1 Kỹ sóg kanhkã tá nén ũ vég mũ gé. Inh mỹ tóg e tĩ, isỹ nén nẽ ẽn ve kỹ. Inh kanẽ jun tóg mũ. Topẽ tỹ jẽgnẽ jafã tỹ 7 (ke) ag vigve inh. Ga kri ke ag vóg kónãn jé ag tóg ke mũ, vóg tỹ 7 (ke) ki. Ag tỹ ag vóg kónãn kar kỹ Topẽ tóg jũ mãn ke tũ nĩ ha. 2 Kỹ sóg goj tỹ vidro ve kã ki pĩ gru vég mũ. Kỹ sóg ũ tỹ mĩg kato vãsãnsãn mũ ẽn ag vigvég mũ gé. Ag pijé ag tỹ tỹ ẽprã ke nỹtĩ ra mĩg kãgrá ẽn to há nỹtĩ ja nĩgtĩ'. Ag pijé vẽnh ki ti número rán ja nĩgtĩ', ti jiji ti'. Hã kỹ ag tóg goj tỹ vidro ve jo nỹtĩ. Kỹ ag tóg vãkyn jafã tỹ harpa génh kỹ nỹtĩ nĩ, Topẽ tỹ ag mỹ harpa vin mũ ẽn. 3 Kỹ ag tóg Topẽ mỹ rãnhrãj tĩ tỹ Moisés ẽn jé tó mũ, ti tỹ jãn ẽn ti. Cordeiro ẽn mỹ ag tóg jãn mũ, ha mẽ. “Topẽ kósin vỹ tỹ ã nĩ. Pã'i mág vỹ tỹ ã nĩ. Vẽnh kar kri ke vỹ tỹ ã nĩ,” he ag tóg mũ, cordeiro mỹ, jãn kỹ. “Nén ũ há tãvĩ kar han ja ã tóg nĩ. Ge ve ja tũ ẽg tóg nỹtĩ. 4 Vẽnh kar ag vỹ ã kamẽg tĩ, pã'i mág kar ag. Vẽnh kar ag vỹ ã jiji to: “ũn mág vỹ tỹ ti nĩ,” he tĩ. Ã hã ne ã pir mỹ há nĩ'. Povo kar tóg ã tá junjun ke mũ, kỹ ag tóg ã mỹ: “Topẽ vỹ tỹ ã nĩ,” henh ke mũ. Ã jykre kuryj ẽn ve kãn jé ag tóg ke mũ,” he ag tóg mũ, jãnjãn kỹ.
5 Kar kỹ sóg kanhkã tá Topẽ ĩn vég mũ. Ti jãnkã nón ag tóg mũ, kur tỹ ĩn ẽn róm kỹ, Topẽ nĩg jafã ẽn. 6 Kỹ Topẽ tỹ jẽgnẽ jafã tỹ 7 (ke) ẽn ag tóg tá kãpa mũ, ũ tỹ ga vóg kónãn ke mũ ẽn ag. Kur kupri jãnhkri rĩnh kỹ ag tóg kãmũ mũ. Kỹ ag tóg ouro tỹ vẽsógfĩn kỹ nỹtĩ gé, ag fe kri. 7 Kỹ nén nẽ tỹ 4 (ke) ẽn ag kã ũ tóg ag mỹ ouro tỹ pénky junjun mũ, Topẽ tỹ jẽgnẽg mũ tỹ 7 (ke) ẽn ag mỹ. Pénky tỹ 7 (ke) junjun tóg mũ, ag mỹ. Topẽ jũ tỹ tóg fór nỹtĩ, ũ tỹ tũ' henh ke tũ pẽ ẽn jũ tỹ. 8 Kỹ Topẽ ĩn ẽn krẽm nĩja tóg tũm tũm ke mũ, Topẽ tỹ tỹ ũn mág nĩn kỹ, ti tar nĩn kỹ. Topẽ tỹ jẽgnẽ jafã tỹ 7 (ke) ẽn ag tỹ ga vóg kónãn ke to hã ũ tóg Topẽ ĩn ẽn kã ra rãnh ke tũ nĩ.
<- NÉN VENH KE 14NÉN VENH KE 16 ->