1 Kỹ sóg livro vég mũ. Livro ẽn vỹ grĩn kỹ nỹ. Ũ tỹ nĩgja sĩnvĩ kri nĩ ẽn vỹ livro ẽn mãn kỹ nĩ nĩ, ti pẽgja tỹ. Kã tá tóg rán kỹ nĩ, ti ven ja tá ke gé. Tógfĩn kỹ tóg nĩ nĩ, livro ti. Tógfĩn ja tỹ 7 (ke) tóg nĩ. 2 Kỹ sóg Topẽ tỹ jẽnẽ jafã éhé tãvĩ vég mũ gé. Vĩ tóg mũ, jamã há ra, kỹ tóg: “ũ nỹ hỹn ti tógfĩ kavãn mũ?“ he mũ.
3 Hã ra ag tóg vég tũ nĩ, kanhkã tá, ẽprã, vẽnh kuprĩg ag kã mĩ ke gé. Kỹ ũ tỹ livro kavãn ke tóg tũ tĩ, ti rá ve jé. 4 Kỹ sóg fỹ mũ. Inh mỹ tóg e tĩ, ũ tỹ livro kavãn ke tũ tĩn kỹ. 5 Kỹ kófa ag kã ũ tóg inh mỹ: “fỹ tũg ra,” he mũ. “ Davi krẽ'krẽ ag kã ũn pir ẽn tóg mĩg tar ri ke nĩ. Kỹ tóg vẽnh kar tỹ hẽn ri ke ja nĩ. Ẽn vỹ ti tógfĩ tỹ 7 (ke) ẽn kygvãn ki kanhró nĩ. Kỹ tóg livro ki rá ẽn venh ke mũ,” he tóg inh mỹ.
6 Kỹ sóg nĩgja sĩnvĩ ẽn jo cordeiro vég mũ, mé krẽ ẽn ti. Nén nẽ tỹ 4 (ke) ag vỹ ti pénĩn nỹtĩ, kófa ag ke gé. Kỹ tóg tỹ ag tỹ tãnh kỹ rĩr mãn ẽn ri ke jẽ. Nĩka tỹ 7 (ke) ti jẽ, kanẽ tỹ 7 (ke) ke gé. Topẽ kuprĩg to ken hã vẽ, hã vỹ: nĩka tỹ 7 (ke) mré kanẽ tỹ 7 (ke), he mũ. Topẽ vỹ ti jẽnẽ ja nĩ, ti tỹ ga kar mĩ tĩg jé. 7 Kỹ cordeiro ẽn vỹ ũ tỹ nĩgja sĩnvĩ kri nĩ ẽn tá jun mũ. Kỹ tóg ti ki livro ẽn mãg mũ, ũ tỹ ti pẽgja tỹ livro mãn kỹ nĩ ẽn ti ki. 8 Kỹ nén nẽ tỹ 4 (ke) ẽn ag vỹ mũgmũg ke kãn mũ, kófa tỹ 24 (ke) ag ke gé. Cordeiro ẽn krẽm ag tóg mũgmũg ke kãn mũ sir. Kófa ag vỹ vãkyn jafã tỹ harpa génh kỹ nỹtĩ, pénky tỹ ouro génh kỹ ke gé. Pénky ẽn kã ki tóg fór nĩ, pũn kỹ ger há han jafã ẽn tỹ, hã vỹ: ẽg tỹ Topẽ mré vẽmén tĩ, he mũ. 9 Cordeiro ẽn mỹ ag tóg jãn mũ. Jesus jé tag tó ag tóg mũ, ha mẽ. “Ã hã ne livro mãn kỹ ti tógfĩ kygvãg mũ ha'. Ã tén ja ag tóg nĩ, kỹ ã tóg ter kỹ ẽprã ke ag kygjãm, Topẽ mỹ, vẽnh vĩ kar tó tĩ ag kã mĩ, nação kar ag kã mĩ. Povo kar ag kã mĩ ã tóg ũ ag kygjãm ja nĩgtĩ. 10 Ã tỹ ũn kygjãm mũ ag mỹ ã tóg vẽnh rãnhrãj nĩm ja nĩ gé, ag tỹ ã mỹ ã tũ ki rĩr jé, ag tỹ tỹ Topẽ mỹ rãnhrãj tĩ nỹtĩ jé. Kỹ ag tóg ẽprã ke ag kri tỹ ũn mág nỹtĩnh mũ,” he ag tóg, kófa ag, jãnjãn kỹ.
11 Kỹ sóg Topẽ tỹ jẽgnẽ jafã tỹ hẽn ri ke vég mũ gé, mil tỹ hẽn ri ke. Nĩgja sĩnvĩ ẽn jo ag tóg nỹtĩ, nén nẽ tỹ 4 (ke) ẽn ag mré, kófa ag mré ke gé. 12 Jãnjãn kãn ag tóg mũ gé, jamã há ra. Kỹ ag tóg: “cordeiro tag tén ja ag tóg nĩ. Hã kỹ tóg ũri tỹ ũn mág jẽ,” he mũ. “Tỹ tóg vẽnh kar kri ũn mág jẽ ha. Riko tóg jẽ ha. Ki kanhró tóg jẽ ha. Tar tóg jẽ ha. Vẽnh kar vỹ ti mỹ vĩ há han mũ ha,” he ag tóg, Topẽ tỹ jẽgnẽ jafã ag.
13 Kỹ vãhã kanhkã tãn kar ag vỹ jãnjãn mũ, jamã há ra, ẽprã ke kar ag ke gé, vẽnh kuprĩg kar ag ke gé, goj ki ke kar ag ke gé. Kỹ ag tóg: “ũ tỹ nĩgja sĩnvĩ kri nĩ ẽn mỹ ẽg tóg vĩ há han ke mũ ha, cordeiro ẽn mỹ ke gé,” he mũ. “Ag pir mỹ ag tóg tỹ ũn mág nỹtĩ. Vẽnh kar kri ke vỹ tỹ ag nỹtĩ. Kỹ ag tóg tũ' henh ke tũ pẽ nĩ,” he ag tóg mũ sir, vẽnh kar pẽ ẽn ag.
14 Kỹ nén nẽ tỹ 4 (ke) ẽn ag vỹ tóg vĩ mũ gé sir. “Hã vẽ,” he ag tóg mũ. Kỹ kófa ag tóg mũgmũg ke kãn mũ sir, “Topẽ vỹ tỹ ã nĩ,” hen kỹ.
<- NÉN VENH KE 4NÉN VENH KE 6 ->