1 Kỹ sóg cordeiro tỹ ti tógfĩ ve kavãn vég mũ sir, ti tógfĩ tỹ 7 (ke) ẽn ag kã ũn ve ẽn ti. Kỹ sóg nén nẽ tỹ 4 (ke) ag kã ũ vĩ mẽg mũ gé sir. Ti vĩ vỹ ta tỹ tỹrỹr he ri ke nĩ. “Tág',” he tóg. 2 Kỹ sóg vẽsỹjãm ẽvãnh kỹ kãvãru kupri vég mũ. Ũ tỹ kri nĩ vỹ vyj vyn kỹ nĩ nĩ. Ti mỹ ag tóg krĩ tógfĩ jun mũ, ti tỹ tỹ ẽprã ke kar kri ke jẽn kỹ.
3 Kỹ cordeiro vỹ ti tógfĩ ũ kavãg mũ gé. Ti tógfĩ régre tá krỹg vẽ sir. Kỹ nén nẽ ag kã mĩ ũ tóg: “tág',” he mũ gé. 4 Kỹ kãvãru kusũg vỹ jun mũ. Ũ tỹ kri nĩ ẽn mỹ ag tóg rógro téj jun mũ, ti tỹ ẽprã ke ag tỹ jagnẽ kato vãsãnsãn han jé, ẽprã ke ag tỹ jagnẽ kãgtén jé sir.
5 Kỹ cordeiro ẽn tóg ti tógfĩ ũ kavãg mũ gé. Ti tógfĩ tãgtũ tá krỹg vẽ sir. Kỹ nén nẽ ag kã mĩ ũ tóg: “tág',” he mũ gé. Kỹ sóg vẽsỹjãm ẽvãnh kỹ kãvãru sá vég mũ sir. Ũ tỹ kri nĩ ẽn vỹ ẽg tỹ nén ũ kar kufyg jafã mãn kỹ nĩ nĩ, ẽg tỹ nén ũ kar kãmun jafã ti. 6 Kỹ sóg nén nẽ tỹ 4 (ke) ẽn ag kã ũ vĩ mẽg mũ gé, kỹ tóg: “trigo tỹ quilo pir mãn jé ag tóg ke mũ ha, por dia kaja to,” he mũ, kỹ tóg kaja e tĩ. “Ke tũ nĩn kỹ ag tóg cevada tỹ quilo tãgtũ mãn ke mũ, por dia kaja ẽn to, (kỹ tóg kaja e tĩ gé). Azeite vóg tũg nĩ hã ra, vinho vóg tũg nĩ gé, kaja si ẽn to ti fón nĩ,” he tóg mũ, vẽnh vĩ ti.
7 Kỹ cordeiro ẽn tóg ti tógfĩ ũ kavãg mũ gé. Ti tógfĩ tỹ 4 (ke) tá krỹg vẽ sir. Kỹ nén nẽ ag kã mĩ ũ tóg: “tág',” he mũ gé. 8 Kỹ sóg kãvãru ũ vég mũ. Hã ra tóg vẽser jógtánh ẽn ri ke nĩ. Ũ tỹ kri nĩ ẽn tóg ẽg tén tĩ. Kỹ vẽnh kuprĩg ag vỹ ti nón kãmũ mũ gé. Ag tỹ ẽprã ke ag vẽnh kãpóv tỹ 4 (ke) ag kã ti vẽnh kãpóv pir ag kãgtén ke vẽ, rógro tỹ, ag kókĩr tỹ ke gé, vẽnh kaga tỹ ke gé, mĩg tỹ ke gé.
9 Kỹ cordeiro vỹ ti tógfĩ ũ kavãg mũ gé. Ti tógfĩ tỹ 5 (ke) tá krỹg vẽ sir. Kỹ sóg nĩgja sĩnvĩ ẽn krẽm ẽvãnh kỹ, ag tỹ Topẽ vĩ tugrĩn ũn kãgtén mũ ag kar kuprĩg vigvég mũ. Topẽ vĩ tó to krónh ke ja tũ ag tóg nĩ. Hã kỹ ag tóg ag kãgtén ja nĩgtĩ, ũ tỹ ag vĩ jẽmẽ sór ja tũ ẽn ag. 10 Ẽn ag vỹ jamã há ra: “Senhor',” he mũ. “Ũn mág vỹ tỹ ã nĩ. Ã tỹ nén tó mũ ẽn han ã tóg tĩ. Ã mỹ kãnhmar ẽprã ke ag jykre tugnỹm sór tũ, ã tỹ ag vóg kónãn jé, ag tỹ ẽg kãgtén ja tag tugrĩn?“ he ag tóg mũ. 11 Kỹ tóg ag mỹ kur kupri junjun kỹ ag mỹ: “toreg ver',” he mũ. “Ũ ag tóg nỹtĩ gé, ag tỹ ũn kãgtén ke mũ ũ ag, ãjag mré ke ũ ag. Topẽ vỹ ag nĩgkré, kỹ tóg ki kanhró nĩ, ag tỹ ũ tỹ hẽn ri ke kãgtén ke mũn ki. Ag tỹ ãjag mré ke ẽn ag kãgtén kãn kar kỹ tóg ag jykre tugnỹm kãn ke mũ, ha vem nĩ,” he tóg, ag tỹ ũn kãgtén mũ ẽn ag mỹ.
12 Kỹ sóg cordeiro ve mãn mũ. Kỹ tóg livro tógfĩ ũ kavãg mũ gé. Ti tógfĩ tỹ 6 (ke) tá krỹg vẽ sir. Kỹ ga tóg jũrũn ke mũ. Rã vỹ kuty' he mũ, kur sá kuty ẽn ri ke. Kysã vỹ kusũg' he mũ gé. 13 Kỹ krĩg vỹ vár kãn mũ gé. Kejẽn kãka tóg ka tỹ vyryn vyryn ke tĩ. kỹ ti kanẽ tóg vár kãn tĩ, ti tánh ra. Ge ti nĩnh mũ, krĩg vár kãn ke mũ tag ti. 14 Kỹ kanhkã vỹ tũ' he mũ gé. Ẽg tỹ livro grĩn ẽn ri ke ti nĩ, kanhkã tũg ti. Pãnónh vỹ tũg kãn mũ gé, goj vãso kar ke gé. 15 Ẽprã ke ag vỹ pãnónh nor krẽm vẽnh pigjunh mũ, pãró vãso krẽm, pã'i ag, vẽnh kar kri ke ag, ag pã'i ag mré hã, ũn riko ag mré hã, ũn tar ag mré hã, ũn camarada ag mré hã, ag patrão ag mré hã, ẽprã ke kar ag mỹr, ha mẽ. 16 Kỹ ag tóg pãnónh mỹ vĩ mũ, pãró mỹ ke gé. “Ha ẽg kri vár. Ha ẽg kri tỹ tam ké. Ha ẽg pigju. Cordeiro ẽn vỹ ẽg to jũ mũ. Kỹ ũ tỹ nĩgja sĩnvĩ kri nĩ ẽn vỹ ẽg ki ẽvãnh mũ. Ag jo ẽg pigju,” he ag tóg mũ, ón kỹ, ẽprã ke kar ag, pãnónh kar mỹ. 17 “Ag tỹ ẽg to jũnh ke vẽ. Pétẽm ti huri, kurã kórég tag ti. Krenkren ke tũ ẽg tóg nĩ,” he ag tóg mũ, ẽprã ke kar ag, cordeiro ẽn jũ kamẽg kỹ.
<- NÉN VENH KE 5NÉN VENH KE 7 ->