1 Kurã tỹ 5 (ke) tũg kỹ pã'i tỹ Ananias vỹ tá jun mũ, Cesaréia tá. Topẽ tũ to pã'i mág vẽ. Kófa ag vỹ junjun mũ gé, ti mré. Ag kã mĩ ũ vỹ tỹ advogado nĩ, ti jiji hã vỹ: Tértulo, he mũ. Kỹ ag tóg governador mỹ Paulo tó mũ, ón kỹ ti kato vĩ kỹ. 2 Kỹ tóg Paulo jé prẽr mũ.
5 “Tag ti vỹ vĩ kónãn tĩ. Judeu kar ag krĩn kónãn tóg tĩ, kỹ ag tóg tĩ tugrĩn vẽnh kãpugpóv kỹ nỹtĩ. Ga kar mĩ tóg ke tĩ. Kỹ tóg tỹ Nazaré tá ke ẽn mré ke ag pã'i mág nĩ gé,” he tóg, Paulo to. 6 “Kỹ tóg Topẽ ĩn kavénh sór mũ gé, hã kỹ ẽg tóg ti kãgmĩ. Ẽg tỹ ẽg jykre ki ti jyvẽn ke vẽ vẽ,” he tóg. 7 “Hã ra Lísias tóg kãtĩ mũ, soldado ag pã'i mág ẽn ti. Kỹ tóg ẽg kuju ki ti kãgmĩ kỹ ti tỹ hãn ke mũ, jũ kỹ,” he tóg. 8 “Kỹ tóg ti kato vĩ mũ ag mỹ ké, ag tỹ ã venh kãmũ jé. Ã tỹ vẽse tag ki jẽmẽ kỹ ã tóg venh ke mũ. Ki hã ẽg tóg tó tĩ. Ã mỹ ti tónh ke mũ,” he tóg, Tértulo ti. Ti tỹ Paulo to ón hã vẽ.
9 Kỹ Judeu ag tóg: “ti tỹ ki hã tó vẽ,” he mũ gé.
10 Kỹ Félix tóg Paulo mỹ ti nĩgé ven mũ, ti vĩ jé. Kỹ tóg: “prỹg tỹ hẽn ri ke ki ã tóg tỹ pã'i mág nĩ, Judeu ag mỹ. Hã kỹ tóg sỹ ã mỹ inh jykre tón kỹ inh mỹ sér tĩ,” he mũ.
11 “Kurã tỹ 12 (ke) pãtén tũ tóg nĩ, sỹ Jerusalém tá jun ti. Sỹ tá Topẽ tũ han jé sóg ra tĩg ja nĩgtĩ. Vẽnh kar vỹ tá inh ve ja nĩgtĩ. Ag hỹn ã mỹ tónh ke mũ, ã tỹ ag ki jẽmẽn kỹ. 12 Hã ra sóg jatun mỹ isũ han tĩ ja nĩ. Topẽ ĩn krẽm sóg ũ vĩ kafãn ja tũ nĩ. Vẽnh génh han ja tũ sóg nĩ gé. Nén ũ kórég han ja tũ sóg nĩ gé. 13 Ag tỹ inh kato vĩ mũ pijé tỹ ki hã ke nĩ'. Ã tỹ ve há han kỹ ã tóg ki kanhrãn nĩnh mũ. 14 Kỹ sóg ã mỹ ki hã tónh ke mũ ha. Inh jógjóg ag tỹ Topẽ jykre han ja ẽn hã han isóg tĩ gé, ag ri kén. Kỹ sóg vãsỹ Topẽ vĩ rán kỹ nĩ ẽn kri fig tĩ gé, ũ tỹ Topẽ vĩ tó tĩ ag tỹ nén rán ja ẽn ti, Moisés mré hã. Hã ra sóg vẽjykre tãg tag han mũ gé, Topẽ tỹ ũri ẽg mỹ nén tó mũ ti,” he tóg. 15 “Hã ra sóg ag ri kén Topẽ tỹ nén han ke mũ ẽn ve sór mũ. Ti tỹ ẽg ter kar kỹ ẽg rĩn mãn ke ẽn ve sór isóg mũ. Ũn jykre kuryj ag rĩn mãn jé tóg ke mũ, ũn jykre pãno ag ke gé,” he tóg. 16 “Kỹ sóg tĩg há han sór mũ, ũ tỹ iso: nén ũ kórég han ti huri, he tũ nĩn jé. Topẽ rĩnve sóg tĩg há han sór mũ,” he tóg.
