1 Kỹ ag tóg ẽmã tỹ Anfípolis mĩ pa mũ, ẽmã tỹ Apolônica mĩ ke gé. Kỹ ag tóg Tessalônica tá junjun mũ. Tá Judeu ag vẽnh kanhrãn jafã tóg jẽ. 2 Kỹ Paulo tóg ti tỹ nén han tĩ ẽn han mũ sir. Judeu ag vẽnh kanhrãn jafã kã ra tóg rã mũ. Ag mré tóg vĩ mũ, vẽnh kán ke kurã tãgtũ ki. Topẽ vĩ tó tóg mũ sir ag mỹ, vãsỹ rán kỹ nĩ ẽn ti. 3 Ag mỹ tóg Cristo kãmén mũ, ti jagtar ja ti, ti ter kar rĩr mãn ja ẽn ti. “Jesus hã vẽ, hã vỹ: Cristo, he mũ. Vãsỹ tóg rán kỹ nĩ, Cristo jagtar ke ti, ti rĩr mãn ke ti ke gé,” he tóg.
4 Kỹ tóg ũ ag mỹ ge nĩ, Judeu kã mĩ ũ ag mỹ. Kỹ ag tóg Paulo mré mũgtĩ, Silas mré ke gé. Kỹ fóg tỹ hẽn ri ke ag tóg to há nỹtĩ gé sir, ũ tỹ Topẽ kamẽg mũ ag, ũn tỹtá há fag ke gé.
5 Hã ra tóg Judeu ũ ag mỹ ũ nỹ. Hã kỹ ag tóg ũn kórég ag mỹ: “kãmũ jẽg ra,” he mũ, ũn rãnhrãj vãnh ag mỹ. Vẽnh génh kỹ ag tóg vẽnh kar jũgjũ han mũ. Kỹ ag tóg Jasão he mũ ẽn ĩn jy nỹtĩ nĩ sir. Paulo ag jãvãnh ag tóg mũ, ag tỹ vẽnh kar jũgjũ ẽn ag mỹ ag ven jé. 6 Hã ra ag tóg ag vég tũ nĩ. Kỹ ag tóg Jasão pére mũ mũ, Jesus mré ke ũ ag mré. Pã'i ag mỹ ag tóg ag vin mũ. Kỹ ag tóg jamã hára prẽnprẽr mũ. “Ũ tỹ ẽmã kar mĩ vẽnh kar jũgjũ han mũ ag tóg tag ki junjun mũ mỹr,” he ag tóg mũ. 7 “Jasão tóg ag mỹ: kãge jẽg ra, hé. Hã ra ag kar tóg pã'i mág tỹ imperador vĩ mranh ja nĩgtĩ. Vyr mỹ ẽg pã'i mág nỹtĩ, hã vỹ: Jesus, he mũ, he ag tóg, Paulo ag,” he ag tóg mũ. Ag tỹ Paulo to ón hã vẽ.
8 Kỹ ũ tỹ mẽg mũ ag vỹ fe ũ nỹtĩ sir, ẽmã ẽn tá pã'i ũ ag, tá ke kar ag ke gé. 9 Kỹ pã'i ag tóg Jasão ag mỹ: “ẽg mỹ jãnkamy nĩm ge, ẽg tỹ to ve jé, ãjag tỹ imperador kato tẽnh ke tũ ti,” he mũ. Ag tỹ ag mỹ nĩm kar kỹ ag tóg ag mỹ: “ha mũ jẽg,” he mũ sir.
10 Kuty ẽn kã Jesus mré ke ag tóg Paulo mỹ: “ha tĩg, Beréia ra,” he mũ. Silas mỹ ag tóg ke mũ gé. Kỹ ag tóg mũ mũ.
11 Beréia tá ke ag tóg jykre há nỹtĩ. Ag pijé Tessalônica tá ke ag ri ke nỹtĩ'. Kỹ ag tóg Paulo ag vĩ kri fig mũ. Ag mỹ tóg há tĩ sir. Kurã kar ki ag tóg Topẽ vĩ to vẽnh kanhrãn mũ, ag tỹ to: “ki hã tóg tó tĩ,” hen kỹ. 12 Kỹ ũ tỹ hẽn ri ke ag tóg Jesus ki ge mũ, fóg ag mré hã, ũn tỹtá há fag mré hã.
