Languages
15
1 Go Mose to lau Israel sêjam wê
tonec gêdêŋ Apômtau gebe
“Aê gabe janam wê êndêŋ Apômtau, gebe eŋ kêwaka nê ŋawasi sa.
Eŋ kêbaliŋ hos to lau sêŋgôŋ ŋaôŋa sêsêp gwêc sêja.
2 Apômtau kêtu ŋoc ŋaclaimôkê to ŋoc wê ŋam.
Eŋ kêtu moasiŋ ênam aê kêsiŋa.
Aêŋoc Anôtô eŋgoc, tec gabe jalambiŋ eŋ.
Eŋ kêtu tamocnê Anôtô, tec gabe jatoc eŋ sa.
3 Apômtau eŋ siŋsêlêc laŋgwa.
Ênê ŋaê gebe Apômtau.
 
4 “Eŋ kêbaliŋ Paraonê kareta to nê siŋwaga sêsêp gwêc sêja.
Ma siŋwaga, taŋ Parao kêjaliŋ sa naŋ, sênôm Gwêckoc su sêjaŋa.
5 Gwêc ŋadembom kêmakop êsêac auc.
Êsêac sênê sêsêp gêdimbob amboac poc.
6 O Apômtau, aôm lêmam anôŋa kêwaka ŋaclai sa,
O Apômtau, aôm lêmam anôŋa kêtuc ŋacjo popoc.
7 Aôm ŋaniniŋ to ŋawasi ŋatau kôku nêm soŋo-soŋo tulu.
Aôm têmtac ŋandaŋ kêsa, tec geŋ êsêac amboac ja geŋ oba.
8 Aôm gôju awamjaô kêsa ma gwêc gêlêc tau sa
e kêkô kêtôm tuŋbôm
ma gwêc ŋadimdani tau ŋajaŋa kêsa kêkô.
9 Ŋacjo kêsôm gebe ‘Aê jajanda e jaôc lêlêc êsêac.
Aê janac sam waba, taŋ jajaŋgo anga êsêacnêŋ naŋ,
ma matoc katu gêŋ teŋ êtiam atom.
Aê jambuc ŋoc siŋ sa ma lemoc enseŋ êsêac su.’
10 Aômnêm mu gêbuc e gwêc kêmakop êsêac auc.
Êsêac sênê sêsêp gwêc kapôêŋ sêja têtôm ki gênê.
 
11 “O Apômtau, anôtôinêŋ asa kêtôm aôm.
Asa ŋaniniŋ to dabuŋ ma gêgôm gêŋsêga toŋaclai
to gêgôm gêŋtalô kaiŋ teŋ kêtôm aôm.
12 Aôm kômêtôc lêmam anôŋa
ma nom kêdaŋgôŋ êsêac.
 
13 “Aôm gôwê lau, taŋ kôjaliŋ sa naŋ, totêmtac gêwiŋ teŋgeŋŋa,
Aôm gôwê êsêac ŋa nêm ŋaclai sêô lasê nêm gamêŋ dabuŋ.
14 Lau tomôkê-tomôkê sêŋô ŋawae e têtênêp.
Lau, taŋ sêŋgôŋ Pilistinêŋ gamêŋ naŋ, sêmoa tonêŋ ŋalêlôm ôluŋ-ôluŋgeŋ.
15 Gêdêŋ têm tonaŋ lau Edom nêŋ kasêga têtakê,
lau Moab nêŋ laumata têtênêp,
ma lau samob, taŋ sêŋgôŋ Kanaan naŋ, nêŋ ŋalêlôm kêtu palê.
16 Êsêac têtakê ma têtêc tauŋ ŋanô.
O Apômtau, aôm lêmam ŋaŋaclai gêgôm êsêac aweŋmê kêsa têtôm poc
e aômnêm lau sêôc lêlêc êsêac,
e lau, taŋ aôm gôjam gôliŋ naŋ, sêôc lêlêc êsêac.
17 Aôm gobe ôwê êsêac e ôsa êsêac sêsêp aôm taôm nêm lôc.
O Apômtau, aôm ôsa êsêac sêsêp nom, taŋ kêtu nêm gamêŋ naŋ.
O Apômtau, gamêŋ tonaŋ êtu nêm lôm dabuŋ, taŋ lêmam kêmasaŋ naŋ.
18 Apômtau êtu kiŋ teŋgeŋ ma teŋgeŋ.”

19 Paraonê hos to nê kareta ma lau sêŋgôŋ hos ŋaôŋa sêsêp gwêc sêja, mago Apômtau kêkêŋ gwêc gêjô tau mala jakêmakop êsêac auc. Ma lau Israel sêsêlêŋ sêmoa gamêŋ ŋakeleŋ sêmoa gwêc lêlômgeŋ sêja.

20 Go Aron luo, Miriam, taŋ kêtu teŋ naŋ, kêkôc oŋ sauŋ teŋ ma lauo samob têdaguc eŋ tooŋgeŋ ma têtê wê. 21 Ma Miriam gêjam wê gêdêŋ êsêac gebe

Anam wê êndêŋ Apômtau, gebe eŋ kêwaka nê ŋawasi sa,
Eŋ kêbaliŋ hos to lau sêŋgôŋ ŋaôŋa sêsêp gwêc sêja.
Mara ŋabu ŋamakic

22 Go Mose kêjatu lau Israel gebe sêndi aŋga Gwêckoc ma gêwê êsêac sepeŋ gamêŋ sawa Surŋa. Êsêac sêsêlêŋ bêc têlêac sêmoa gamêŋ sawa ma têtap bu teŋ sa atom. 23 Gêdêŋ taŋ sêô lasê Mara naŋ, êsêac têtôm gebe sênôm bu Maraŋa atom, gebe bu tau ŋamakic. Gamêŋ tau ŋaê Mara ŋam gebe Bu ŋamakic. 24 Ma lau sêli aweŋ sa gêdêŋ Mose ma sêsôm gebe “Aêac anôm asageŋ.” 25 Ma eŋ gêmôêc gêdêŋ Apômtau. Ma Apômtau kêtôc ka teŋ gêdêŋ eŋ. Mose kêbaliŋ ka tau kêsêp bu ma bu tau ŋaluc kêsa.

Aŋga tônê Apômtau kêkêŋ ŋagôliŋ to jatu gêdêŋ êsêac ma kêsaê êsêac. 26 Eŋ kêsôm gebe “Aôm embe taŋam wamu Apômtau, aômnêm Anôtô, nê awa ma ôŋgôm ênê ŋagôliŋ êtu tôŋ, go jakêŋ gêmac, taŋ kakêŋ gêdêŋ lau Aiguptu naŋ, ŋateŋ êŋgôm aôm atom, gebe aê Apômtau, taŋ gagôm aôm ôlim ŋajam kêsa naŋ.”

27 Go êsêac jasêô lasê Elim. Bumata 12 kêpoac gamêŋ tonaŋ ma nip 70 kêkô. Ma êsêac sê nêŋ bec sêmoa bu ŋagala.

<- EKSODUS 14EKSODUS 16 ->