Languages
5
Sawi Momateya Kopola A:pele Sipi Sa:yewi Fakelawa Wekeye
1 Apula: neyewi potakamake, Piseiki Kote sea hela: sawi nono elipe momate tiye kopolawa ima amunayewi sawi hakelese ima tomoipewa sawiwemi sapowa e tiya: iliyewi tiyapola: elakeye. 2 Tiye elapita: hepene sena penaiya semetei nowamoke unuwapo holose, “Sawi momate tiye kopola imayewi sapolo hakeyawa, sena napolo hekeya eta:wi tiyapola: imawa teka:tiye apula: sawi momate tiye kopola eta:wi fakema:na:na?” au seyakeye. 3 Alawamona hepene falemiwana, peleya: weyemiwana, peleya: hane kolemiwana, sawi momate tiye kopolawa faka:pela: sulu popa:na: sena nowa ma elatapo.

4 Sawi momate tiye kopolawa faka:pela: suwemi popa:na: sena nowa napolo hekeya maelakeye. Alanase, newa sosolo ya:lakeye. 5 Ya:lapita: sena sololo tilila semetei nowamoke nema selese, “Ya:lapa. Pota:pa:. Yuta sena i sena maya nowa unuwa Yuta A:pele Laeone, Ewa E kisi sena heletetiye hane sanotiye toliyetikeye. Ewa Tepiti maya mina senakeye. E kisi sena amowa Setenema komowa sela:sela: tetapola: keneyetinase, ima tomoipewa sawiwemi sapowa Eyewi teka:tiye sawi momateya kopolawa fakema:na:wa ilima:na:nakeye,” au seyakeye.

Yoneyewi A:pele Sipi Sa:le Papowa Wekeye

6 Honosane Piseiki sea henewemi pawemi nano a:pele pinipe sita:nekeye. Piseiki sea enene minitapowemi sena sololo tilila ka:la:lopela:la: honosane A:pele Sipi Sa:le tesi tiye elakeye. A:pele Sipi Sa:le amowa senayewi sana kulu potapola: tekamunuse, elawamona mene tesi tiye hanapola: elakeye. A:pele Sipi Sa:le semetei, nano pese amuna piseiwemi tomoipewa, siwa tomoipewa aluse sita:nekeye. Tomoipe sita:ne amunawa Kote ho tomoipewa peleya: sopowemi hamona seya akeye. 7 A:pele Sipi Sa:le amowa hanapola:, Piseiki Kote sea henewemi, Piseiki tiya: iliwemi sawi kopola tiyapola: enewa, Eyewi tikeye. 8 Tiyapola: kemi nano falela a:pele amuna pinipewala, sena sololo tilila talo elipeipela: pinipewala (24), A:pele Sipi Sa:le enewemi ema wapilima:na:pela: panoka:pela:la: falopela:laposakeye. Sena sololo tililayewi semetei semetei esa: kisama:na:pela: kita amuna tiyapola:, koloyewi timiya tisiwala tikeye. Koloyewi timiya tisiwemi pauta ikumu napolo hosonosene sela sapokeye. Sapo homatoa fiyanewa Kote sena kesaleyawa kulukulusewa amunakeye. 9 Iyewi kisala hili kisalawa wekeye.[a]

 
“Sena kesale epela: kakasilise api miya:na:pela:,
Kewa sana kuluse pepeta hapakeye. Pepeta hanose emiwa sena kesale Kotepela: sita:pesita: wa:la:yakeye.[b]
Sena kesale i maya sopowemiwala, sena kesale solo sopowemiwala,
sena kesale toma kalikalilawala, sena peleya: sopowemi sita:newana,
sena kesale sopoke Keyewi wa:la:yakeye.
Alanase, sawi momateya kopolawa Keyewi tiyapola:, ima sawiwemi hakeyawa semetei Keyewi teka:ma:na:wa ililakeye.
Semetei kewa napolo sopolo hekeyanase, semetei keye teka:ma:na:wa ililakeye.[c]
10 Sena kesale amoke wa:la:lose Keyewi iwa potapola: ela:
iyewi Kotepela: timinimita: Keyewi ta:peyakeye. Apula: pilisiti senayewi sena kesale epela: Kotema kakasilise kulukulusene epapuluse, iyewi aluse kakasilise kulukulumita: Keyewi timinimita: ta:peyakeye.[d]
Apula: iyewi peleya: kolemi sena kesale sopoke piseikipela: pota: sita:laposakeye.”
Aluse kisalakeye.
A:pele Sipi Sa:ma Wapiyawa Wekeye

11 Neyewi wa:ke potakamake, hepene sena taosene taosene muta sosolo tela eta: akema:na: telama sita:la: hopota: neyewi topukeye. Hopita: neyewi ta:tapola: potakamake, Piseiki sea henewemi nano falela a:pele amuna pinipe sopowala, sena sololo tilila amowana, hepene senawana sopoke kekene tiyapola: sita:nekeye. Sita:la: unuwapo seyakeye. 12 Selesewa weyamu seyakeye.

 
“A:pele Sipi Sa:le Kewa sana kulunase Kema semetei wapilise ililakeye.
Ke penaiyawa sosokeye. Ke nano keteawa sosokeye.
Ke matanawa napolo hekeyakeye. Ke penaiya timinisekeye.
Ke unuwa sosokeye. Ke ho:liyawa sosokeye. Niyewi Kema napolo esa: wapilikeye.” [e]
Aluse, seyakeye.
 

13 Aputa: hepene falemi nano ketea sita:neyawala, peleya: weyemi nano ketea sita:neyawala, peleya: hane kolemi nano ketea sita:neyawala, hano tawala honosane nano ketea sita:neyawala, nano ketea amo sopoke solo nowa seyakeye.[f] Iyewi weyamu seyakeye.

 
“Piseiki Kote Kewa sea helakemiwana,
A:pele Sipi Sa:le[g] Kemawala niyewi wapilise wapilikeye.Keli ho:liyawala penaiyawana sosokeye.
Alanase, Ka:ma ikila sopoke niyewi wapilise kao sita:pesena:keye.”[h]
 

14 Aluse selapita:, nano falela a:pele amuna pinipeyewi selese, “Henekeye.” Apula: sena sololo tilila amoke Piseikima wapilima:na:pela: panoka:pela:la: wapiyakeye.

<- Hokatea 4Hokatea 6 ->