1 Ha vé, ẽg jóg mág tóg ẽg to há tãvĩ nĩ, hã kỹ tóg ẽg to: “inh krẽ,” he mũ sir. Ti krẽ vỹ tỹ ẽg nỹtĩ, Jesus jãvy ag, ti ve fag. Hã kỹ ẽprã ke ũ ag vỹ ẽg jykre ki kagtĩg nỹtĩ. Ag pijé Topẽ ki kanhró nỹtĩ'. Hã kỹ ag tóg ẽg jykre ki kagtĩg nỹtĩ gé, ẽg tỹ tỹ ti krẽ nỹtĩn kỹ. 2 Ãjag to inh há tãvĩ nĩ. Ũri ẽg tóg tỹ Topẽ krẽ nỹtĩ. Kãnhmar ẽg tóg ti mré nỹtĩnh mũnh mũ. Kỹ ẽg hỹn hẽ ri ke nỹtĩnh mũ, kanhkã tá? Ha'. Kar kỹ ẽg venh ke mũ, ti kãtĩg kar kỹ. Ẽn kã ẽg tóg tỹ ti hã nỹtĩnh mũ, ẽg tỹ ẽg kanẽ tỹ ti ve kỹ. Ti ve jé ẽg tóg ke mũ, kurã ẽn kã. 3 Ẽg tỹ tag hã ve sór vẽ. Hã kỹ ẽg tóg vẽnh jãnhkrig ke mũ, ẽg tỹ ti jãnhkri nĩ ẽn ri ke nỹtĩ jé, vẽjykre pãno tovãnh kãn kỹ.
4 Ẽg tỹ ti vĩ mranh kỹ ẽg tóg ti tỹ ẽg mỹ nén tó ja ti mranh mũ sir. Hỹ, mranh kỹ ẽg tóg mranh tĩ, ti tỹ ẽg jyvẽn ja ti. 5 Hã ra Cristo vỹ kãtĩg ja nĩ, ti tỹ ẽg tỹ ti vĩ mranh ja tỹ tũ' he jé. Tag ki kanhró ẽg tóg nỹtĩ. Ti pijé mranh ja nĩgtĩ' inhhã. 6 Ẽg tỹ ti ki ge kỹ nỹtĩn kỹ ẽg tóg mranh mãn sór tũ nĩ ha. Ũ tỹ ver mranh mãn sór kỹ tóg ti ve ja tũ nĩ. Ti ki kagtĩg tóg nĩ ver.
7 Inh krẽ', ker ũ tỹ ãjag krĩn kónãn sór mũ vĩ jẽmẽ hẽ'. Ũ tỹ vẽjykre kuryj han mũ ẽn hã vỹ kuryj nĩ, Topẽ kuryj nĩ ẽn ri ke. 8 Ũ tỹ Topẽ vĩ mranh mũ ẽn vỹ tỹ Japo mré ke nĩ. Japo hã ne ti vĩ mranh tĩgtĩ'. Topẽ tỹ nén ũ kar han mũ ẽn kã Japo ne ti vĩ mranh vén'. Kỹ tóg ũri mranh tĩ nĩ gé. Hã ra Topẽ kósin vỹ Japo tỹ nén han mũ kókén ja nĩ. Hã jé tóg mur ja nĩ.
9 Ẽg tỹ tỹ Topẽ krẽ nỹtĩn kỹ ẽg tóg ti vĩ mranh mãn sór ke tũ nĩ ha, ẽg tỹ Topẽ kuprĩg tỹ jagrẽ nỹtĩn kỹ, ẽg tỹ tỹ ti krẽ nỹtĩn kỹ. 10 Ẽg tỹ ag jykre tugnỹm kỹ ẽg tóg ũ tỹ tỹ Topẽ krẽ mré Japo krẽ ki kanhró nỹtĩ. Ũ tỹ vẽjykre kuryj han jãvãnh ẽn pijé tỹ Topẽ krẽ nỹtĩ'. Ũ tỹ ti régre to há tũ nĩ ẽn pijé tỹ Topẽ krẽ nỹtĩ gé'.
11 Tag mẽ ãjag tóg, ãjag tỹ Topẽ vĩ mẽ vén kỹ, hã vỹ: “jagnẽ to há nỹtĩm nĩ,” he mũ. 12 Ẽg pijé Caim jykre han ke mũ'. Satanás mré ke ja vẽ, Caim ti, hã kỹ tóg ti jãvy tén. Ne nỹ hỹn ti jũ han, kỹ tóg ti tãnh? Jykre kórég ja ti nĩ. Jãvo ti jãvy vỹ jykre há ja nĩ. Hã kỹ tóg ti tãnh, ti jykre há ẽn to. Hã kỹ jagnẽ jykre vég mũ ra jagnẽ to jũ tũg nĩ.
