1 Ãjag tỹ ver gĩr kãsir ri ke nỹtĩ ra sóg ãjag mỹ ũn sanh ag tũ kãmén sór mũ ha, ãjag tỹ ver to tar tũ nỹtĩ ra, ha mẽ. Ãjag tỹ nén mẽ vén jan hã vẽ, ha mẽ: vẽjykre kórég tovãnh, ẽg tỹ nén to ter ke mũ ẽn tovãnh kãn, Topẽ ki rã, 2 ũ tỹ ti ki rã mũ ẽn kype, ti kri ẽg nĩgé fi, ti tỹ ẽg mré Jesus ki rã kỹ jẽn kỹ, ẽg tỹ ẽg ter kar kỹ rĩr mãn ke ẽn to jykrén ke, Topẽ tỹ ẽg jykre tugnỹm ke ẽn to. Kỹ tag kar vỹ gĩr tỹ ti pafa ja kron ẽn ri ke nĩ. 3 Tag tó mãn sór tũ inh nĩ ha. Sỹ ãjag mỹ tag pãte Jesus kãmén sór vẽ. Kỹ tóg ũn sanh tỹ vẽjẽn kufy ko ẽn ri ke nĩ. Topẽ tỹ tag to isar han kỹ sóg ãjag mỹ kãmén há han ke mũ.
4 Ha mẽ, ẽg kã mĩ ũ ag tóg, ag tỹ Topẽ ki rã kar kỹ ti tovãnh pẽ han ja nĩgtĩ. Kỹ ag tóg ti ki ge mãn ke tũ nĩ ha. Ẽg tỹ Topẽ ki ge kỹ tóg ẽg kanhrãn ke mũ, vẽjykre há ki. Topẽ vỹ ẽg mỹ kanhkã tá vẽjykre há ẽn nĩm ke mũ. Ẽg mỹ tóg ti kuprĩg jẽnẽg mũ gé. 5 Topẽ vĩ há nĩ ẽn vég ẽg tóg tĩ. Ẽg tỹ kanhkã tá nén venh ke mũ ẽn ve sĩ han ẽg tóg tĩ, ẽprã, ẽg tỹ Topẽ ki ge kỹ. 6 Ũ tỹ ti jykre tag ve kar kỹ ti tovãnh pẽ han kỹ tóg ti ki rã mãn ke tũ nĩ ha. Ti jykre kórég tovãnh mãn ke tũ ti nĩ ha. Ha vé, ẽg tỹ ti ki rã há han kar kỹ ti tovãnh pẽ han kỹ ẽg tóg ti tỹ krunh to sa mãn ri ke han mãn mũ sir, Topẽ kósin ti. Ẽg tỹ vẽnh kar tỹ ti to é he han mãn vẽ sir.
7 Ẽpỹ ri ke ti nĩ, ha mẽ. Ta tỹ ẽg jakré kri kutẽ kỹ tóg mog há han tĩ, ẽg tỹ ga há ki krãn kỹ. Ẽg tỹ ẽpỹ há ri ke nỹtĩn kỹ, ẽg tỹ Topẽ mỹ vẽjykre há han kỹ tóg, ẽg ve há han ke mũ, Topẽ ti. 8 Ẽpỹ ũ tóg hã ra kórég nĩ. Kỹ sónh hã tóg ki munmur tĩ, vãnh ti ke gé, kỹ tóg mogmog tũ nĩgtĩ sir, ẽg jakré ti. Ẽg tỹ ẽpỹ kórég ẽn ri ke nỹtĩn kỹ Topẽ vỹ, ẽg tovãnh ke mũ sir. Kỹ tóg ẽg mỹ vĩ kónãn ke mũ. Kỹ ẽg kejẽn pũr ke mũ, kurã ẽn kã.
