EPESE 4

Aêac tatu Kilisinê ôli tageŋ

1 Amboac tonaŋ aê, tec gaŋgôŋ kapoacwalô kêtu Apômtauŋa nec, jalêŋ biŋ amac gebe asa nêm lêŋ êtôm Anôtônê kalem, taŋ kêtap amac sa naŋ. 2 Ambu taôm to amoa tonêm ŋalêlôm malôgeŋ, aê biŋ tôŋgeŋ ma asip taôm sa totêmtac êwiŋgeŋ. 3 Ôlim palê gebe Ŋalau êkêŋ biŋmalô êmbiŋ amac tôŋ atu gêŋ tageŋ. 4 Ôlim tageŋ to Ŋalau tageŋ êtôm Anôtô kêkalem amac ma akêŋ matem nêm ŋanô kalem ŋa tageŋ. 5 Apômtau tageŋ ma biŋ takêŋ gêwiŋŋa tageŋ to busaŋgu tageŋ. 6 Ŋamalac samob Tameŋi Anôtô tageŋ, taŋ kêtu gêŋ samob ŋatau ma gêjam kôm kêpi gêŋ samob naŋ, gêjam gêŋ samob auc.

7 Aêac samob tonec takôc moasiŋ sa gêdêŋ-gêdêŋgeŋ kêtôm Kilisi tau gêjam dôŋ ma gêjac sam gêdêŋ aêac. 8 Kêtôm biŋ tec gêc gebe.

“Eŋ kêpi lôlôc gêja

ma kêkôc lau kapoacwalôŋa sêwiŋ eŋ,

ma gêjac sam gêŋ ŋajam ŋaômageŋ gêdêŋ lau.”

9 Ŋalô tonec gebe “Eŋ kapi lôlôc gêja” naŋ ŋam amboac ondoc. Ŋam tau tonec gebe kêsêp nom ŋalêlôm ŋakêlêndiŋ gêja gêmuŋ. 10 Ŋac tau, taŋ kêsêp gêja naŋ, ŋac tau tonaŋ kêpi e jakêlêlêc undambê samob su gebe ênam gêŋ samob auc. 11 Ŋac tau tonaŋgeŋ tec kêkêŋ lau ŋagêdô têtu aposolo ma ŋagêdô têtu propete to ŋagêdô têtu jaeŋwaga ma ŋagêdô têtu lausakiŋ to kêdôŋwaga. 12 Kilisi kêkêŋ lau amboac tonaŋ gebe ênac dabiŋ Anôtônê lau sênam sakiŋ ŋapep gebe sêmboa eŋ ôli sa 13 e takêŋ gêwiŋ êmbiŋ aêac samob tôŋ tapi tageŋ to tajala Anôtônê Latu êtu tôŋ ma têtôp tatu lau kapôêŋ e tatôm Kilisi tau nê dôŋ. 14 Ma tatôm ŋapalê dedec êtiam atom gebe laudansaŋnêŋ mêtê êtêliŋ to êmbam aêac êtôm gwêc to mu kêtêliŋ to gêbam waŋ nec atom. Lau amboac tonaŋ têtim to sêsau ŋamalac. 15 Aêac amboac teŋ. Aêac tasôm biŋŋanô êndêŋ tauŋ totêntac êwiŋgeŋ ma têtôp tatu kapôêŋ e nêŋ lêŋ samob esewec tatôm Kilisi, taŋ kêtu ŋamôkê naŋ. 16 Ŋac tau tonec tec gêbiŋ ôli ŋagêŋlêlôm samob tôŋ kêpi tageŋ to kêkêŋ ŋaduc gêdiŋ kêsô tau ma ŋakalôc gedeŋ ôli ŋagêŋlêlôm tôŋ. Ôli ŋagêŋlêlôm gêdêŋ-gêdêŋgeŋ embe ênam kôm, taŋ gêjac gêŋ tau ŋawae naŋ, oc ôli êtôp to êmboa tau sa ma têntac gêwiŋ êmbiŋ ŋanô tau tôŋ.

