1 Hã kỹ Festo tóg kejẽn Paulo mỹ: “ã tỹ ga tỹ Itália ra tĩg ke nẽ ha,” he mũ. Kỹ tóg pã'i tỹ Júlio mỹ ti fẽg mũ. Soldado ag capitão vẽ, ũ tỹ tỹ Imperador mré ke ẽn ag. Ti mỹ tóg vẽse ũ ag vin mũ gé.

2 Kỹ ẽg tóg canoa mág kã ra ge mũ sir. Ẽmã tỹ Adramítio tá ke vẽ, canoa mág ẽn ti. Ag tỹ ga tỹ Ásia fyr ra mũ sór vẽ. Kỹ ẽg tóg goj kã mĩ mũ mũ, tá pa kỹ. Aristarco tóg ẽg mré tĩ mũ, ẽmã tỹ Tessalônica tá ke ẽn ti, ga tỹ Macedônia tá.

3 Tỹ vaj kỹ ẽg tóg ẽmã tỹ Sidom tá krỹg mũ sir. Kỹ Júlio tóg Paulo mỹ vĩ há han kỹ ti mỹ: “ã mré ke ag venh tĩg, ag tỹ ã ki rĩr jé,” he mũ.

4 Tá pa kỹ kãka tóg ẽg kato tẽ mũ. Hã kỹ ẽg tóg goj vãso tỹ Chipre kakãm mũ mũ. Ẽg jakãnh tá tóg nĩ. 5 Kỹ ẽg tóg goj kafã tũ kã mĩ mũ mũ, ga tỹ Cilícia fyr to, ga tỹ Panfília fyr to ke gé. Kỹ ẽg tóg ẽmã tỹ Mirra tá junjun mũ sir, ga tỹ Lícia tá. 6 Tá capitão tóg canoa mág ũ vég mũ. Ẽmã tỹ Alexandria tá ke vẽ. Kỹ tóg ga tỹ Itália ra tĩg sór mũ. Kỹ tóg ẽg mỹ: “ẽn kã ra ge jẽg,” he mũ. 7 Kỹ ẽg tóg kã mĩ mũ mũ. Komẽr hã ẽg tóg mũ mũ, kurã tỹ hẽn ri ke ki. Kỹ ẽg tóg vãhã goj vãso tỹ Cnido tá junjun mũ. Hã ra kãka tóg ẽg kato tẽ mũ gé. Kỹ ẽg tóg tá fĩn rãm tũ nĩ. Kỹ ẽg tóg goj vãso tỹ Creta kakãm mũ mũ, kãka tỹ ẽg tỹ vĩrĩn ke kỹ. Krĩ tỹ Salmona kakãm ẽg tóg mũ mũ, kãka krẽfĩn. 8 Creta fyr to hã tĩg tóg jagy tĩ. Kỹ ẽg tóg vãhã komẽr hã “canoa sag ja há” he mũ tá junjun mũ. Ẽmã ũ vỹ tá kakó nĩ, ti jiji hã vỹ: Laséia, he mũ. 9 Hã ra ẽg tóg komẽr hã mũ ja nĩgtĩ, hã kỹ kusa tóg kakó tĩ ha. Kỹ tóg goj kã mĩ tĩg kórég tĩ, kóho tugrĩn. Fénhta ũ pãtén tóg huri, Judeu ag tỹ vãkre jafã ti. Hã kỹ Paulo tóg ag mỹ: 10 “goj tóg kã mĩ tĩg kórég tĩ ha. Kỹ ẽg tóg jagtar mũ ha. Kỹ tóg inh mỹ canoa tỹ nĩnunh mỹ tĩg ha mẽ tĩ,” he mũ. “Kỹ ãjag tũ vỹ vãgfor mũ sir. Jó ẽg hẽn ri ke mũn kãgter ke mũ gé. Tag ki nỹtĩn kỹ ẽg kusa kã panh mũ,” he tóg.

11 Hã ra capitão tóg canoa tỹ tũn mũ vĩ mẽg mũ sir. Canoa vóg mũ vĩ mẽg tóg mũ gé. Hã kỹ tóg Paulo vĩ mẽg tũ nĩ sir. 12 Canoa sag ja ẽn tóg há sĩ nĩ, hã kỹ ag tóg tá kusa kã pa vãnh nỹtĩ. Hã kỹ ũn e ag tóg tá pa sór mũ, ag tỹ ẽmã tỹ Fenice tá kusa kã pa jé. Goj vãso tỹ Creta tá ẽmã ũ vẽ, canoa sag ja há ũ vẽ.