17 “Vãhã sóg Jerusalém tá jun mãn. Prỹg tỹ hẽn ri ke ki sóg tá jun ja tũ nĩ vẽ. Hã ra sóg ra vyr, isỹ inh povo ki ũn jagtar fag mỹ nén ũ vin jé, isỹ Topẽ mỹ nén ũ pũn jé ke gé. 18 Vẽnh jãnhkrig ja sóg nĩ, ẽg jykre ki. Kỹ sóg jatun mỹ Topẽ ĩn kã ra rã ja nĩ. Vẽnh génh han tũ sóg nĩ. 19 Hã ra Judeu tỹ Ásia tá ke ag vỹ tá inh ve ja nĩgtĩ gé. Ẽn ag tỹ tag ki inh kato vĩ kỹ tóg há tĩ vẽ. 20 Hã ra ũ tỹ ki nỹtĩ ag tỹ ã mỹ inh jykre kórég tónh ke vẽ. Vẽnh jyvẽn tĩ ag vỹ inh ki jẽmẽ ja nĩ, kỹ tag ag vỹ tá nỹtĩ ja nĩ. Hã ra ag tóg tá isỹ nén ũ vẽnh mỹ han ve ja tũ nĩ. 21 Vẽnh vĩ pir hã tỹ sóg jamã hára tó ja nĩ, ag rĩnve, hã vỹ: Topẽ tỹ ũn ter mũ rĩn mãn ke ẽn kri sóg fig mũ, hã kỹ ãjag tóg ũri iso jũgjũ mũ, he ja sóg nĩ ag mỹ,” he tóg, Paulo ti.
22 Kỹ Félix tóg kurã ũ kã ti ve mãn sór mũ. Jesus jykre ki kanhró tóg nĩ. Hã kỹ tóg: “pã'i tỹ Lísias kãtĩg kỹ sóg ãjag ki jẽmẽ kãn mũ,” he mũ. 23 Kỹ tóg capitão mỹ: “ti fẽg han ra. Ti jagãgtãn ra. Ti mré ke ag tỹ ti mỹ nén ũ nĩm kỹ tóg há nĩ. Ti mỹ nenh tũg nĩ,” he mũ.
24 Si há tũ ra Félix vỹ Paulo vĩ mẽ mãn sór mũ, ti prũ tỹ Drusila fi mré. Judeu fi vẽ. Kỹ tóg ti jé prẽr mũ sir, ti tỹ fag mỹ Jesus Cristo ki rã kãmén há han jé.
25 Kỹ tóg fag mỹ vẽjykre kuryj kãmén há han mũ sir. Ẽg tỹ vẽso jykrén kỹ nén ũ vẽnh mỹ han ke tũ kãmén tóg mũ gé. Topẽ tỹ kar kỹ ẽg jykre tugnỹm ke tó tóg mũ. Kỹ Félix tóg jũrũn' ke mũ sir, ti tỹ ti jykre pãno to jykrén kỹ. Kỹ tóg ti mỹ: “ha ver tĩg. Kejẽn sóg ã ki jẽmẽ mãn mũ gé,” he mũ. 26 Hã ra tóg Paulo ki jãnkamy mãn sór mũ gé, ti tỹ ti kavãn jé. Hã kỹ tóg kãnhmar ti jé prẽr mãn', ti jé prẽr mãn' he mũ, ti mré vẽmén jé.
27 Hã ki prỹg régre tóg tũg mũ sir. Kỹ Félix jẽgja kã ũ tóg jẽ mũ sir, hã vỹ: Pórcio Festo, he mũ. Kỹ Félix tóg Judeu ag to vĩ há han sór mũ, ag tỹ ti to jykrén há han jé, ti nón. Hã kỹ tóg Paulo kavãg tũ nĩ. Se kỹ tóg jẽ nĩ.
<- HAN KÃME 23HAN KÃME 25 ->