Kilisi kêkêŋ aêac tasa lêŋ wakuc

17 Amboac tonaŋ aê jasôm ŋoc biŋ tonec êndêŋ amac toaoc gêjac Apômtaugeŋ gebe Asa nêm lêŋ atôm lau samuc, taŋ taêŋ gêjam biŋ ŋaôma-ŋaôma elême naŋ atom. 18 Ŋakesec gêjam êsêacnêŋ kauc auc. Êsêacnêŋ kauc masi to nêŋ ŋalêlôm ŋadani, tec kêbalaŋ êsêac auc gêdêŋ sêŋgôŋ mateŋ jali, taŋ ŋam kêsêp Anôtôŋa naŋ. 19 Êsêac sêgôm gêŋ waucwaucgeŋ ma sêgôm gêŋ môp-môp samob gêjam auc, sêgôm kêtu mateŋ katu awaŋa tomajeŋ gêbacgeŋ.

20 Biŋ amboac tonaŋ têdôŋ gêdêŋ amac kêtu Kilisiŋa atom. 21 Amac aŋô ŋawae tau to têdôŋ mêtê tau gêdêŋ amacgac kêtôm biŋŋanô, taŋ gêc Jesu tauŋa naŋ. 22 Amboac tonaŋ awi nêm ŋamalac laŋgwa, nêm ŋalêlôm geo, taŋ kêsa lêŋ gêmuŋŋa naŋ siŋ. Têtac ŋakalac kêsau gêôc ŋamalac laŋgwa e geseŋ tau su gêjaŋa. 23 Amacnêm ŋalêlôm to biŋ, taŋ taêm gêjam naŋ, êtu wakuc samucgeŋ. 24 Ma asô ŋamalac wakuc, taŋ Anôtô kêkêŋ kêtôm tau nê katu naŋ sa. Eŋ êwaka tau sa ŋa lêŋ gêdêŋ to dabuŋ biŋŋanôŋa.

25 Amboac tonaŋ awi biŋdansaŋ siŋ ma asôm biŋŋanô êndêŋ taôm êndêŋêndêŋgeŋ, gebe aêac tatu ôli tageŋ ŋagêŋlêlôm. 26 Embe têmtac ŋandaŋ, naŋ aŋgôm taôm sec atom ma aê têmtac ŋandaŋ tôŋ e oc naêsêp nec atom. 27 Aliŋ taôm gebe Sadaŋ êŋgôŋ amac ŋasawa atom. 28 Ŋac geŋgeŋ ênam geŋgeŋ gêŋ êtiam atom, tau lêma ênam koleŋ acgom, gebe êkôc nê koleŋ ŋanô ma ênac sam endeŋ lau, taŋ sêpô lêna tauŋŋa naŋgeŋ. 29 Biŋ agwa-agwa êsa awemsuŋ atom, asôm biŋ ŋajamgeŋ, taŋ êpuc lau-sêpô-lênawaga tôŋ to êmoasiŋ lau, taŋ sêŋô biŋ tau naŋ. 30 Ma aŋgôm Anôtônê Ŋalau Dabuŋ nê ŋalêlôm ŋawapac êsa atom, gebe eŋ kêtu ŋabelo Anôtô ênam amac kêsi endeŋ nê becŋa. 31 Biŋkalom samob to biŋ keso-keso ma têmtac ŋandaŋ to ali awem sa ma biŋ alôb-alôb to biŋ sesec tonaŋ ŋai samob naŋ, awi siŋ. 32 Amoasiŋ taôm to taêm walô taôm ma asuc nêm biŋ ôkwi êndêŋ-êndêŋgeŋ, aŋgôm êtôm Anôtô kêsuc amacnêm biŋ ôkwi kêtu Kilisiŋa.

<- EPESE 3 EPESE 5 ->