13 Hã ra kãka sĩ tóg komẽr hã kraug he mũ sir. Kỹ tóg ag mỹ há tĩ. Hã kỹ ẽg tóg tá pa kỹ Creta fyr kakó ra mũ mũ sir. 14 Vãhã kóho jũ tóg canoa kato tẽ mũ sir, ti jiji hã vỹ: Nordeste, he mũ. Creta tán kãtĩ mũ. 15 Hã ra ẽg tóg kóho jũ tag kato canoa vóg tỹ hẽ ri ke tũ nĩ, kỹ ẽg tóg ti vóg tovãnh mũ sir. Kỹ kóho tóg canoa va tĩ mũ. 16 Kỹ ẽg tóg goj vãso sĩ to hã mũ mũ, ti jiji hã vỹ: Cauda, he mũ. Hã ra ẽg tóg canoa sĩ nỹgnỹn kãmũ ja nĩ, ti se kỹ. Cauda tá ẽg tóg canoa mág kri ti fi han sór mũ, hã ra ẽg tóg to jagtar mũ, kóho to. 17 Vãhã ag tóg ti kãtãnfyn mũ. Kar ag tóg canoa mág tógfĩg mũ, ti tỹ vãm ke tũ nĩ jé. Hã ra ag tóg rỹnhrỹj kamẽg mũ, rỹnhrỹj tỹ Sirte he mũ ẽn. Ga tỹ Líbia fyr tá ti nỹ. Hã kỹ ag tóg kur tỹ canoa kri sa ẽn kunũg mũ sir, kãka tỹ ti tĩn tũ nĩ jé.

18 Hã ra ẽg tóg kóho jũ to jagtar mũ. Kỹ ag tóg tỹ vaj kỹ canoa tỹ rĩg tĩ ẽn kuju vãm mũ sir, goj ki. 19 Tỹ vaj ũn kỹ ẽg tóg jagãgtar pẽ nỹtĩ, kỹ ẽg tóg vãvãm kãn mũ sir, canoa kã ki nỹtĩ ẽn, ti tralha ti. Ẽg kar tóg ag mré vãvãm mũ sir. 20 Kurã tỹ hẽn ri ke ki ẽg tóg rã vég tũ nĩ, krĩg ke gé. Kóho jũ ẽn tóg ẽg kato tẽ mũ. Kỹ tóg ẽg mỹ ẽg kãgter ha mẽ tĩ. “Ẽg hỹn krenkren ke tũ nĩ ha,” he ẽg tóg.

21 Hã ra ẽg tóg jẽg tũ ja nĩ, kurã tỹ hẽn ri ke ki. Kỹ Paulo tóg ag to tĩg kỹ: “ãjag tỹ inh vĩ kri finh ke vẽ vẽ,” he mũ. “Ẽg tỹ Creta tá kãpa tũ nĩ ra ẽg jagtar ke tũ nĩ vẽ, kỹ ãjag tóg ãjag tỹ nén ũ kren ke tũ nĩ vẽ. 22 Hã ra ãjag fe ti tỹ rỹnh kem nĩ. Ẽg kar vỹ krenkren mũ. Canoa hã vỹ tũ' henh mũ'. 23 Kuty tag kã Topẽ tỹ jẽnẽ jafã tóg inh mré vĩ mũ. Inh Senhor hã vẽ, ũ tỹ ti jẽnẽg mũ ti, hã vỹ: Topẽ, he mũ,” he tóg. 24 “Ti tỹ jẽnẽ jafã tóg inh mỹ: kamẽg tũg nĩ, Paulo', he mũ. Pã'i mág tỹ Imperador ve jé ã tóg ke mũ, kỹ Topẽ tóg ã mré mũ ag kar vin, ag tỹ ã mré krenkren jé, he tóg. 25 Kỹ ãjag fe ti tỹ há' hem nĩ. Topẽ vĩ kri sóg fig mũ. Ti tỹ inh mỹ tó mũ vỹ ge nĩ. 26 Jó tóg ẽg tỹ canoa tỹ goj vãso to tĩn há tĩ,” he tóg, ag mỹ, Paulo ti.

