2 CORINTO 11

Ón kỹ apóstolo ag

1 Krĩ tũ nĩ ve inh nĩ, isỹ vẽnh kãmén kỹ. Hã ra ãjag tóg iso fe nỹtĩ, kỹ tóg há tĩ. 2 Ãjag to sóg hapẽ nĩ, Topẽ tỹ ãjag to há nĩ ri ke. Hã kỹ sóg ãjag jyvẽn tĩ. Kỹ ãjag tóg tỹ ũn mén ke mũ fi ri ke nỹtĩ. Kỹ Cristo vỹ tỹ ãjag mén ke ri ke nĩ sir. Vẽnh prũg tag to sóg ãjag kãn sór mũ mỹr, ãjag jãnhkri nỹtĩ jé, tytãg tỹ ũ mré nỹ ja tũ fi jãnhkri ẽn ri ke. 3 Hã ra sóg ãjag to: “ag mỹ ti tovãnh sór tũ nĩ vỹ?“ he mũ. Pỹn vỹ ũn ve fi mỹ ón, Japo ti, ti jykre e nĩn kỹ. Kỹ fi tóg ti vĩ kri nĩm. Kỹ tóg ãjag mỹ ón sór mũ gé, ha vem nĩ, ãjag tỹ Cristo tovãnh jé, ãjag tỹ ti to tar nĩ ẽn to krónh ke jé. 4 Hã kỹ ãjag tóg ũ ag vĩ jẽmẽ sór mũ, ag tỹ ãjag mỹ ón kỹ Jesus tó kỹ. Ag tỹ isỹ ãjag mỹ nén tó tũ tó mũ ra ãjag tóg jẽmẽ sór tĩ. Ón kỹ jagrẽ vỹ ãjag mỹ há nĩ ve nĩ, Topẽ tỹ ãjag mỹ nĩm ja tũ ẽn. Ón kỹ topẽ vĩ vỹ ãjag mỹ mẽ sér tĩ ve nĩ, ãjag tỹ vãsỹ mẽ ja tũ ẽn.

5 Ón kỹ apóstolo ag ne ãjag mỹ vẽnh vĩ tag tó sór mũ'. Inh pijé tỹ ag krẽm ke nĩ', ha mẽ. 6 Vĩ sĩnvĩ han tũ inh nẽji nĩ, ag vĩ sĩnvĩ ri ke. Hã ra sóg nén tỹ hẽn ri ke ki kanhró nĩgtĩ. Tag ve ãjag tóg mỹr, ãjag tỹ inh vĩ mẽ kỹ.

7 Ãjag mỹ sóg Topẽ vĩ tó ja nĩgtĩ. Kỹ sóg ãjag ki ti kaja ve sór ja tũ nĩ. Vẽsỹ ũn sĩ han ja inh nĩ, sỹ ãjag mré nĩn kỹ, ãjag tỹ tỹ ũn mág nỹtĩ jé, isugrĩn. Kỹ inh mỹ Topẽ vĩ mranh'? Vó, vẽjykre há vẽ. 8 Ẽmã ũ tá Jesus ki ge kỹ nỹtĩ fag ne inh mỹ fag jãnkamy vẽnh kãpãm ja nĩ, sỹ ãjag mré nĩn kỹ. Fag tũ hã ko ja inh nĩ. 9 Kỹ, isỹ jãnkamy ve sór mũ ra sóg ãjag mỹ tó ja tũ nĩ gé. “Ti hỹn ag mỹ jagy tĩnh mũ,” he sóg tĩ. Ga tỹ Macedônia tá ẽg régre ag ne inh ki junjun ja nĩgtĩ'. Kỹ ag tóg inh mỹ jãnkamy ũ ma kãmũ ja nĩ gé, sỹ to nén tỹ inh mỹ tũ nĩ ẽn mãn jé. 10 Ki hã tó sóg tĩ. Cristo tỹ ki hã tó tĩ ẽn ri ke han sóg tĩ. Kỹ sóg ãjag to: “ga tỹ Acaia tá ke ag jãnkamy mãn ke tũ inh nĩ, ag tỹ iso vĩ vĩ he tũ nĩn jé,” he mũ. 11 Hẽ ri ken kỹ? Inh mỹ ãjag to há tũ nĩgtĩ? Vó, ãjag to sóg há tãvĩ nĩ, kỹ Topẽ ne ki kanhró nĩ'.