9 Ha mẽ, vĩ tar han inh huri. Hã ra ãjag tóg ti jagy tag venh ke tũ pẽ nĩ, ki kanhró inh nĩ. Ãjag to sóg há nĩ. Krenkren jé ãjag tóg ke mũ, ki kanhró inh nĩ. 10 Rãnhrãj há han ãjag tóg tĩ. Ti to ãjag há tãvĩ nỹtĩ. Ti tũ ki rĩr há han ãjag tóg tĩ gé. Topẽ vỹ tag vég tĩ, ãjag rãnhrãj há tag. Ti pijé kã jatu nĩgtĩ'. Vẽjykre vẽnh mỹ han tũ pẽ ti nĩgtĩ, Topẽ ti. 11 Hã ra sóg ãjag mỹ tag tó, ãjag tỹ ti to tar tãvĩ nỹtĩ jé, ãjag tỹ ti to krónh ke tũ nĩ jé. Kỹ ãjag tóg venh ke mũ, ãjag tỹ nén ve sór mũ ti. 12 Ãjag tỹ ti to krónh ken kỹ tóg kórég nĩ. Ũ ag tóg ẽg jo Topẽ ki ge ja nĩgtĩ, hã ra ag tóg ti tovãnh ja tũ pẽ nĩgtĩ. Kỹ ag tóg hur vé, Topẽ tỹ ẽg mỹ nén ven sór mũ ẽn ti. Tag ag ri ke han nĩ.
13-14 Topẽ vỹ Abraão mỹ: “ã to vĩ há han jé sóg ke mũ. Ã krẽ e han jé sóg ke mũ,” he ja nĩ. Kỹ tóg ti mỹ: “ã pijé tag venh ke tũ nĩ'. Inh hã vỹ ki kanhró nĩ',” he ja nĩ gé. Ũ tỹ ti kãfór nĩ ra tóg: “ti hã vỹ ki kanhró nĩ,” henh ke mũ vẽ. Hã ra ũ tóg Topẽ kãfór nĩ tũ nĩ, hã kỹ tóg: “inh hã vỹ ki kanhró nĩ,” he ja nĩ. 15 Kỹ Abraão vỹ Topẽ tỹ ti mỹ nén tó ja tag to tar nĩ ja nĩgtĩ gé. Jatun mỹ tóg ti kósin ke ẽn jãvãnh ja nĩgtĩ, hã kỹ tóg kejẽn vé.
16 Ẽprã ke ag vỹ, ag tỹ jagnẽ mỹ vĩ há han sór kỹ jagnẽ mỹ: “inh kãfór nĩ ẽn vỹ ki kanhró nĩ, sỹ ã mỹ nén han ke ti,” he tĩ. Tag tó kỹ ag tóg jagnẽ jũ tỹ tũ' he tĩ. Ũ tỹ tag tó kỹ ag tóg, ki kanhró nỹtĩ, ti tỹ ki hã tó ja ti. Ẽprã ke ag jykre hã vẽ. 17 Vẽjykre tag han ja ti nĩ, Topẽ ti, ti tỹ ẽg mỹ ti vĩ jẽnẽn kỹ. Ti tỹ ẽg mỹ nén tó ja ẽn ve jé ẽg tóg ke mũ. Ẽg tỹ tag ki kanhrãn há han hã jé tóg ẽg mỹ: “ki kanhró inh nĩ,” he ja nĩ. Pãte ũ tó mãn ke tũ ti nĩ ha. 18 Ti vĩ régre to ẽg tóg, ki kanhrãn há han tĩ. Ẽg mỹ tó kar kỹ tóg: “ki kanhró inh nĩ,” he ja nĩ gé. Ti vĩ régre hã vẽ. Hã kỹ ẽg tóg venh ke mũ, ti tỹ ẽg mỹ nén tó ja ti. Ón ja tũ ti nĩ gé, ti tỹ ón ki kagtĩg nĩn kỹ. Ti tỹ ẽg mỹ nén tó ja ẽn ve sór ẽg tóg mũ, hã vỹ: kanhkã, he mũ. 19 Ẽg tỹ kanhkã ve sór kỹ ẽg tóg, to krónh ke tũ nĩgtĩ. Ẽg tỹ kanhkã tá ũn ve sór mũ ẽn hã vỹ ẽg tar han tĩ, ẽg tỹ tỹ prãnh ke tũ nĩ jé. Tá jun jé ẽg tóg ke mũ, ha vem nĩ, Topẽ jamã tá. 20 Jesus vỹ tá jun vén, ẽg jo. Kỹ tóg ẽg mỹ Topẽ to ẽpry ti han. Ẽg jagfy tóg tỹ Topẽ tũ ki rĩr tĩ to pã'i mág nĩ, Melquisedeque ẽn ri ke. Kỹ Jesus tỹ tỹ pã'i nĩ tóg kurã krỹg ja tũ nĩ. Kỹ tóg, ẽg jo Topẽ rĩnja tá nĩ nĩ, ẽg tỹ ti nón tá junjun jé gé.
<- HEBREU 5HEBREU 7 ->