27 Semana régre vẽ sir, ẽg tỹ goj kafã tũ mĩ mũ kri. Goj kafã tũ ẽn jiji hã vỹ: Mediterrâneo, he mũ. Kuty kuju ki canoa vóg tĩ ag tóg: “ga hỹn kakó nĩ ha,” he mũ. 28 Kỹ ag tóg goj kãmun mũ sir. Kỹ tóg 36 metros he mũ. Kãnhmar ag tóg kãmun mãn, kỹ tóg 27 metros he mũ sir. 29 Kỹ ag tóg pãró kamẽg mũ, ẽg tỹ kã tag kenh ha mẽ tĩn kỹ. Kỹ ag tóg canoa nér tá ti se jafã tỹ 4 (ke) vin mũ. Ferro ũ vẽ, ti se jafã ti. Ti tỹ rỹnhrỹj kã kã nỹ kỹ canoa tóg tá krỹg he mũ. Kỹ tóg ag tỹ kurã venh há tĩ, canoa vóg tĩ ag. 30 Kỹ ag tóg canoa sĩ ẽn térem mũ, goj ki. Canoa se jafã tỹ ag tóg kã ki vin mũ, ag tỹ ón kỹ canoa krĩ tá vin jé. Hã ra ag tóg canoa mág ré kỹ ga ra mũ sór mũ.

31 Hã ra Paulo tóg vég mũ. Kỹ tóg capitão mỹ: “ag tỹ pa kỹ ãjag tóg krenkren ke tũ nĩ,” he mũ.

32 Kỹ soldado ag tóg vãfe kym mũ sir, ag tỹ vãfe tỹ canoa sĩ térem kỹ. Kỹ canoa sĩ ẽn tóg kutẽ mũ sir.

33 Tỹ vaj ken kỹ Paulo tóg vẽnh kar jyvẽn mũ, ag jẽn jé. Kỹ tóg: “semana régre vẽ ha, ãjag fe von kỹ. Nén ũ kãmẽg tũ ãjag nỹtĩ ver,” he mũ. 34 “Pũ ko ra, ãjag tỹ tar há ki krenkren jé. Ũ vỹ ter ke tũ nĩ, kỹ ũ vỹ kaganh ke tũ nĩ gé,” he tóg. 35 Kar kỹ tóg pũ mãg mũ sir. Vẽnh kar rĩnve tóg Topẽ mré vĩ mũ, kỹ tóg kupãn kỹ ko mũ sir.

36 Kỹ vẽnh kar tóg fe tar nỹtĩ sir. Kỹ ag tóg ko mũ gé sir. 37 276 (ke) ẽg nỹtĩ, canoa mág ẽn kã ki.

38 Ẽg tỹ ko kar kỹ ag tóg goj ki trigo kugjẽg mũ, canoa tỹ kãnhvy' hen jé.

39 Tỹ vaj kỹ ag tóg vég mũ sir, hã ra ag tóg goj vãso ẽn ki kagtĩg nỹtĩ. Kỹ ag tóg tá rỹnhrỹj vég mũ sir. Tá kóho tóg sĩ nĩ. Kỹ ag tóg ra canoa tĩn sór mũ. 40 Kỹ ag tóg ferro ẽn kykym mũ sir, goj kã ki. Kỹ ag tóg canoa vóg jafã kygvãg mũ gé. Canoa krĩ tá ag tóg kur kujén mũ, kóho kato. 41 Hã kỹ ẽg tóg rỹnhrỹj ẽn to mũ mũ sir. Kỹ goj régre tóg jagnẽ ki jun kỹ nĩ. Kỹ canoa tóg rỹnhrỹj kã ra rã mũ sir. Ti krĩ tóg krẽm rã mũ, kỹ tóg sir tar mũ. Kỹ canoa nér tóg kam ke mũ sir, goj jũ kỹ. Kỹ tóg mráj kãn mũ.

42 Kỹ soldado ag tóg vẽnh sigse ag kãgtén sór mũ, ag tỹ mrogmro kỹ vẽnh pigju tũ nĩn jé, ag krenkren tũ nĩn jé. 43 Hã ra capitão tóg Paulo kren han sór mũ. Kỹ tóg ag mỹ: “ke tũg ra. Ãjag tỹ tũgnũm há nỹtĩn kỹ goj kã ra ge vén inhhã, ãjag tỹ ga ra ge vén jé,” he mũ. 44 “Ãjag tỹ tũgnũm kórég nỹtĩn kỹ ka kri nỹm nĩ, canoa mránhmráj kri,” he tóg, capitão ti.