12 Hã ra sóg ãjag tũ ve sór tũ nĩ, sỹ ag vĩ tỹ tũ' hen jé, ón kỹ apóstolo ẽn ag vĩ ti. Inh mỹ tóg ag tỹ ãjag mỹ: “Paulo ri ke inh nĩ. Inh mỹ ãjag tũ vẽnh kãpãm,” henh ha mẽ tĩ. Hã kỹ sóg ãjag tũ ve sór tũ nĩ. 13 Ón kỹ apóstolo vỹ tỹ ag nỹtĩ, mỹr, ha mẽ. Ón kỹ ag tóg: “Topẽ rãnhrãj han ẽg tóg mũ,” he tĩ. Ón kỹ ag tóg: “Cristo vỹ ẽg tỹ apóstolo han,” he tĩ. 14 Satanás jykre hã vẽ. Vẽsỹ tóg Topẽ tỹ jẽnẽ jafã ri ke han tĩ, ón kỹ, Nén Kórég ti. 15 Kỹ ti mỹ rãnhrãj tĩ ag tóg ón kỹ jykre kuryj nỹtĩ ve nĩ gé. Hã ra Topẽ tóg ag vóg kónãn ke mũ, ag rãnhrãj kórég to.

Paulo jagtar

16 Ha mẽ, inh pijé krĩ tũ nĩ'. Isỹ ãjag mỹ krĩ tũ nĩ ve ra iso há nỹtĩm nĩ, sỹ vẽso vẽnh vĩ há tón kỹ. 17 Sỹ ãjag mỹ sỹ nén ve ja ẽn tó sór vẽ. Kỹ sóg krĩ tũ nĩ ve nĩ. Ẽg tỹ ẽg Senhor jykre tó kỹ ẽg tóg tag tó tũ nĩgtĩ, sỹ tónh ke mũ tag. 18 Hã ra sóg tó sór mũ. Vẽnh kar tóg ãjag mỹ ag tỹ nén ve ja tó tĩ. Kỹ sóg ãjag mỹ tó sór mũ gé, ha mẽ. 19 Krĩ há ãjag nỹtĩ, ge ra ũn krĩ tũ ag tóg ãjag mỹ há nỹtĩ ve nĩ. 20 Ũ tỹ ãjag mỹ: “tag han ra, tag han tũg ra,” hen kỹ tóg ãjag mỹ sér tĩ ve nĩgtĩ. Ũ tỹ ãjag mỹ ónón mũ ag tóg ãjag mỹ há nỹtĩ ve nĩgtĩ. Ũ tỹ vẽso: “tỹ inh ũn mág nĩ,” he mũ ag vỹ ãjag mỹ há nỹtĩ ve nĩgtĩ gé, ũ tỹ ãjag kakã ki tãnh tĩ ẽn ag ke gé. 21 Inh mỹ'a tóg tĩ, sỹ tag tó kỹ. Vẽjykre tag han sór vãnh inh nĩgtĩ.

Hã ra ag tóg ãjag mỹ ag tỹ nén ve ja ẽn ti tó tĩ, ag jykre há ke gé. Kỹ sóg ag kóm tónh ke mũ gé sir, ha mẽ. 22 Hebreu vỹ tỹ ag nỹtĩ. Tỹ sóg Hebreu nĩ gé. Judeu vỹ tỹ ag nỹtĩ. Tỹ sóg Judeu nĩ gé. Abraão krẽ'krẽ vỹ tỹ ag nỹtĩ. Tỹ sóg Abraão krẽ'krẽ nĩ gé. 23 Cristo camarada vỹ tỹ ag nỹtĩ. Tag to sóg ag kãfór nĩ hã ra. Ha vé, krĩ tũ pẽ nĩ ve inh nĩ, sỹ tỹ ag kãfór nĩ tag tón kỹ.

