Languages
2
Yaubada la yamata baisa mina Isireli

1 E Guyau ilukwaigu 2 bakamituli la biga baisa komwaidosi mina Yerusalem, kawala,

“Ka, igau otubovaumi yeigu[a] aluluwaimi yokomi saina kukwamiabaigusi,
deli mi yebwaili baisa yeigu gala bitakaibiga,
makawala natana vivila biveyawasi sola la mwala.
Lokubokulaigusi oviloupakala,
mapilana valu gala kwaitala tuta availa ibiguli.
3 Mina Isireli, yokomi ulo tomota tatougu.
Yokomi goli ulo veiguwatoula mokwita.
Availa availa iyogagaimi,
yeigu awitali kabommayuyu deli kabosilagi baisa matausina.
Ka, yeigu Guyau bogwa lalivala.”
Mina Isireli tubusia si mitugaga

4 Tubula Yekobe, yokomi dalela Isireli, kunakaigalaisi Guyau la biga. 5 Ka! Guyau eikaibiga, kawala,

“Avai sula lavagi e tubumia eitabinakaigusi?
Kaina avaka avigaki matausina e eitotubulokaigusi?
Ka! matausina ititaimamilasi wala baisa tokolu gala dimlesi,
e metoya osi taimamila ivigakaisi titoulesi gala wala dimlesi.
6 Mitaga matausina ivigakaigusi yeigu gala wala avaka,
ilagoli yeigu lakoli matausina metoya Itipita,
e lavakadi lamai oluwalela vilouwokuva wala
mapilana oviloupakala deli koyala kanakenuvawokuva wala,
saina lubulabu deli kabosilagi, e gala tomotala,
deli gala availa ibodi bilokaia mapilana.
7 Yeigu amai matausina e asaiki si pwaipwaia makubilana saina kubilumalala,
paila bimwasawasi metoya kala kabinai deli goli avai vavagi bwaina isisu.
Mitaga kaimapula matausina ikevilugwaisi wala ulo pwaipwaia
deli iyogwalaisi wala valu makwaina yeigu bogwa lasaiki.
8 Tolula gala sitana ikatupoisi, ‘Ambaisa Guyau?’[b]
Matausina goli ulo tolula tatougu mitaga gala wala inikolaigusi.
Tokaraiwaga ikosomapwaigusi,
e tovitoubobuta ivitoubobutasi oyagala Beali,[c]
deli itemmalaisi tokolu gala dimlesi.”
Guyau ikamituli kasi pakula la tomota
9 Mapaila Guyau ikaibiga kawala,
“Ka! yeigu bakamituli kasi pakula ulo tomota.
Yeigu tuta oluvi basaili litusia oyakala.
10 Ka! kusuwa opilikwaibwaga, e bukula osimlela Saipirosi,
e kuwitali taitala bisum opilibomatu, e bila oviluwela Kedara.
E bukugisi kidamwa gala wala avai vavagi avai tuta ikaloubusi makawala.
11 Ka, gala avai boda avai tuta ikatumapwaisi si yaubada,
ilagoli minasina gala yaubadatoula.
Mitaga ulo tomota bogwa eikoulovaigusi,
e eiyosisiga yaubada minasina gala ibodi bivagaisi avai vavagi paila matausina,
ilagoli yeigula Yaubada mokwita lavigaki bitemmalaisi matausina tomota ituwoli ituwoli.
12 Mapaila yokomi mina labuma, ibodi bisinudunudu uwomi paila baisa,
e bivigaki biyowa lupomi deli bikiuta ninami,
13 paila ulo tomota bogwa eiyomitulaisi kwaiyu mitugaga.
Matausina bogwa eitotubulokaigusi,
yeigu kasi sopi yeluyelu tuta tuta,
e ikelisiga kasi utuwotu titoulesi
makwaisina gala avai tuta sitana sopi bilodu.
Mina Isireli mapula si kapidakala
14 “Yokomi mina Isireli gala ula,
e gala lokukwaloubusisi metoya okatupipi, kadai!
Mitaga avaka uula kami tilaula eiuwaigimi ke?
15 Kami tilaula eiguuvavilasi baisa yokomi makawala laiyoni;
matausina iyogagaisi mi pwaipwaia, e makawala goli viloupakala wala,
deli mi valu dadaimiwokuva wala, e gala ibodi bukusikailisi.
16 Mokwitala, matausina tolesi Mempisi deli tolesi Tapanesi[d] leimaisi
e leikatuvaisi pwanetasi ulo tomota.
17 Mina Isireli, titoulemi wala lokumiakaimi vavagi makwaisina kadai!
Ka, mwada yeigula Guyau mi Yaubada e lauvakadaimi okedatoula,
mitaga yokomi kupakaitulaigusi mokwita.
18 Ka, lokulolosi Itipita, avaka kudokaisi bukubanaisi kala bwaina,
e bukumomomsi sopila Waya Naili ke?
Deli lokulolosi Asiria, avaka kudokaisi bukubanaisi kala bwaina,
e bukumomomsi sopila Waya Yupereiti ke?
19 Ka, mi mitugaga titoulemi bimipukwaimi,
e mi totuboulola baisa yeigu bogwa bikamogaimi.
E yokomi bukunikolaisi ammakawala kala yayana deli kala gaga
kidamwa bukusilavaigusi yeigu Guyau mi Yaubada,
e mwada gala tuvaila bukukwabikuwolaigusi.
Ka, yeigu goli Guyau Giyouveka Topeuligaga bogwa lalivala.”
Mina Isireli ipakaisi bitemmalaisi Guyau

