1 Jagnẽ to há nỹtĩ to krónh ke tũg nĩ, ãjag tỹ tỹ Jesus mré ke nỹtĩn kỹ. 2 Ũ tỹ kuvar há tá ãjag to pasa kỹ ti mỹ: “inh mré jẽg,” hem nĩ. Ẽg jo ke ũ ag tóg, ag tỹ ũ ag mỹ: “inh mré jẽg,” hen kỹ Topẽ tỹ jẽnẽ jafã ag hã mỹ ke ja nĩgtĩ, ag tỹ ag ki kagtĩg hã ra. 3 Ũn sigse kỹ nỹtĩ ag ki rĩrm nĩ, ãjag tỹ kejẽn Jesus tugrĩn sigse kỹ nỹtĩnh ke mĩ ẽkrén kỹ. Ag tỹ ũn vóg kónãn mũ ag ki rĩrm nĩ gé. Kejẽn ag tóg Jesus tugrĩn ãjag vóg kónãn ke mũ gé. Hã kỹ jagnẽ ki rĩr há han nĩ.
4 Ũ prũ fi to én tũg nĩ, ũ mén to én tũg nĩ gé. Ãjag prũ nỹtĩn kỹ fi hã mré nỹ sórm nĩ, ãjag mén nỹtĩn kỹ ti hã mré nỹ sórm nĩ gé. Topẽ vỹ, ũ tỹ vẽjykre kórég han mũ ẽn ag to jũnh ke mũ, fag to ke gé.
5 Riko nỹtĩ sór tũg nĩ gé. Ãjag tỹ nén vég mũ ẽn vỹ há nĩ. Topẽ vỹ ẽg mỹ: “ãjag kã jatu' henh ke tũ pẽ sóg nĩ. Ãjag ki sóg rĩr nĩ nĩ,” he mũ. 6 Hã kỹ: “ẽg jóg mág vỹ inh ki rĩr ke mũ,” hem nĩ. “Ti hã kamẽg isóg mũ. Ẽprã ke ũ vỹ inh vóg ke tũ pẽ nĩ, ti tỹ inh ki rĩr nĩn kỹ,” hem nĩ, Topẽ vĩ kri fi kỹ.
7 Ũ tỹ ãjag mỹ Topẽ vĩ tó vén mũ ẽn mĩ ẽkrén nĩ. Ga kri mũn kỹ ag tóg Topẽ tovãnh ja tũ pẽ nĩgtĩ. Ag tỹ ti tovãnh tũ ra ag tóg kãgter ja nĩ. Ag ri ke han sórm nĩ. Ti ki rã ẽn tovãnh sór tũg nĩ gé. 8 Jesus Cristo hã vỹ tũ' henh ke tũ nĩ. Ti tỹ vãsỹ nén to jykrén mũ ẽn hã han ti tĩ, ũri. Kỹ tóg kurã krỹg ja tũ nĩ gé. 9 Ũ tỹ ón kỹ ãjag mỹ Topẽ vĩ to nén ũ ũ tó sór mũ ẽn vĩ jẽmẽ tũg nĩ. Ãjag tỹ tỹ prãnh ke han sór jé ag tóg ke mũ. Topẽ vỹ ãjag tar han ki kanhró nĩ, ãjag jagãgtãn kỹ. Ũ tóg: “ã tỹ vẽjẽn tag kon kỹ ã tóg Topẽ jykre to tar nĩ,” he tĩ. Ag ón vẽ. Vẽjẽn pijé ẽg tỹ ti jykre to tar nĩ han ki kanhró nĩ'. Topẽ hã ne ẽg tar han tĩ'.
10 Ha mẽ, Moisés jykre ki Topẽ mỹ nén ũ pũn tĩ ag tóg ẽg mré Jesus jamĩ ẽn konh ke tũ nĩ. 11 Topẽ tũ to pã'i mág ẽn hã vỹ ag mẽg ũ tãnh kỹ ti kyvénh ma tĩ tĩ, ag tỹ to: “Topẽ nĩgja,” he mũ ẽn ra. Ti tỹ ag mẽg kyvénh ẽn tỹ ag tỹ Topẽ vĩ mranh mũ tỹ tũ' he sór vẽ vẽ. Hã ra ag tóg ag jamã jy ró mã tá ag mẽg tãnh kỹ pũn tĩ. 12 Hã kỹ Jesus tóg ẽmã jy ró ẽn mã tá ter ja nĩ gé, ti tỹ ẽg jagfy ter kỹ, ẽg jãnhkri han jé. 13 Kỹ ẽg tóg ti jagtar ri ke han ke mũ gé. Ũ tỹ ti ki ge jãvãnh ag jykre han ke tũ ẽg tóg nĩ. Jesus tỹ ẽmã jy ró mã tá ter ja ẽn mĩ ẽg tóg ẽkrén ke mũ. Kỹ ẽg tóg ũ tỹ ti ki ge tũ ag mré ag jykre han ke tũ pẽ nĩ. 14 Tag ki ẽg tóg ẽg jamã pẽ venh ke tũ nĩ. Kanhkã tá ẽg tóg ve sór mũ, ẽg jamã ti.
