1 Kỹ sóg ãjag jyvẽn sór mũ ha. Se kỹ inh jẽ nĩ, ẽg Senhor tugrĩn. Mũ há han sórm nĩ. Topẽ vỹ ãjag kuprẽg, kỹ ãjag tỹ vẽjykre há han ke hã to vãsãn nĩ. 2 Ã régre to: “ti kãfór vỹ tỹ inh nĩ,” he sór tũg nĩ. Jagnẽ mỹ komẽr hã vĩm nĩ. Jagnẽ to fe nỹtĩm nĩ. Jagnẽ to há nỹtĩm nĩ. Jagnẽ ajudar hem nĩ. 3 Topẽ kuprĩg vỹ tỹ ũn pir nĩ, kỹ tóg ẽg mỹ vẽjykre pir nĩm tĩ. Vãsãn nĩ, ãjag tỹ vẽjykre pir ẽn hã han jé, ãjag tỹ krĩ kuprã nỹtĩn jé. 4 Topẽ kuprĩg pir ẽn vỹ tỹ ẽg kar jagrẽ nĩ. Kỹ ẽg kar vỹ tỹ Cristo há ri ke nỹtĩ. Jãvo tóg tỹ ẽg krĩ ri ke nĩ. Ẽg kar mỹ ti nén ũ há han ke mũ, jagnẽ ri ke, ti tỹ ẽg kuprẽg kỹ. 5 Kỹ ẽg Senhor vỹ tỹ ũn pir nĩ gé. Ẽg kar vỹ ti ki ge kỹ nỹtĩ. Ti jiji hã tỹ ẽg kygpe kỹ nỹtĩ gé. 6 Ẽg jóg tỹ Topẽ vỹ tỹ ũn pir nĩ gé, ẽg kar jóg ti. Ti hã ne tỹ vẽnh kar kri ke nĩ'. Ẽg kar tỹ tóg ti tỹ nén han sór mũ ẽn han tĩ, kỹ tóg ẽg kã kã nĩ gé, ẽg jóg ti.
7 Cristo vỹ ẽg tar han tĩ gé, ẽg kar, ti rãnhrãj to. Ũ mỹ tóg vẽnh rãnhrãj ũ nĩm', ũ nĩm' he tĩ. 8 Hã kỹ tag tóg rán kỹ nĩ, ha mẽ: “ti tỹ kanhkã ra tãpry kỹ tóg ũn sigse kỹ nỹtĩ ẽn ag tatĩn vyr. Kỹ tóg ẽprã ke ag tar han mũ gé, ag tỹ ti rãnhrãj han ke to,” he ja tóg nĩgtĩ.
9 Ha vé, ti tãpry kỹ tóg, ti tỹ kanhkã ra tĩg ke to hã tére ja nĩ gé, ẽprã. 10 Ũn tére mũ ẽn vỹ tãpry mãn ja nĩ gé. Kỹ tóg kanhkã pãtén kỹ kri nĩ nĩ sir. Tá nĩn kỹ tóg nén ũ kar ki kanhró nĩ sir, ti tỹ ẽmã kar vigvég nĩn kỹ. 11 Ti hã ne ti rãnhrãj kar to ẽg tar han tĩ'. Ũ ag vin kỹ tóg ag tỹ apóstolo hynhan. Ũ mỹ tóg: “ũ tỹ inh vĩ mẽ ja tũ ag mỹ inh vĩ tónh tĩg nĩ,” he mũ. Ũ tỹ tóg igreja to kófa han. Ũ mỹ tóg: “ũ tỹ igreja krẽm vẽnh mãn tĩ ag mỹ inh vĩ kãmén nĩ,” he mũ gé. 12 Tag to tóg ẽg tar han tĩ, ẽg tỹ jagnẽ tar han jé sir, ti rãnhrãj to, ẽg tỹ tỹ ti jãvy nỹtĩn kỹ, ti ve fag ke gé. Ẽg tỹ ẽg rãnhrãj tag ki króm kỹ Cristo há ẽn vỹ tar pẽ nĩ ha. Ẽg hã vỹ tỹ ti há nỹtĩ. 13 Ti tỹ ẽg kar tỹ vẽjykre pir han mũ ve sór vẽ, ẽg tỹ ti ki ge kỹ nỹtĩn kỹ. Kỹ ẽg kar vỹ ẽg rãnhrãj to tar nỹtĩ sir. Kỹ ẽg Cristo tỹ ẽprã ke jykre kãfór nĩ ẽn ri ke nỹtĩ sir. Komẽr hã ẽg tóg ti tỹ nén han mũ mré ti tỹ nén to jykrén mũ ki kanhrãn kãn ke mũ gé sir. Kỹ ẽg tóg ũn sanh há kanhró ri ke nỹtĩ sir.
