1 Ẽprã ke tỹ Topẽ tũ to pã'i mág jykre vỹ ge nỹgtĩ, ha mẽ. Ti mré ke ag jagfy tóg vĩ tĩ, Topẽ mré. Kỹ tóg ag jagfy Topẽ mỹ nén ũ pũn tĩ gé. Kỹ tóg ag mẽg tãnh kỹ pũn tĩ gé, ag tỹ Topẽ vĩ mranh ja tugrĩn. 2 Hã ra tóg tỹ ẽprã ke nĩ gé, ag mré. Ag krój ri ke tóg nĩ gé. Hã kỹ tóg ag krój nỹtĩ ra ag jagãgtãn há han tĩ, ũ tỹ Topẽ vĩ mranh sór tũ ra mranh mũ ẽn ag. 3 Mranh tóg tĩ gé, Topẽ tũ to pã'i mág ẽn ti. Hã kỹ tóg ti tỹ mranh mũ ẽn to Topẽ mỹ tãnh kỹ pũn tĩ gé, ti mré ke ag tũ ẽn mré. 4 Hã ra tóg vẽso: “inh hỹn tỹ Topẽ tũ to pã'i mág nĩnh mũ,” henh ke tũ pẽ nĩ. Topẽ hã ne ũ to: “tag vỹ tỹ isũ ki rĩr to pã'i nĩnh mũ,” he tĩ', ti tỹ vãsỹ Arão kuprẽg vén ẽn ri ke.

5 Hã kỹ Cristo vỹ vẽsóg ki tag to jykrén ja tũ nĩ gé. Ti pijé vẽsỹ pã'i han ja nĩgtĩ'. Vẽsỹ Topẽ tũ to pã'i mág han sór ja tũ tóg nĩgtĩ'. Topẽ hã ne Jesus mỹ: “inh kósin vỹ tỹ ã nĩ,” he ja nĩ'. “Ũri sóg ã mỹ: tỹ inh ã panh nĩ, he mũ,” he ja ti nĩ. 6 Kỹ tag tóg rán kỹ nĩ gé, Topẽ vĩ tỹ rán kỹ nĩ ki, ha mẽ: “isũ ki rĩr jé ã tóg ke mũ. Tũ' henh ke tũ ti nĩ, ã tỹ isũ ki rĩr nĩ ti, Melquisedeque tỹ isũ ki rĩr mũ ẽn ri ke,” he ja ti nĩ gé, Cristo mỹ, Topẽ ti.

7 Jesus vỹ, ti tỹ ga mĩ tĩg kỹ jagtar nĩn kỹ Topẽ mỹ to vĩ', to vĩ' he ja nĩgtĩ, ti tỹ ti kren han jé, ti ter tũ nĩ jé. Kỹ tóg fỹ gé, Topẽ mré vẽmén kỹ. Vẽsỹrénh jagy han tóg. Kỹ Topẽ vỹ ti vĩ jẽmẽ ja nĩ, ti tỹ ti mỹ to vĩn kỹ. 8 Topẽ kósin vỹ tỹ ti nĩ, hã ra tóg ti jagtar tugrĩn Topẽ tỹ nén tó mũ ki kanhrãn kãn ja nĩ, ti tỹ Topẽ vĩ hã han jé. 9 Ti tỹ vẽnh kanhrãn kãn kỹ tóg ẽg kren han ki kanhró nĩ gé sir. Ẽg jagfy tóg ter ja nĩ, kỹ tóg ẽg kren han mũ, ẽg tỹ ti vĩ ki króm kỹ. 10 Topẽ vỹ ti mỹ: “inh mỹ isũ ag ki rĩrm nĩ. To pã'i mág vỹ tỹ ã nĩ, Melquisedeque ẽn ri ke,” he ja nĩ. Hã kỹ tóg tỹ pã'i nĩ, Jesus ti.