Ha mẽ, isỹ tỹ Cristo camarada nĩ ti. Inh rãnhrãj e tag hã to sóg ag kãfór nĩ. Ise kỹ nĩ e ja hã to sóg ag kãfór nĩ gé. Inh mrãnmrãn kãfór han ag tóg tĩ gé. Ter kren tỹ hẽn ri ke han inh, ag kãfór ke gé. 24 Judeu ag ne inh mrãnmrãn e han, ẽmã tỹ 5 (ke) ki. Ag tỹ ũ mrãnmrãn tỹ 39 han tĩ ẽn tỹ ag tóg inh vóg kónãn' he ja nĩgtĩ. 25 Kar kỹ Romanos ag tóg ẽmã tỹ 3 (ke) ki ka téj tỹ inh mrãnmrãn ja nĩgtĩ gé. Pó tỹ ag inh pin ja nĩgtĩ gé, isén jé, Judeu ag. Kar kỹ sóg goj ki ter kren tãgtũ han gé. Ẽn kã sóg kejẽn kuty pir ki kurã mré goj nig kã mĩ nỹr tĩ nĩ, goj kafã tũ kã mĩ. 26 Kuvar há ra tĩg tỹ hẽn ri ke han inh. Kỹ goj var tóg inh jagtar han. Ẽg tũ péju tĩ ag vỹ inh jagtar han' he ja nĩgtĩ gé. Inh mré Judeu ag vỹ inh vóg kónãn sór tĩ ja nĩgtĩ, fóg ag ke gé, ẽmã ki ke ag ke gé, ẽmã tũ tá ke ag ke gé. Goj kafã tũ kri inh jagtar han. Ón kỹ ẽg kanhkã ag vỹ inh jagtar han' he ja nĩ gé. 27 Rãnhrãj mág to inh jagtar tĩ ja nĩgtĩ gé. To sóg ron tĩgtĩ. Kỹ sóg nũr tũ tỹ hẽn ri ke han tĩ ja nĩ gé. Kejẽn sóg kókĩr tĩ ja nĩ. Kejẽn sóg goj vég tũ nĩgtĩ. Kusa mẽg sóg tĩ. Kur tóg inh mỹ tũ' he tĩ gé. 28 Kỹ, isỹ kurã kar ki ti jagy tag vég mũ mré hã sóg igreja krẽm vẽnhmãn tĩ ag to krĩ kufy han tĩ gé. 29 Ũ tỹ Cristo vĩ to krónh ken kỹ tóg inh mỹ jagy tĩ gé. Ũ tỹ Topẽ vĩ mranh kỹ sóg kanẽ jur tĩgtĩ gé.

30 Kỹ, isỹ vẽnh kãmén kỹ sóg isỹ nén ũ jagy ve ja ẽn tó sór mũ, inh krój nĩ ẽn ti. 31 Topẽ hã ne ki kanhró nĩ', ẽg Senhor tỹ Jesus jóg ti. Ti hã mỹ ẽg vĩ há han ke mũ, kỹ tóg tũ' henh ke tũ pẽ nĩ. Ti hã ne ki kanhró kar nĩ'. Inh pijé ón mũ'. 32 Kejẽn sóg ẽmã tỹ Damasco tá nĩ ja nĩgtĩ. Kỹ pã'i mág tỹ Aretas ẽn krẽm pã'i ũ vỹ governo ki rĩr nĩ ja nĩgtĩ. Ẽn porisa ag tóg ijo vãji ja nĩgtĩ, ag tỹ ise jé. 33 Hã ra inh mré ke ag tóg, kẽj mág kã kã inh nĩm kỹ janẽra ki isérem, ẽmã to ró tỹ. Hã kỹ sóg kren. Isỹ ti jagy ũ ve jan hã vẽ.

<- 2 CORINTO 10 2 CORINTO 12 ->