa kanopili ningo imbi kite yupoko pakera toko mondoringi. 2 Kanoru wali ensel enge nili te molorumumuni alako topa nimbei, “Imbo nari imbi moromomuni bukuna kandel gris kandoringima manda pilkipe wendo lipe bukumu tapuwe timbeloya?” nimu. 3 Nalo mulu kombuna kape maina kape kombu kerina kape imbo teni manda bukumu tapuwe tipe, tukundo imbi molorumuma manda kanombalo imbo te naa molorumu. 4 Aku wali imbo imbi molopalie manda bukumu tapuwe tipe kanombalo imbo te naa molorumumunga kanopolio na kola awini teru. 5 Aku ulu teru wali iye nomi 24 moloringimanga teni nando nimbei, “Kola naa tewi! Piliwi! Juda Talapemunga Laion, iye nomi king Devitini kalopa ltimu iyemu, yuni enge nimbe opa pulemu kamukumu topa mainye mundurumu. Iye akumu imbi paa moromomuni buk kandel gris kite yupoko pakera manda wendo lipe pilkipe buk tapuwe timbelo,” nimu.

Jononi Sipsip Walomu kanorumu ungumu

6 Kanoru wali Kongi Sipsip Walo te angilerimu. Yu kongi sipsip toko kondoko noirimele mele yu aku tepa molopa, yu iye nomi king polona awi tuku tingina angilerimu. Mele koinjo mololi kite kinye iye nomi 24 kinye yu liko tukundo munduko eno molko makai teringi. Yunge pinyewena ola kongi kao geromano kite yupoko pakera wendo omba angilipe, mongo kite yupoko pakera angilerimu, kano mongoma Gote yunge mini kake yupoko pakera yuni mai kombumanga pali lipe mundurumu akuma. 7 Kano Kongi Sipsip Walomu yu omba iye nomi king polona molorumu iyemunga imbo kindo lerimu bukumu ltimu. 8 Ltimu wali mele koinjo mololi kite kinye iye nomi 24 kinye yunge kumbe kerena mainye pungo tamalu peringi. Eno yu mele mele gita mele mare ambolko, plet kou goloni teli, akuna paura kaloringi kinye mune paa torumu pauramu peko lepili amboloringi. Aku paurama Gotenga imbomanga pali Gote popo toko konge teremele unguma. 9 Enoni kunana koinjo te ningolio ningei,

“Nu toringi kinye imbo ungu lupe lupe lelima kinye, kangi lupe lupe angilelima kinye,

manga pupu lupe lupema kinye, kombu lupe lupe moromelema kinye,

nunge mememuni Gote kinye kopu teko molonge aulkemu akirindirinu akumunga nuni buk manda liko kandel grisima wendo liwi.

10 Nuni kano imboma linonga Gotenga kongonomu tendangei ningo

Gotenga popo tondoli imbo Gote enonga iye nomi kingimu molopa

eno nokombalo imbo talapemu molangei ningo terinu, akumunga eno iye nomi kingima molko mai kombuna imboma nokoko molonge,” ningi.

Sipsip Walomunga imbi liko ola munduko kapi ningi ungumu

11 Altopo kanopolio kinye ensel paa pulumu ungu ningi unguma pileru. Eno kambu tolemalanje tausen kelepa olandopa tausen nimbo, milion kelepa olandopa milion nilimala. Akuma iye nomi king polomu kinye mele koinjo mololi kite kinye iye nomi 24 kinye liko makai tendeko tukundo munduko angileringi. 12 Aku enselemani enge ningolio ningei,

“Sipusipu Walo oi toko kondoringimundo imbomani pali Yu imboma nokombalo engemu kinye

yu kamako molombalo melema kinye,

lipe manjilimu kinye engemu kinye

yu kinye pepa manda tepa, yunge imbimu paa ola molopa, enge pa telimu

yu kinye peremo ningo yu paa tereno ningo kapi ninge wali paa nengei,” ningi.

13 Kano kinye mulu kombuna moromele melema kape, maina moromele melema kape, maina tukundo moromele melema kape, nomu kutana moromele melema kape, kombumanga pali moromele melemani ningi ungu pileru. Enoni ningei:

“Iye nomi king polona moromo iyemu kinye

Sipsip Walomu kinye elo molko kondangili nimbo waliwalima kapi nimbo

imbimu paa olandopa molopa,

enge pa telimu kinye imboma nokombalo engemu kinye kamukumu elo kinye pepa kau purumo,”

ningo kunana aku teko ningi. 14 Aku ungu ningi wali mele koinjo mololi kiteni ningei, “Paa aku tepa wendo opili!” ningi. Iye nomi 24 akumani mainye pungo tamalu peko kapi ningo elonga imbi liko ola munduringi.

<- Nimbe Para Tilimu 4 Nimbe Para Tilimu 6 ->