1 Kỹ Jesus tỹ ũn vin mũ ag kar vỹ mẽg mũ, fóg ag tỹ Topẽ vĩ kri fig mũ ti, Judéia kar mĩ hã. 2 Kỹ Pedro tóg Jerusalém ra vỹn ke mũ. Kỹ tá Jesus ki ge kỹ nỹtĩ ag tóg ti mỹ: “vẽnh kar vỹ ag gré fár junun kym ke mũ, ag tỹ Topẽ jykre han sór kỹ,” he mũ. 3 “Ẽg jãvo ã tóg ũn fár kym ja tũ ag mré jẽn ja nĩ, ag ĩn ki,” he ag tóg.
4 Kỹ Pedro tóg ag mỹ: 5 “ẽmã tỹ Jope tá sóg nĩ ja nĩ, kỹ sóg Topẽ mré vĩ nĩ ja nĩgtĩ. Kỹ sóg nén nẽ vég mũ,” he mũ. “Tỹ tóg kur mág ri ke nĩ. Ti péno kygje tóg kanhkã tá kãtére mũ. Kỹ tóg inh ki jun mũ. 6 Kỹ sóg kã ki ẽvãnh mũ, kỹ sóg misu kar vég mũ, fa tỹ 4 (ke) tóg nỹtĩ, nẽn tãn ag mré hã, ag nug kri mũ tĩ ag mré hã, sẽsĩ kar mré hã. 7 Kỹ sóg vẽnh vĩ mẽg mũ, kỹ tóg: “tág', vỹ,” he mũ. “Tãnh kỹ kó,” he tóg. 8 Kỹ sóg ti mỹ: “nejé. Nén ũ jẽgry ko ja tũ sóg nĩ. Ẽg jykre tũ vẽ, ẽg tỹ misu ẽn kon kỹ,” he mũ. 9 Kỹ tóg inh mỹ: Topẽ tóg hã ra to: há ti nĩ, he mũ, kỹ jẽgryg tũg nĩ, he tóg. 10 Ge tãgtũ han tóg, kỹ nén nẽ ẽn tóg vég tũ' he mũ sir, kanhkã tá. 11 Hã ra ũn tãgtũ ag vỹ vẽsỹmér tá junjun mũ, inh nĩ ẽn tá. Ẽmã tỹ Cesaréia tá ag kãmũ ja nĩgtĩ, fóg tỹ iso ag jẽgnẽn kỹ. 12 Kỹ Topẽ kuprĩg tóg inh mỹ: “ha jatun mỹ ag mré tĩg,” he mũ. Kỹ tag ag tóg inh mré mũ mũ, ũ tỹ 6 (ke) tag ag, Jesus mré ke tag ag. Kỹ ẽg tóg fóg ẽn ĩn kã ra ge mũ sir.
13 Kỹ tóg ẽg mỹ ti tỹ Topẽ tỹ jẽnẽ jafã ve ja tó mũ. Ti ĩn kã tá tóg jẽ ja nĩ. Kỹ tóg nẽji ti mỹ: Jope ra ũ ag jẽgnẽ, he mũ. Tá Simão jé prẽr, Pedro he mũ ẽn, he tóg nẽji ti mỹ. 14 Ẽn vỹ ã mré vĩnh mũ. Kỹ ã tóg kren ke mũ, ã mré ke kar fag ke gé, he ja tóg nĩ nẽji ti mỹ,” he tóg.
15 “Kỹ sóg ag mỹ kãmén mũ. Kỹ Topẽ kuprĩg tóg vãhã ag ki rã mũ. Ti tỹ ẽg ki rã ri ke han tóg mũ, kurã ẽn kã. 16 Kỹ sóg Jesus vĩ to jykrén mũ, ti tỹ ẽg mỹ: João tóg goj tỹ ag kygpe ja nĩgtĩ, hã ra Topẽ kuprĩg tóg ag kã ra rãnh mũ, tỹ vẽnh kype ri ke vẽ sir, he ẽn to. 17 Kỹ Topẽ vỹ ag jagrẽn mũ, ti kuprĩg tỹ. Ti tỹ ẽg jagrẽn ri ke vẽ, ẽg tỹ Jesus Cristo ki ge kỹ. Hã kỹ sóg Topẽ kato tẽ jãvãnh ja nĩ,” he tóg, Pedro ti.