13 Inh kanhkã', ũ tỹ Topẽ ki rã tũ ag pijé ẽg to há nỹtĩnh mũ'. Tag jé ãjag mỹ kórég nỹ tũg hã ra. 14 Ha vé, jykre tãg ẽg nỹtĩ, kỹ ẽg tóg ẽg rĩr krỹg ja tũ venh ke mũ. Ẽg jykre pãno tovãnh ẽg huri. Tag ki kanhró ẽg nỹtĩ, ẽg tỹ ũ tỹ ẽg mré ti ki rã kỹ nỹtĩ kar ag to há nỹtĩn kỹ. Ũ tỹ ẽg mré Jesus ki rã mũ to há tũ nĩ ẽn vỹ, ẽg rĩr krỹg ja tũ ti venh ke tũ nĩ. 15 Ẽg tỹ ũ to kórég nĩn kỹ ẽg ti tén ri ke han huri. Kỹ ẽg tỹ ũ tén kỹ ẽg pijé ẽg rĩr krỹg ja tũ venh ke mũ'. Tag ki kanhró ãjag nỹtĩ. 16 Cristo vỹ ẽg tỹ jagnẽ to há nĩ tag tỹ ẽg kanhrãn. Vẽnh fẽg tóg, ũ tỹ ti tén ke mũ ag mỹ, ti tỹ ẽg jagfy ter jé. Hã kỹ ẽg tóg ẽg mré ke jagfy ter ke tag to tar nỹtĩnh ke mũ gé, ũ tỹ ag jagfy ẽg tén sór kỹ. 17 Ha vé, ũ tóg tag ki nén ũ mág vég tĩ. Jãvo ti mré Jesus ki rã kỹ nĩ ũ tóg tỹ nén ũ tũ nĩ. Hã ra tóg ti jagãgtãn sór tũ nĩ. Ẽn vỹ Topẽ to há tũ nĩ gé.
18 Inh krẽ', ãjag vĩ tãvĩ tỹ jagnẽ to há nỹtĩ tũg nĩ, krĩg mỹ. Jagnẽ ki rĩrm nĩ. Jagnẽ to há tãvĩ nỹtĩ to ken hã vẽ. 19 Kỹ ẽg tóg ki kanhró nỹtĩ, ẽg tỹ tỹ ũ tỹ ki hã tó mũ ẽn krẽ nỹtĩn kỹ. Kỹ Topẽ tóg ẽg kanẽ jun mãn ke tũ nĩ ha. Jatu ẽg nỹtĩ ha, ẽg tỹ jagnẽ to ha pẽ nỹtĩn kỹ. 20 Kejẽn ẽg tóg ẽg tỹ kygnẽ ja ẽn to jykrén mãn tĩ, kỹ tóg ẽg mỹ e tĩ. Hã ra Topẽ tóg ki kanhró kar nĩ. Ẽg kãfór tóg nĩ, Topẽ ti. Hã kỹ tóg kãnhmar ẽg vóg kónãn ke tũ nĩ. 21 Inh krẽ', kejẽn ẽg tóg Topẽ jykre ki króm há han tĩ. Kỹ ẽg tóg: “kygnẽ ja tũ inh nĩ,” he tĩ. Kỹ ẽg tóg jatun mỹ Topẽ mré vẽmén tĩ sir, ẽg mỹ sér tĩn kỹ. 22 Kỹ tóg ẽg mỹ nĩm ke mũ, ẽg tỹ ti mỹ nén to vĩ mũ ti. Ti tỹ ẽg mỹ nén tó mũ ẽn hã han ẽg tóg tĩ. Nén tỹ ti mỹ há nĩ ẽn hã ki króm ẽg tóg tĩ. Hã kỹ ẽg tóg jatun mỹ ti mỹ nén ũ to vĩ tĩ. 23 Ti tỹ ẽg mỹ nén tó mũn hã vẽ, ha mẽ: “inh kósin tỹ Jesus Cristo ki gem nĩ, kỹ jagnẽ to há nỹtĩm nĩ,” he ja ti nĩ, ẽg mỹ. Ẽg tỹ tag han hã ve sór tóg mũ. 24 Ẽg tỹ ti vĩ ki króm kỹ ẽg tóg sir ti ki ge kỹ nỹtĩ. Kỹ Topẽ tóg tỹ ẽg mré ke nĩ sir. Ti kuprĩg jẽnẽ ja tóg nĩ, ẽg mỹ. Kỹ ti kuprĩg tóg ẽg mỹ tó tĩ, Topẽ tỹ tỹ ẽg mré ke nĩ ti.
<- 1 JOÃO 21 JOÃO 4 ->