13 Kỹ Judeu ag tóg mẽg mũ, Tessalônica tá. Paulo tỹ Beréia tá Topẽ vĩ tó mẽg ag tóg mũ sir. Kỹ ag tóg Beréia tá junjun mũ, ag tỹ tá vẽnh kar jũgjũ han jé. 14 Kỹ Jesus mré ke ag tóg Paulo mỹ: “ha tĩg, canoa mág kã mĩ,” he mũ. Hã ra Silas vỹ tĩ tũ nĩ, Timóteo ke gé. Beréia tá ag nỹtĩ. 15 Kỹ ũ ag tóg Paulo pére mũ mũ. Ẽmã tỹ Atenas ra ag tóg ti mré mũ mũ. Ag tỹ tá vỹnvỹn kenh ken kỹ Paulo tóg ag mỹ ke mũ, ag tỹ Silas jé prẽr jé, Timóteo jé ke gé, ag tỹ vẽsỹmér ẽmã tỹ Atenas ra ti nón mũ jé.
16 Kỹ Paulo tóg Atenas tá nĩ nĩ, Silas mré Timóteo jãvãnh kỹ. Hã ra tóg sir krĩ ũ nĩ, ti tỹ tá vẽnh kãgrá tỹ hẽn ri ke ven kỹ. 17 Kỹ tóg Judeu ag tỹ vẽnh kanhrãn jafã krẽm Judeu ag mré vĩ mũ, fóg tỹ Judeu jykre han mũ ag mré ke gé. Kurã kar ki tóg ẽmã kuju tá vẽnh kar mré vĩ mũ gé sir.
18 Kỹ ũ ag tóg ti mré vĩ mũ, ũ tỹ Epicuro tỹ nén rán ja to jykrén mũ ag, ũ tỹ Estóico he mũ ag tỹ nén rán ja to jykrén mũ ag ke gé. Kỹ ag tóg ti to: “vĩ mẽ tóg nĩ,” he mũ. “Ti hỹn tóg ne tó'?“ he ag tóg. Kỹ ũ ag tóg ti to: “topẽ ũ tugtó ti hỹn, kór há tá topẽ,” he mũ. Hã ra Paulo tóg Jesus kãme sér tó mũ. Jesus rĩr mãn tó tóg mũ.
19 Kỹ ag tóg sór tỹ Areópago ra ti pére mũ mũ. Tá pã'i ag tóg ag jyvẽn tĩ. Kỹ pã'i ag tóg ti mỹ: “ã tỹ vẽjykre tó mũ tag kãmén há han ra, ẽg mỹ,” he mũ. 20 “Ge mẽ ja tũ ẽg nỹtĩ. Kỹ ẽg mỹ kãmén há han nĩ,” he ag tóg.
21 Hã ra Atenas tá ke ag tóg vẽnh vĩ tãg mẽ to há nỹtĩ. Ag tỹ vẽnh vĩ mẽ ja tũ mẽ kỹ ag fe tóg mrin ke tĩ.
22 Kỹ Paulo tóg sór tỹ Areópago kri jẽ kỹ ag mỹ: “Atenas tá ke', topẽ tỹ hẽn ri ke kamẽg ãjag tóg tĩ. Tag ve sóg,” he mũ. 23 “Ãjag jamã mĩ sóg tĩ, kỹ sóg ãjag topẽ ĩn kãsir kar vigvé. Kỹ sóg topẽ ĩn sĩ ũ vé, kỹ tóg: ẽg tỹ topẽ ki kagtĩg ĩn, he mũ, ti rá ti. Ãjag tỹ Topẽ ki kagtĩg ẽn tó sóg tĩ. Ãjag tỹ ti ki kagtĩg nỹtĩ ra ãjag tóg ti mỹ nén ũ kugprũg tĩ.
