1 Ha vé, ãjag jyvẽn sór inh mũ, inh, hã vỹ: Paulo, he mũ. Sỹ ãjag mré nĩn kỹ sóg nẽji komẽr hã vĩ tĩ. Kỹ, isỹ kór há tá nĩn kỹ isóg nẽji vĩ jũ han tĩ, ãjag mỹ. Cristo ne komẽr hã vĩ tĩ'. Ũn há vẽ, Cristo ti. Ti jykre hã han sór inh nĩgtĩ. 2 Isỹ ãjag mỹ nén rán mũ tag jẽmẽm nĩ. Kỹ sóg ãjag ki jun kỹ vĩ jũ han ke tũ nĩ. Vĩ jũ han jé sóg ke mũ, ha vem nĩ, ũ tỹ iso: “ti tỹ vẽsóg ki nén to jykrén mũ ẽn hã han tóg tĩ,” he mũ ag mỹ. 3 Ẽprã ke vỹ tỹ inh nĩ, hã ra inh pijé vẽjykre kórég han tĩ'. 4 Vãsãn mág sóg tĩ, Topẽ jykre tar ẽn hã han jé. Kỹ tóg soldado tỹ rárá jafã ri ke nĩ, Topẽ jykre ti. Tỹ sóg ẽg kato tẽ mũ ag kókég tĩ, hã vỹ: isỹ ũ tỹ ẽg vĩ kato vãsãnsãn mũ ag vĩ tỹ tũ' he mũ, he mũ. 5 Ũ tỹ Topẽ kato vĩ sór mũ ag vĩ tỹ sóg tũ' he tĩ gé. Vẽsỹ ũn mág han sór ag tóg tĩ, Topẽ kato vãsãn kỹ. Tỹ tũ' he jé sóg ke mũ, Topẽ jykre tar hã tỹ. 6 Kỹ, sỹ ãjag tỹ Topẽ vĩ kri nĩm mũ ve kỹ sóg ũ tỹ ge mỹ vĩ jũ han ke mũ sir, ha vem nĩ.
7 Ãjag kã mĩ ũ tóg: “tỹ sóg Cristo mré ke nĩ,” he tĩ. Kỹ sóg tỹ ti mré ke nĩ gé, ãjag kóm. 8 Ẽg Senhor ne inh fẽg', sỹ ãjag jyvẽn jé. Ti pijé inh mỹ: “ha ag kóké,” hé'. Isỹ vẽso vĩ há han hã vẽ. Kỹ tóg inh mỹ'a tũ nĩ. 9 Sỹ ãjag jyvẽn sór vẽ. Inh pijé ãjag kanẽ jun sór mũ'. 10 Inh vẽnh rá ki inh nẽji ãjag mỹ vĩ tar han tĩ. Sỹ ãjag mré nĩn kỹ sóg nẽji krój nĩ ve nĩ. 11 Ha vé, isỹ rán mũ ri ke han jé sóg ke mũ, isỹ ãjag mré nĩn kỹ, ha vem nĩ.
12 Ãjag kã mĩ ũ tóg vẽso vĩ há han sór tĩ. Inh pijé ag ri ke nĩ'. Inh pijé tỹ ag mré ke nĩ gé'. Vẽsóg ki nén ũ to jykrén kỹ ag tóg: “tag vỹ há nĩ, tag vỹ há tũ nĩ,” he tĩ. Topẽ jykre ve sór tũ ag tóg nĩ. Ag tỹ vẽsóg ki nén to jykrén mũ hã tóg ag mỹ há tĩ. Krĩ tũ ag nỹtĩ.
13 Ag jãvo sóg Topẽ jykre vég tĩ, hã kỹ sóg ãjag mỹ: “inh jykre vỹ há nĩ,” he tĩ. Topẽ ne inh mỹ inh rãnhrãj ti nĩm, kỹ tóg inh mỹ: “ha Corinto tá ke ag ki rĩr,” he ja nĩgtĩ gé. 14 Inh pijé Topẽ tỹ inh mỹ vẽnh rãnhrãj nĩm ja ẽn pãtén tĩ'. Kỹ sóg pãtén ja tũ nĩ gé, sỹ ãjag mỹ vẽnh rá jẽnẽn kỹ. Inh hã ne ãjag mỹ Cristo kãmén vén ja nĩgtĩ'. 15 Hã kỹ sóg isũ tỹ ãjag jyvẽn tĩ. Ũ tũ pijé'. Inh pijé ũ rãnhrãj to: “isỹ han ja vẽ,” he mũ'. Ãjag tỹ Topẽ ki ge kỹ nỹtĩ to tar nỹtĩn kỹ sóg tỹ ũn mág tãvĩ nĩnh ke mũ gé, ãjag mré. Isũ hã vẽ, inh rãnhrãj hã vẽ. 16 Kỹ sóg ãjag jamã mã ra tĩg sór mũ gé, sỹ Cristo kãmén jé, ũ tỹ mẽ ja tũ ag mỹ. Sỹ tãtá ag mỹ kãmén kỹ sóg inhhã ki rãnhrãj mũ sir, ũ tỹ ag mỹ tá Topẽ vĩ kãmén ja tũ nĩn kỹ. Kỹ sóg inh rãnhrãj hã tugnĩn tỹ ũn mág jẽnh mũ. Ũ rãnhrãj tugrĩn ke tũ vẽ.
17 Hã ra tóg há tũ nĩ, ẽg vẽme tag ti. Ãjag tỹ ũn mág nĩ tó sór kỹ ẽg Senhor ti tóm nĩ. 18 Ẽg tỹ vẽso: “ũn há vỹ tỹ inh nĩ,” he mũ ra ẽg pijé tỹ ũn há nỹtĩ'. Ẽg Senhor tỹ ẽg to: “ũn há vỹ tỹ ti nĩ,” hen kỹ hã ẽg tóg tỹ ũn há nỹtĩ.
<- 2 CORINTO 92 CORINTO 11 ->