20 E Guyau Yaubada eilivala kawala,

“Mina Isireli, omitibogwa yokomi kukoulovaisi ulo karaiwaga,
yokomi kupakaisi bukukwabikuwolaigusi deli bukutemmalaigusi.
E kulosiga wa koya makwaisina kwevakaveka
deli osikowasi kai makaisina eitumkikitasi
e baisa kutitaimamilasi baisa yaubada nagowa.
21 Tauwau, yokomi lavalaimi makawala tamtala tamkwatukila waini
metoya matamna dilimoya, kadai!
Mitaga igau kugisaimi titoulemi!
Yokomi makawala matamsina diligaga, gala dimlesi.
22 Kaina goli bukukwakaiasi deli youloʹula
mitaga yeigu bagigisi wala pikolela uwomi.
23 Ki, ammakawalaga lokulivalasi mwada yokomi gala wala kuyogwalaimi,
e mwada gala avai tuta kutemmalaisi Beali ke?
Ka, kugisaisi ammakawala mi bubunela gaga oitayatila,
e kugisaisi avaka lokuuvagaisi.
Yokomi kuvigakaimi makawala natana kaukwa navivila ola tuta katumwakula,
e minana bititavina wala,
24 e minana bogwa eikabitutuki bititowa wala bititoma.
Avai tuta minana la tuta katumwakula, availaga ibodi bisilibodi minana ke?
E namwala gala wala bibodi binevi minana,
paila minana navivila bogwa wala eititobogwa.
25 Mina Isireli, taga iwaiya kaikemi,
kaina bikipakali kaiyomi
mwada bukunainevisi minasina ituwoli yaubada.
Mitaga ka, mi biga kawami, ‘Gala! galaga bakatovilasi.
Bogwa lakayebwailisi nammitawasi yaubada
e bakabokulaisi wala minasina.’ ”
Mina Isireli ibodi bibanaisi kasi mipuki

26 E Guyau ikaibiga kawala, “Mina Isireli, komwaidomi wala biulikaimi mmosila, mi gweguya, kaidadala valu, tolula, deli tovitoubobuta, makawala toveilau bilumkoli kala mmosila avai tuta biyosisi. 27 Ka! yokomila kai kudokaisi tumami e dakuna kudokaisi inami[e] — komwaidomi wala biulikaimi mmosila. Baisa bikaloubusi uula gala kutovilakaigusi mitaga kaimapula kutotubulokaigusi. E avai tutaga kubudobodasi mwau kunigadaigusi mwada bama bakatumovaimi.

28 “Woo! Taga amminasina yaubada lokububulokaisi yumami? Ka! Kidamwa ibodi bikolaimi avai tuta kubudobodasi mwau, bwaina kudouwaisi bimaisi bikolaimi, kadai! Mina Yuda, yokomi saina bidubadu mi yaubada makawala mi valu kala bidubadu. 29 Tauwau! Avaka uula kutakulukulusi baisa yeigu? Deli, avaka uula kukosomapwaigusi? 30 Ka! yeigu amipukwaimi, mitaga gala wala kulumkolaisi avaka kala bwaina mipuki, deli gala kutagwalasi yeigu bakiduwosisiaimi. Yokomi makawala laiyoni nagigasisi e kukwatumataisi mi tovitoubobuta. 31 Ka! mina Isireli kunakaigalaisi avaka yeigu lalilivali. Avaka uula kulilivalasi, mwada desi wala avaka ninami titoulemi bukuuvagaisi, e gala avai tuta bukukwaimilavausi bukumakaiagusi? Ki! kaina yeigu towokuva wala gala avai pilasi apilasaimi, e kami lumkola makawala kuwowausi odudubila mapilana saina kabosilagi bidubadu kaina? 32 Ki! kudokaisi natana natubovau ibodi bilumwelavi kala katubaiasa, kaina navaivau ibodi bilumwelavi kala katubaiasa ola tuta veivai? Mitaga yokomi ulo tomota bogwa wala kulumwelavaigusi saina bidubadu yam gala gagabila bitakalau. 33 Paila yokomi bogwa wala kunikolaisi kidikedala ulatila, e avai tuta minasina saina nakalimwala bigisaimi bogwa wala bitakutaisi mi kidakeda. 34 Ka! kami kwama buyaviwokuva wala eiyatunutunu, buyavisi tonamakava deli tobubwaila, e galaga buyavisi touveilau.

“E gala uwolela kami mmosila, 35 yokomi lokulivalasi kawami, ‘Yakamaisi tomitukwaibwaila wala, e Guyau gala tuvaila bigibuluwaimasi!’ Mitaga ka! yeigu wala, yeigu goli Guyau bamipukwaimi paila kuyakalaimi titoulemi mwada gala wala kumitugagasi. 36 Ka, bogwa wala lokuvabwaimi titoulemi avai tuta kutemmalaisi si yaubada boda ituwoli ituwoli. Ka! igau mina Itipita biyogibuluwaimi makawala mina Asiria leivigakaimi. 37 E yokomi bukusilumwagudusi deli kami mmosila e bukusilavaisi Itipita. Paila yeigu bogwa lakoulovi matausina lokudubumaisi, e gala wala avai pilasi bukubanaisi metoya baisa matausina.”

<- YEREMAIA 1YEREMAIA 3 ->