1 Kỹ Topẽ tỹ jẽnẽ jafã ũ tóg inh ki jun mũ, ũ tỹ pénky mãn ja ẽn ag kã ũ. Kỹ tóg inh mỹ: “kunĩg,” he mũ. “Nhỹ ã mỹ ẽmã mág ti ven, ẽmã tỹ goj tỹ hẽn ri ke tá nỹ ẽn ti. Ẽmã ẽn ki ke ag vỹ ũn mén (ka)mẽ fi ri ke nỹtĩ. Kỹ Topẽ vỹ ag vóg kónãn ke mũ. 2 Pã'i kar vỹ fi mré nỹ ja nĩgtĩ, ũn mén (ka)mẽ ẽn fi mré. Ẽprã ke kar ag mỹ tóg sér tĩ, fi jykre ti. Kỹ tóg ag tỹ kronkron kỹ kãgter ri ke nĩ, ag tỹ ũn mén (ka)mẽ ẽn fi mré nỹ ti,” he tóg inh mỹ.
3 Kỹ Topẽ kuprĩg tóg inh krĩn mũ, kỹ sóg ga kórég ra tĩ mũ. Topẽ tỹ jẽnẽ jafã ẽn vỹ inh pére tĩ mũ. Tá ũn tỹtá fi tóg nĩ nĩ. Fi mẽg tỹ mĩg kri fi tóg nĩ nĩ. Hã ra tóg kusũg jẽ, fi mẽg ti. Vẽnh jygji tóg fi mẽg kri ránrán kỹ nỹtĩ. Vẽnh jigji ẽn tóg Topẽ to vĩ kónãn kỹ nỹtĩ. Fi mẽg vỹ ti pir ra krĩ tỹ 7 (ke) nĩ. Nĩka tỹ 10 (ke) ti nĩ gé. 4 Ũn tỹtá ẽn fi vỹ kur kusũg tu kỹ nĩ nĩ, kur kósóg pẽ. Ouro tu kỹ fi tóg nĩ gé, pó sĩnvĩ, pérola ke gé. Ouro tỹ kópa vyn kỹ fi tóg nĩ nĩ. Hã ra tóg nén ũ kórég kar tỹ fór jẽ, nén ũ kavéj kar tỹ, kópa ti. Fi tỹ vẽjykre pãno han mũ to ken hã vẽ. 5 Fi jiji vỹ fi kakã ki rán kỹ nĩ. Ũ tóg fi jiji tag mẽ ja tũ nĩ ver. Hã ra tóg: “Babilônia hã vẽ,” he mũ. “Ũn mén (ka)mẽ fag kar mỹnh fi,” he tóg mũ gé. “Ũ tỹ nén ũ kavéj kar han tĩ ag mỹnh fi,” he tóg mũ gé, fi jiji ti. 6 Hã ra fi tóg, ũ tỹ Topẽ ki ge kỹ nỹtĩ ag kyvénh kron kỹ ter nĩ. Ũ tỹ hẽn ri ke ag kãgtén ja ag tóg nĩgtĩ, Jesus tugrĩn, ag tỹ Jesus tovãnh sór tũ tugrĩn. Hã ra fi tóg ag kyvénh kron kãn ja nĩ.
9 Topẽ tỹ ũn kanhrãn mũ ẽn ag hã vỹ fi mẽg to jykrén ke mũ. Ti krĩ tỹ 7 (ke) vỹ tỹ pãnónh tỹ 7 (ke) nỹtĩ. Pãnónh ẽn kri fi tóg nĩ nĩ, ũn tỹtá kórég ẽn fi. Pã'i tỹ 7 (ke) to ke vẽ gé, hã ra, ti krĩ tỹ 7 (ke) ẽn ti. 10 Pã'i tỹ 5 (ke) vỹ hur tũg. Ũn pir vỹ ũri nĩ nĩ. Ũn pir ũ vỹ kar kỹ kãtĩg ke mũ gé. Ti kãtĩg kỹ tóg nĩg sĩ pẽ han ke mũ, ũ tỹ ẽgno ẽn ti. 11 Fi mẽg tag, ũ tỹ vãsỹ nĩ ja, kar kỹ ũri kã nĩ tũ ẽn vỹ tỹ pã'i ũ nĩ gé. Pã'i tỹ 8 (ke) vỹ tỹ ti nĩ. Pã'i tỹ 7 (ke) ẽn mré ke vỹ tỹ ti nĩ gé. Topẽ vỹ ti tỹ tũ' henh ke mũ gé.
12 Ti nĩka tỹ 10 (ke) vỹ tỹ pã'i tỹ 10 (ke) nỹtĩ gé. Ẽn ag vỹ ver kãmũ tũ nĩ. Fi mẽg mré ag tóg tỹ pã'i nỹtĩnh ke mũ, hã ra ag tóg nỹtĩg sĩ pẽ han ke mũ gé. 13 Jagnẽ mré ag tóg vẽjykre pir han ke mũ, pã'i tag ag, fi mẽg ẽn mré. Fi mẽg mỹ ag tóg vẽnh vin ke mũ. 14 Cordeiro ẽn kato ag tóg vãsãnsãn ke mũ. Hã ra cordeiro tóg ag tỹ hẽn ri kenh ke mũ, ti mré ke ag mré, ũ tỹ ti tovãnh ja tũ ag mré. Kỹ cordeiro ẽn vỹ tỹ pã'i kar kri ke jẽ. Pã'i mág ag kar kri tóg tỹ pã'i jẽ mỹr,” he tóg inh mỹ, Topẽ tỹ jẽnẽ jafã ti.
15 Kỹ tóg inh mỹ: “goj ve ja ã nĩ gé,” he mũ. “Goj ẽn tá fi tóg nĩ, ũn tỹtá kórég ẽn fi. Povo kar to ken hã vẽ, hã vỹ: goj, he mũ. Ẽprã ke kar to ken hã vẽ. Nação kar to ken hã vẽ. Vyrmỹ vĩ nỹtĩ ag kar to ken hã vẽ gé,” he tóg. 16 “Kỹ fi mẽg vỹ ti nĩka tỹ 10 (ke) ẽn mré fi to kórég tãvĩ nỹtĩnh ke mũ. Fi tũ kunũnh kãn jé ag tóg ke mũ, fi kur mré hã. Kỹ fi tóg kator nĩnh ke mũ, ũn kórég ẽn fi. Fi nĩ ko jé ag tóg ke mũ gé. Kỹ ag tóg fi pũn ke mũ gé. 17 Ag tỹ ki kagtĩg ra Topẽ tóg ag krĩn tĩ, ag vatánh tá. Kỹ ag tóg Topẽ tỹ ag mỹ fi to vẽjykre nĩm ja ẽn hã han tĩ. Kỹ ag tóg jagnẽ mré vẽjykre pir hã han tĩ. Kỹ ag tóg fi mẽg mỹ vẽnh vin tĩ gé, pã'i tỹ 10 (ke) ẽn ag. Gen kỹ ag tóg nén kar kãnkãn ke mũ ẽn pétẽm ke mũ, Topẽ tỹ vãsỹ tó ja ẽn kar ti,” he tóg.
18 “Kỹ ũn tỹtá kórég ẽn fi, ã tỹ ũn vég mũ ẽn fi vỹ tỹ, ẽmã mág ẽn nĩ. Ẽprã pã'i kar kri ke vỹ tỹ fi nĩ,” he tóg inh mỹ. Topẽ tỹ jẽnẽ jafã ẽn tỹ inh mỹ tón hã vẽ.
<- NÉN VENH KE 16NÉN VENH KE 18 ->