HEBIRAIO
Papia i mitiŋic eki me eki qâreŋkewec i mi manaŋgopeneŋ. Mâc Paulore babaficfâc jaŋeraonec moczi qâreŋkewec i sawa manaŋgopeneŋ. Ŋic gâcne jaŋe Apolozi mecne qâreŋkewec, â gâcne jaŋe Banabazi qâreŋkewec, iŋuc mueŋgopieŋ. Papia rune ine Palestaiŋ mâreŋkonec Judaŋic Miti Opâ rua-jarekicne jaŋe. Hebiraio i Judaŋic jaŋere šâŋe raŋɋa moc. Papia qâreŋkewec mitiŋic eki Itali mâreŋko juhuc qâreŋkewec (gaŋ 13:24). Timoteo kâpâcwâru fickonec wahawec dameŋ ira qâreŋkewec (gaŋ 13:23).
Palestaiŋ mâreŋko Judaŋic gâcne Jesure kikefuŋ erâ juhapie fai-jeŋicko šika kâpâcwâru feme bugâpâcko jumbiŋ. Moneŋ mafa i wâc jowac rokicne (gaŋ 10:32-34). Eme pârâckehuc šiŋuc mumbiŋ: Miti ɋâricne bajuhapene fific guguriŋ boc enâreŋgopieŋ. Irec miti ɋâricne beherâ raŋɋane sawa bajuhuc mâteŋne junšepeneŋ (gaŋ 4:4-6 â gaŋ 10:26-29). Tucnezi biac mitire tutumaŋko mocwâc mi fisihuc qâoma embiŋ (gaŋ 10:25). Ine hâcne, Jesure hata râpeckerâ Judaŋic hata raŋɋa-jeŋic i mocwâc âtezo mumbiŋ.
Eme mitiŋic papia qâreŋke-jarewec eki bufac qajarehuc dâŋ šiŋuc qâreŋke-jarewec: Jesurao qohota sanaŋkehuc miti kiki papaŋ jaha bajuzo (gaŋ 3:1 â gaŋ 10:23). Ehuc qâoma rorokac tâmiric juzo (gaŋ 10:19-25). Á Jesure šiŋuc qâreŋkewec: Jesu e miti fârine jâmbâŋ bâfua-nârewec. Mârâc jaha mitio wiac ewarekicne i sahacne sawa. Jesu e fekicne sâko, porofete â aŋelo jaŋe ere wahacmicne sasawa (gaŋ 1 â 2). Mose â Josua jahe Jesure wahamicne (gaŋ 3 â 4). Taha bapa ŋic jaŋe sâqocne mutâmireniŋte tâpiri mi fojarewec. Qowi bâzi rikembiŋ irec fârine mi muzo, i mâc sâsâc ekicne. Jesu e taha bapa sâko fârine, eki kiŋnâŋecte kiwiric rome tarawec (gaŋ 4-10). Mitiŋic guru sâko mârâc jaha mamanasiŋhec juhuc sanaŋkembiŋ jaŋerao findendeŋnehuc ɋicwânšâŋhec erâ juzo (gaŋ 11 â 12). Erâ miti qaqazu â micne bapa hata âte-nârembiŋ, ijaha âte raku hae ŋeŋe sanaŋ bâfua-nârekicne, ira fisizo (gaŋ 13).

Jesu e miti mujaŋgeŋke-nâre tarawec

1 Anutu e mârâc jaha porofete ejareme jaŋe mimiŋnefâc-nâŋec dâŋ hawarine fuŋne fuŋne â hatane fuŋne fuŋne jaza warekuhapie 2 ine šâhec tataranao, dameŋ šira hâcne, Ŋokâ ecneme dâŋ nâzâwec. ŋokâ e wiac sasawa irec rune juocte mucnewec, ehec hâcne wiac bâfua-fârepic. 3 Anutu eri tatamac-ticnere qâreŋ erao fuawec fokacte â ju ju-ticnere sâc juekacte tâpiri dâŋticnezi wiac sasawa dope siŋsiŋ ecneha foekac. Eki sâqocne šure bataniŋ gie bafârerâ faic fekicne sâko ere fâreo fewec ŋekac. 4 Aŋelo hucjopa-fârewec jukac, irec sâcko aŋelo šâŋe siricke-fârehuc šâŋe fekicne hotâckewec.

Aŋelo jaŋe wahakicne, Ŋokâ e fekicne

5 Anutuzi mo aŋelo mo kecšiŋuc moc âzâcnewec:

“Go hâcne ŋokâ-nane,

no miŋecgac bâfuacgukopac”?

Me kecšiŋuc:

“Noni Mamac ecnerâ jupemu

â eki Ŋokâ enarerâ juzejec”?

6 Moc ine juku mârâc fufua e mâreŋko râeme wahaocmu irec dâŋ šiŋuc muwec:

“Anuture aŋelofâc jaŋe dieŋzi hecne-fârenšepieŋ.”

7 Aŋelo jaŋere kecšiŋuc mukicne:

“E aŋelofâcne hawari-jeŋic bâtikieme mâŋâŋ eeŋgopieŋ,

â kiŋaŋ qaqafâcne hawari-jeŋic bâtikieme šocbâruŋ eeŋgopieŋ

8 Ŋokâre ine šiŋuc mukicne:

“Anutu go ŋicwofuŋ ŋeŋege i ŋeŋe sanaŋ ŋerašihuc juocmu,

â ŋicwofuŋ gunuge i bâbâtiŋ gunu biaŋ.

9 Go tiŋnere egareekac â hehesic ine râsi ecneekic.

Irec Anutu, gore Anutu, eki šeri wokemaŋ rua-garewec,

i âgofâcge jaŋere sâc jâuruhuc rua-garewec.”

10 Moc šiŋuc mucnekicne:

“Wofuŋ go fufuŋkenao mâreŋte hobeteŋ râemeŋ,

â sambâŋne sambâŋne jaŋe megere qâreŋ.

11 Jaŋe siroweniŋmu, go ine jusanaŋkekic,

jaŋe ŋaqi iŋucne raŋɋaŋkeniŋmu.

12 Ŋaqi iŋucne epie goki bataforiec-jopacmu,

eme jaŋe hawari moc eniŋmu.

Goki ine juekic ijaha juekic,

â jara dameŋge i moc mi taraocmu.”

13 Anutu e mo aŋelo mo šiŋuc moc âzâcnewec:

“Ware fâre-naneo ŋehaŋtec

râsifâcge guruc-jopape

kikegere ââtesiŋ enšepieŋ”?

14 Aŋelo sasawa jaŋe mârozi kiŋaŋ qaqa, ŋic bâbâpiaŋ rauckeniŋte mukicne jaŋe bafic-jopaniŋte sorec-jopakicne.

HEBIRAIO 2 ->