14 Ẽg tỹ gĩr ri ke nỹtĩn kỹ tóg ti mỹ há tũ nĩ. Gĩr ag tóg, ag tỹ nén ũ mẽ kỹ kãnhmar nén ũ nón tĩ', nén ũ nón tĩ', he tĩ. Ẽg tỹ ti vĩ to gĩr tỹ ki kagtĩg ẽn ri ke nỹtĩn kỹ tóg ẽg tỹ ũn ón mũ vĩ kri nĩm ja há tĩ, ẽg tỹ ki kagtĩg nỹtĩn kỹ. Ũ ag tóg Topẽ vĩ to ón tĩ. Ag tỹ ẽg tỹ ag mré kygnẽ han sór vẽ. 15 Hã ra tóg ẽg tỹ Topẽ tỹ ki hã tó mũ ẽn hã han kỹ há tĩnh mũ. Kỹ ẽg tóg jagnẽ to há tãvĩ nỹtĩnh mũ gé. Hã tỹ ẽg tar nỹtĩnh mũ, Cristo tỹ tỹ ẽg krĩ nĩn kỹ. 16 Kỹ ẽg tóg tỹ ti há ri ke nỹtĩ. Ẽg kar tỹ tóg nén ũ pir han. Kỹ ẽg kar vỹ ti tỹ ẽg mỹ ti rãnhrãj nĩm ja ẽn to tar nỹtĩnh mũ. Kỹ ẽg tóg ũn sanh há tar ri ke nỹtĩ sir. Mog jé ẽg tóg ke mũ, ẽg tỹ jagnẽ to há nỹtĩn kỹ.
17 Kỹ sóg ãjag jyvẽn sór mũ, ẽg Senhor tỹ inh mỹ: “ha ag jyvẽn,” hen kỹ. Hã kỹ sóg: “ũ tỹ Topẽ ki kagtĩg ag jykre han sór tũg nĩ,” he mũ. Kórég ti nỹ mỹr, ag jykre ti. Ag tỹ vẽsóg ki nén to jykrén mũ ẽn hã han ag tóg tĩ. 18 Kuty mĩ ag mũgtĩ, ki kagtĩg ag nỹtĩ. Hã ra ag tóg ki kanhrãn sór tũ nĩ gé. Hã kỹ ag tóg Topẽ tỹ ẽg mỹ vẽjykre nĩm ja ẽn ki kagtĩg nỹtĩ. 19 Kỹ ag tóg vẽjykre há to é he tĩ. Mỹ'ãg vãnh ag nỹtĩ. Ag vẽnh kavénh vỹ ag mỹ há tĩ. Vẽjykre kórég tỹ ag kókég mũ ra tóg ag mỹ sér tĩgtĩ, kỹ ag tóg to krónh ke tũ nĩgtĩ. Ke tũg nĩ, ag jãvo.