15 Ẽg tỹ Jesus tugrĩn Topẽ mỹ vĩ há han kỹ tóg há tĩ. Ẽg tỹ nén vég mũ kar to ẽg tóg ti mỹ: “ẽg mỹ tóg há tĩ. Ẽg mỹ tóg sér tĩ,” henh ke mũ. Ẽg tỹ ti mỹ nén ũ pũn ri ke tóg nĩ, presente ri ke tóg nĩ, ẽg vĩ tag. 16 Jagnẽ ki rĩrm nĩ gé, jagnẽ mré nén kar han kỹ. Tag to krónh ke tũg nĩ gé. Ẽg tỹ Topẽ mỹ nén ũ pũn ri ke ti nĩ. Ẽg tỹ ti mỹ presente han ri ke ti nĩ, ẽg tỹ jagnẽ ki rĩr ti, kỹ tóg ti mỹ sér tĩ.
17 Ũ tỹ ãjag kanhrãn tĩ ẽn ag vĩ jẽmẽm nĩ. Ag tỹ ãjag mỹ nén tó mũ ẽn ki króm nĩ. Ãjag ki rĩr ag tóg tĩ, ãjag tỹ Topẽ tovãnh tũ nĩ jé. Kỹ Topẽ vỹ ag rãnhrãj tugnỹm ke mũ. Ãjag tỹ ag vĩ jẽmẽn kỹ ag rãnhrãj tóg ag mỹ kufy tũ nĩnh mũ. Kỹ tóg ag mỹ sér tĩnh mũ. Ti tỹ ag mỹ kufy nĩn kỹ tóg há tũ nĩ gé, ãjag mỹ.
18 Inh jagfy Topẽ mré vẽmén nĩ. Nén ũ kórég han ja tũ inh nĩ, ki kanhró sóg nĩ. Isỹ nén ũ kuryj han sór vẽ mỹr, tag hã to sóg jykrén tĩ. 19 Kỹ inh jagfy Topẽ mré vẽmén nĩ, Topẽ tỹ kãnhmar ãjag to inh jẽnẽ mãn jé. Ti mỹ tag to vĩ to krónh ke tũg nĩ.
20 Topẽ mré sóg vẽmén tĩ ãjag to. Ẽg krĩ kuprãg ti tĩ. Kỹ tóg Jesus ti rĩn mãn ja nĩ gé, ti tỹ ẽg jagfy ter kar kỹ. Kỹ tóg ũ tỹ mé ki rĩr tĩ ẽn ri ke nĩ. Hã ra tóg ẽn kãfór nĩ gé, ti tỹ ẽg ki rĩr há han nĩn kỹ. Ẽg mỹ tóg vẽjykre tãg ẽn nĩm ja nĩ, ũ tỹ tũ' he vãnh ẽn. 21 Topẽ hã mỹ sóg to vĩ tĩ, ti tỹ ãjag tar han jé, ãjag tỹ nén ũ tỹ ti mỹ há nĩ ẽn hã han jé. Ti hã vỹ Jesus Cristo mỹ: “ag tar han nĩ,” he ja nĩ. Kỹ tóg tũ' henh ke tũ nĩ, ẽg tỹ ti mỹ vĩ há han ke ti. Hã vẽ.
22 Inh kanhkã, sỹ ãjag mỹ tag tó sór ja vẽ. Hã kỹ jatun mỹ mẽ sórm nĩ, sỹ ãjag jyvẽn mũ tag. Inh pijé vẽnh rán mág han'. Vẽnh rán sĩ han sóg ãjag mỹ.
23 Ha mẽ, ẽg régre tỹ Timóteo vỹ se kỹ jẽ mãn tũ nĩ ha. Ti kava ag huri. Ti tỹ kãnhmar tag ki jun kỹ tóg inh mré ãjag venh tĩg ke mũ.
24 Ãjag kófa ag mĩ sóg ẽkrég tĩ, Topẽ ki ge kỹ nỹtĩ kar ag mĩ ke gé. Tag ki, ga tỹ Itália ki Topẽ ki ge kỹ nỹtĩ ag vỹ, ãjag mĩ ẽkrég tĩ gé.
25 Topẽ jé ãjag tar han kãn.