24 Topẽ ẽn vỹ mundo kar han, mĩ mũ kar ke gé. Kanhkã tãn vẽ mỹr, kỹ tóg tỹ ga to pã'i nĩ gé. Hã kỹ tóg ẽg tỹ ti ĩn han krẽm nĩ tũ nĩgtĩ. 25 Kỹ ẽg tóg ti ki rĩr ke tũ nĩ gé, ti jagtar tũ nĩn kỹ. Vẽnh kar rĩn tóg nĩgtĩ, kỹ tóg vẽnh kar tỹ hãmhãm ke han tĩ. Vẽnh kar tỹ nén ve sór mũ kar nĩm tóg tĩ. 26 Kỹ tóg vẽnh kyvénh pir tỹ ẽprã ke kar hynhan, nação kar, ga kar mĩ mũ ag. Tỹ ẽg vẽnh kyvénh pir nỹtĩ. Kỹ tóg ẽg mỹ ẽg mur ke kurã nĩm mũ gé, ẽg ter ke kurã ti ke gé. Ẽg mỹ tóg ẽg jamã nĩm mũ gé, Topẽ ti. 27 Vẽnh kar hynhan tóg, ẽg tỹ ti to há nỹtĩ jé, ẽg tỹ ti ki kanhró nỹtĩ jé. Ti pijé kuvar gy nĩ'. Kakó ti nĩ. 28 Ti tỹ ẽg han ja vẽ mỹr, hã kỹ ẽg tóg rĩnrĩr nỹtĩ, ti tugrĩn. Ti tugnĩn ẽg tóg mũgtĩ. Hã kỹ ãjag kã mĩ vẽnhrán tĩ ag tóg: tỹ ẽg Topẽ krẽ nỹtĩ, he ja nĩgtĩ. 29 Ẽg tỹ tỹ ti krẽ nỹtĩn kỹ ẽg tóg ti ki kanhró nỹtĩ gé. Ouro ri ke tũ ti nĩ. Ti pijé prata ri ke nĩ'. Ti pijé pó ri ke nĩ'. Ti pijé tỹ vẽnh kãgrá nĩ'. Ẽprã ke tỹ nén to jykrén mũ ri ke tũ ti nĩ. Topẽ vẽ, Topẽ,” he tóg, Paulo ti.
30 “Hã ra tóg ẽg to fen mág mũ, ẽg tỹ ti ki kagtĩg nỹtĩn kỹ. Hã kỹ tóg vãhã vẽnh kar mỹ vẽnh vĩ jẽnẽg mũ, ẽg tỹ ẽg jykre pãno tovãnh jé. 31 Kurã nĩm tóg huri, kỹ tóg kurã ẽn ki ẽprã ke jykre kar tugnỹm ke mũ. Ũn pir kuprẽg tóg, ti tỹ ti jagfy ẽg kar jykre tugnỹm jé. Ẽn tóg ter ja nĩ, hã ra Topẽ tóg ti rĩn mãn ja nĩ, ẽg tỹ ti ki kanhkó nỹtĩ jé,” he tóg, Paulo ti.
32 Ti tỹ ag mỹ ti ter kar rĩr mãn tón kỹ ũ ag tóg to é he mũ. Jó ũ ag tóg: “kurã ũ kã ẽg hẽn ri ke mũn ã vĩ mẽ mãn sór mũ,” he mũ. 33 Hã kỹ Paulo tóg tĩ mũ sir, ag ré kỹ. 34 Kỹ ũ ag tóg ti nón mũ mũ, kỹ ag tóg Jesus ki ge mũ sir. Ag kã ũ vỹ tỹ Dionísio nĩ. Areópago tá ag jyvẽn tĩ ag kã ũ vẽ. Kỹ ũ fi tóg Jesus ki rã mũ gé. Fi jiji hã vỹ: Damáris, he mũ. Kỹ ũ ag vỹ ti ki ge mũ gé sir.
<- HAN KÃME 16HAN KÃME 18 ->