18 Ag tỹ tag mẽ kỹ ag krĩ tóg kusa' he mũ. Kỹ ag tóg: “Topẽ vỹ fóg ag krĩn mũ gé, ag tỹ ag jykre kórég tovãnh jé, ag tỹ ẽg rĩr krỹg ja tũ ve jé,” he mũ.
19 Ag tỹ Estêvão tén kar kỹ Jesus ki ge kỹ nỹtĩ ag tóg vẽnh kãpugpóv kãn mũ, ag tỹ ag vóg kónãn kỹ. Kỹ ag tóg ga tỹ Fenícia ra mũ mũ, goj vãso tỹ Chipre ra, ẽmã tỹ Antioquia ra ke gé. Ag mũn kỹ ag tóg Judeu ag hã mỹ Topẽ vĩ tó mũ.
20 Kejẽn Chipre tá ke ũ ag tóg ẽmã tỹ Antioquia ra mũ mũ, Cirene tá ke ag ke gé. Ẽn ag tóg fóg tỹ Grego vĩ tó tĩ ag mỹ Jesus Cristo kãmén mũ, vẽnh vĩ sér tag ti. 21 Kỹ Topẽ tóg ag mré ag krĩn mũ. Kỹ ũ tỹ hẽn ri ke ag tóg Jesus ki ge mũ, Topẽ jykre han jé. 22 Kỹ Jerusalém tá ũ tỹ Jesus ki ge kỹ nỹtĩ ag tóg mẽg mũ, fóg ag tỹ Jesus vĩ kri fig mũ ti. Kỹ ag tóg Barnabé jẽnẽg mũ, ti tỹ Antioquia ra tĩg jé, tá ve jé.
23 Ti tỹ tá jun kỹ ti fe tóg mrin ke mũ, Topẽ tỹ ag jagãgtãn kỹ. Kỹ tóg ag jyvẽn mũ, ag tỹ Jesus ki rã to krónh ke tũ nĩn jé, ag tỹ fe tar nỹtĩn jé. 24 Barnabé vỹ tỹ ũn vĩ há nĩ, Topẽ kuprĩg tỹ tóg jagrẽ nĩ. Jykre pir han kỹ tóg nĩ nĩ. Kỹ ũ tỹ hẽn ri ke ag vỹ Jesus ki ge mũ gé sir, ti tỹ ag jyvẽn kỹ.
25 Kỹ Barnabé tóg ẽmã tỹ Tarso ra tĩ mũ, Saulo jãvãnh jé, tá. 26 Ti tỹ ti ve kỹ tóg ti pére tĩ mũ, Antioquia ra. Tá ag tóg prỹg pir han. Jesus ki ge kỹ nỹtĩ ag tỹ vẽnh mãn kỹ ag tóg ag kanhrãn tĩ, Barnabé ti, Saulo ti ke gé. Kỹ ũn e vỹ ag vĩ jẽmẽg tĩ. Antioquia tá ag tóg Jesus mré mũ ag to: “Cristo mré ke ag,” he vén ja nĩ. Kỹ ẽg jiji vẽ sir, hã vỹ: Cristo mré ke ag, he mũ.
27 Kejẽn Jerusalém tá ke ũ ag tóg Antioquia tá junjun mũ, Topẽ vĩ tó tĩ ag. 28 Ag kã ũ jijin hã vỹ: Ágabo, he mũ. Ẽn vỹ Topẽ kuprĩg tỹ ti krĩn kỹ: “kejẽn ẽg tóg prỹg venh ke mũ, kãnhmar,” he mũ, “ga kar mĩ hã,” he tóg. Kỹ tóg Cláudio tỹ tỹ pã'i tỹ imperador nĩn kỹ ge nĩ. 29 Prỹg tĩnh ken kỹ Jesus mré ke ag tóg Judéia tá ke ag to jykrén mũ sir. Kỹ ag tóg: “ẽg hỹn ag mỹ nén ũ jẽnẽnh mũ, ag tỹ kon jé,” he mũ. Kỹ ag tóg ag tũ kuju vin han mũ, ag tỹ Judéia tá Jesus mré ke ag mỹ jẽnẽ jé. 30 Kỹ ag tóg Barnabé jẽnẽg mũ, Saulo ke gé, ag tỹ gé(g) mũ jé, igreja to kófa ag mỹ vin jé, ag tỹ Jesus ki ge kỹ nỹtĩ ag mỹ kãnhkrén jé.
<- HAN KÃME 10HAN KÃME 12 ->