20 Cristo jykre vỹ ge tũ nĩgtĩ, ki kanhró ãjag tóg nỹtĩ. 21 Ti kãme ki kanhró kar ãjag nỹtĩ ha, ti jykre ke gé. 22 Ti ki ge kỹ nỹtĩn kỹ ẽg tóg ẽg tỹ vãsỹ nén han ja ẽn ri ke han mãn ke tũ nĩ ha. Ãjag jykre pãno ẽn tovãnh kãn jé ãjag tóg ke mũ. Ãjag tỹ ãjag jykre pãno jagma mũn kỹ ãjag tóg ãjag tỹ nén to én mũ ẽn hã han mũ ja nĩgtĩ ver. Hã ra ẽg tóg tag hã to ter ke mũ. 23 Kỹ Topẽ mỹ to vĩm nĩ, ti tỹ ãjag mỹ ãjag jykre kurynh kãn jé, ti tỹ ãjag fe jãnhkrig jé. 24 Vẽjykre tãg hã han sórm nĩ, Topẽ tỹ ẽg mỹ vẽjykre tãg nĩm mũ ẽn ti. Kỹ ẽg tóg ti ri ke nỹtĩnh mũ. Kuryj ẽg nỹtĩnh mũ. Há ẽg nỹtĩnh mũ, ti há ri ke.
25 Hã kỹ jagnẽ mỹ ón mãn tũg nĩ. Ki hã tóm nĩ, jagnẽ mỹ. Jagnẽ mré ke vỹ tỹ ẽg nỹtĩ, ẽg tỹ Cristo há ri ke nỹtĩn kỹ. 26 Ãjag fe tỹ gỹm ke mũ ra Topẽ vĩ mranh tũg nĩ. Ãjag tỹ jagnẽ to jũ nỹtĩn kỹ kurã ũ jãvãnh sór tũg nĩ. Kutyg ke to hã tỹ há' hem nĩ, ũri. 27 Japo tỹ ãjag krĩn sór mũ ra ti vĩ jẽmẽ tũg nĩ. 28 Vãsỹ ãjag kã mĩ ũ vỹ ũ tỹ nén ũ pigju mẽ ja nĩgtĩ. Kỹ ẽn han mãn tũg nĩ. Ãjag rãnhrãj nón ãjag mũnh ke mũ ũri, ãjag tỹ ãjag rãnhrãj to nén ũ kar ve jé. To vãsãn nĩ, ti tỹ ãjag mỹ kén jé, ãjag tỹ tỹ ũn jagãgtar ag jagãgtãn jé.
29 Vẽnh vĩ kórég tó sór tũg nĩ. Nén ũ há hã tỹ vẽmén nĩ, ãjag tỹ ãjag vĩ tỹ jagnẽ tar han jé, ãjag tỹ jagnẽ jykre kurynh jé.
30 Topẽ kuprĩg fe kaj han sór tũg nĩ gé. Topẽ vỹ ẽg mỹ ti kuprĩg jẽnẽ, ti tỹ hã tugrĩn ẽg nĩgjẽg jé, ẽg krenkren ke to. Ti tỹ tỹ ẽg jagrẽ nĩn kỹ ẽg tóg ki kanhró nỹtĩ, Topẽ tỹ ẽg krenkren han ke mũn ki. 31 Jagnẽ to jykrén kónãn tũg nĩ. Jagnẽ to krĩ rỹ han tũg nĩ. Ãjag fe tỹ gỹm ke mẽ nỹtĩ tũg nĩ. Féfén tũg nĩ. Jagnẽ to vĩ kónãn tũg nĩ. Vẽjykre pãno tovãnh kãn nĩ. 32 Jagnẽ to vĩ há han nĩ. Jagnẽ mỹ komẽr hã vĩm nĩ. Jagnẽ mỹ vẽnh pãte fón nĩ, Topẽ tỹ Cristo tugrĩn ẽg mỹ vẽnh pãte fón ja ẽn ri ke.
<- ÉFESO 3ÉFESO 5 ->